ازىن-اۋلاق كومەكتىڭ ءوزى بىرەۋلەر ءۇشىن ۇلكەن دەمەۋ. جاقسى نيەتپەن جاسالعان سىي-قۇرمەت كەز كەلگەن ادامنىڭ جانىن جادىراتادى. سونداي جانداردىڭ ءبىرى ناۋرىزباي اۋداندىق پروباسيا قىزمەتىنىڭ تىركەۋىندە تۇرعان امانجول ەسىمدى ازامات. تاعدىردىڭ تالكەگىمەن جازا باسىپ ءىستى بولعان ول ءقازىر بالا-شاعاسىمەن شاعىن جەر ءۇيدى جالداپ وتىر.
اۋداندىق پروباسيا قىزمەتىنىڭ اعا ينسپەكتورى زامير بەيسەنبەتوۆ باستاعان توپ امانجولدىڭ ۇيىنە ات باسىن بۇرىپ، ولارعا ازىق-تۇلىك قورجىنىن تابىس ەتتى. اعا ينسپەكتورمەن بىرگە وندا «ماڭگىلىك قازاقستان» قوعامدىق قورىنىڭ مۇشەلەرى جانە اۋداندىق پروباسيا ءبولىمىنىڭ باسقا دا قىزمەتكەرلەرى باردى. دەلەگاسيا سىي-سىياپاتتى ءۇي يەلەرىنە سالتاناتتى تۇردە ۇسىنعان سوڭ، اعا ينسپەكتور ولارعا كەلۋ سەبەبىن ءتۇسىندىردى. «ەل اراسىندا شەن تاققان ازاماتتار بىرەۋدىڭ ۇيىنە سۇراق-جاۋاپ الۋ ءۇشىن نەمەسە پوليسيا ۋچاستىگىنە الىپ كەتۋ ءۇشىن كەلەدى دەگەن جاڭساق تۇسىنىك قالىپتاسقان. الايدا ءبىز قايىرىمدىلىق جۇمىستارىمەن دە اينالىسىپ تۇرامىز. ناۋرىزباي اۋدانى بويىنشا وسى كەزگە دەيىن كوپتەگەن جانۇيالارعا قول ۇشىن سوزدىق. سول يگى ىستەردىڭ جالعاسى رەتىندە، مىنە، ۇكىمەتتىك ەمەس ۇيىمداردىڭ مۇشەلەرىمەن بىرگە سىزدەردىڭ شاڭىراقتارىڭىزعا دا باس سۇعىپ وتىرمىز» دەدى ز.بەيسەنبەتوۆ.
ونىڭ ۇكىمەتتىك ەمەس ۇيىم دەپ وتىرعانى – «ماڭگىلىك قازاقستان» قوعامدىق قورى بولاتىن. ۇيىمنىڭ جەتەكشىسى ب.نالىبايەۆتىڭ سوزىنشە ولار بۇل ءىستى الماتى قالاسى قوعامدىق دامۋ باسقارماسىنىڭ قولداۋىمەن جۇزەگە اسىرىپ وتىر ەكەن. «تۇرمەدەن شىققان ازاماتتاردى قوعامعا الەۋمەتتىك بەيىمدەۋ وڭاي ءىس ەمەس. ول جاقتان بوساعاننان كەيىن دە ولاردى الدا ءتۇرلى قيىندىقتار كۇتىپ تۇرادى. مىسالى، جۇمىسسىزدىق، قۇقىقتىق ءبىلىمنىڭ ازدىعى، تاعى باسقا الەۋمەتتىك پروبلەمالار. وسى ماقساتتا از دا بولسا دەم بولسىن دەپ، وسىنداي شارانى اتقارىپ وتىرمىز»، دەيدى ۇيىم جەتەكشىسى.
شاڭىراق يەلەرى دە كەلگەن قوناقتارعا ريزاشىلىعىن ءبىلدىردى. «مەن ءقازىر ءتورت بالانىڭ اكەسىمىن. بالالارىمنىڭ الدى مەكتەپتە وقىپ جاتىر. سىزدەردىڭ كومەكتەرىڭىز تەك مەنىڭ ەمەس، بالا-شاعامنىڭ دا كوڭىلىن كوتەرىپ تاستادى. اسىرەسە، اۋداندىق پروباسيا قىزمەتىنە راحمەت. ولاردىڭ ارقاسىندا كوپتەگەن تۇيتكىلدى ماسەلەلەرىم بىرتىندەپ شەشىلىپ جاتىر. بارلىقتارىڭىزدىڭ ىستەرىڭىزگە بەرەكە تىلەيمىن» دەپ العىسىن ءبىلدىردى وتاعاسى.
پىكىر قالدىرۋ