ەلوردا باس سانيتار دارىگەرىنىڭ كارانتيندى كۇشەيتۋ تۋرالى جاڭا قاۋلىسى شىقتى. قاۋلى 25 قازاندا كۇشىنە ەندى. بۇل تۋرالى astana.gov.kz حابارلادى. 

جاڭا قاۋلى بويىنشا ويىن-ساۋىق، سپورتتىق جانە باسقا دا بۇقارالىق ءىس-شارالاردى، سونداي-اق وتباسىلىق، ەسكە الۋ ءىس-شارالارىن (بانكەتتەر، ۇيلەنۋ تويلارى، مەرەيتويلار، ەسكە الۋ) ۇيدە وتكىزۋگە، ميتينگىلەر، شەرۋلەر، جيىندار جانە ت. ب. وتكىزۋگە تىيىم سالىندى. 

مىندەتتى تۇردە 2 مەتردەن كەم ەمەس الەۋمەتتىك قاشىقتىقتى ساقتاي وتىرىپ، جەكە تارتىپپەن جانە 5 ادامنان اسپايتىن توپپەن تەك اشىق اۋادا سپورتتىق جاتتىعۋ وتكىزۋگە بولادى. 3 ادامنان اسپايتىن توپتاردان نەمەسە ءبىر وتباسى مۇشەلەرىنەن باسقا، تابيعاتقا ەكسكۋرسيالىق، كورپوراتيۆتىك، توپتىق شىعۋ ۇيىمداستىرۋعا جانە قالانىڭ كورىكتى جەرلەرىنە شولۋ جاساۋعا بولمايدى. 

بيليارد، كاراوكە، بوۋلينگ ورتالىقتارى، كومپيۋتەرلىك كلۋبتار، تۇنگى كلۋبتار، جابىق عيماراتتارداعى بالالار ويىن الاڭدارى مەن اتتراكسيوندارى، باتۋتتار، كاراوكە، بۋكمەكەرلىك كەڭسەلەر مەن ويىن كلۋبتارى، ونىڭ ىشىندە لوتەرەيالار ۇتىس ويىنى سياقتى ويىن-ساۋىق مەكەمەلەرىنە بارۋعا جول بەرمەۋ قاجەت.

65 جاستان اسقان ادامداردىڭ قالا جانە قوعامدىق ورىندار بويىنشا ءجۇرىپ-تۇرۋىنا شەكتەۋ جاسالدى.

بۇرىنعىشا تومەندەگى تالاپتاردى قاتاڭ ساقتاۋ مىندەتتەلدى:

– بەتپەردە كيۋ؛

– قاشىقتىقتى ساقتاۋ؛

– انتيسەپتيكتەردى پايدالانۋ.

سونىمەن قاتار ءبىرقاتار شەكتەۋلەر ەنگىزىلدى. ماسەلەن جەكسەنبى كۇندەرى قوعامدىق كولىكتەردىڭ جۇمىستارىنا تىيىم سالىندى، ال جۇمىس كۇندەرى جانە سەنبى كۇندەرى جۇمىس كەستەسى ساعات 6:00-دەن 23:00-گە دەيىن بولادى. ساۋدا-ويىن-ساۋىق ورتالىقتارىنىڭ، ساۋدا ۇيلەرىنىڭ، ساۋدا ورتالىقتارىنىڭ دەمالىس جانە مەرەكە كۇندەرى جۇمىستارىنا تىيىم سالىنادى.