قىزىلوردا وبلىسىندا كۇرىش القابىنىڭ 80-85 مىڭ گەكتارىن ساقتاپ قالىپ، قالعانىن باسقا داقىلدار ءۇشىن پايدالانۋ كەرەك. بۇل تۋرالى قىزىلوردا وبلىسىنىڭ اكىمى گۇلشارا ءابدىقالىقوۆا «Apta» باعدارلاماسىنا بەرگەن سۇحباتىندا ايتتى.

– قىرعىزستانداعى توقتوعۇل سۋ قويماسىندا بىلتىر 18 ملرد. تەكشە مەتر سۋ بولسا، بيىل 12 ملرد. تەكشە مەتر عانا سۋ بولدى. سول سياقتى وزبەكستاننان كەلەتىن سۋ ءبىزدىڭ شاردارادا سۋ قويماسىنىڭ مولشەرى بىلتىرعىمەن سالىستىرعاندا 1،1 ملرد. تەكشە مەترگە از بولعان. جازعى ۋاقىتتا ەگىس ەگىلگەن سوڭ قيىندىقتار بولدى، سول سەبەپتى ەگىستىكتى سۋعارۋدى قول رەجيمىندە باسقارۋعا تۋرا كەلدى. ەكولوگيا جانە تابيعاتتى قورعاۋ مينيسترلىگىنە كوپ راحمەت ايتامىز. كۇندە تاڭەرتەڭ جۇمىستى سولارمەن باستاپ، سۋدى رەتتەپ وتىرۋعا تۋرا كەلدى. ءبىزدىڭ كاسىپكەرلەر مەن ەگىنشىلەرىمىزگە دە راحمەت ايتقىم كەلەدى. ولارعا سۋدى كەزەك-كەزەك بەرىپ وتىردىق. مىسالى، كۇندە سەكۋندىنا ەڭ كەمىندە 550 تەكشە مەتر سۋ كەلۋى كەرەك بولسا، ول 450 تەكشە مەترگە دەيىن ءتۇسىپ كەتكەن كەزدەرى بولدى، - دەيدى قىزىلوردا وبلىسىنىڭ اكىمى گۇلشارا ءابدىقالىقوۆا.

ونىڭ ايتۋىنشا، بيىل وڭىردە ەگىس جاقسى شىققان. اتاپ ايتقاندا، بيىل 551 مىڭ توننا كۇرىش جينالدى. بۇل بىلتىرمەن سالىستىرعاندا 15 مىڭ تونناعا كوپ.

– ەگىستە دە ءارتاراپتاندىرۋ ماسەلەسى بار. مىسالى، كۇرىشتىڭ 1 گەكتارىنا 33 مىڭ تەكشە مەتر سۋ قاجەت، ال تۋرا وسىنداي كولەمدەگى سۋدى 10 مىڭ گەكتارعا ەگىلگەن قىزاناققا دا جۇمساۋعا بولادى. كۇرىشتىڭ 1 گەكتارىنان 650 مىڭ تەڭگە كىرىس بولسا، قىزاناقتىڭ 1 گەكتارىنان 25 ميلليون تەڭگەگە دەيىن كىرىس الۋعا بولادى. بۇل كورسەتكىشتى جوڭىشقامەن دە، باسقا دا داقىلدارمەن سالىستىرۋعا بولادى. سوندىقتان ءبىز كاسىپكەرلەر، ەگىنشىلەرمەن بىرگە ويلانىپ، كۇرىش القابىنىڭ 80-85 مىڭ گەكتارىن ساقتاپ، قالعانىن باسقا داقىلدار ءۇشىن پايدالانۋ كەرەك دەپ تۇيدىك، - دەيدى ول.