«جايدارمان» ازىلكەش كومانداسى جازاسىن وتەپ جاتقان جاسوسپىرىمدەرگە كۇلكى سىيلادى

الماتى قالاسىنداعى رەسپۋبليكا بويىنشا جالعىز بالالار كولونياسىندا جىلدىڭ قاي مەزگىلىندە بولماسىن كوڭىلدى شارالار ءجيى وتكىزىلەدى. سولاردىڭ ىشىندە بالالاردىڭ اسىعا كۇتەتىن قوناقتارى – كوڭىلدى تاپقىرلار كومانداسى. جازاسىن وتەۋشى جاسوسپىرىمدەردى ءازىل-قالجىڭعا قارق قىلاتىن «كۆنشيكتەر» مۇندا جىل سايىن كەلىپ تۇرادى. اسىرەسە الماتى قالاسىنداعى كوللەدج ستۋدەنتتەرىنەن قۇرالعان كوماندالارمەن سوتتى بولعان بالالاردىڭ وزدەرى دە جارىسقا ءتۇسىپ، نەبىر كۇلكىگە تولى كورىنىستەر دايارلايتىن. بيىل ەلىمىز بويىنشا جاريالانعان كارانتينگە بايلانىستى ستۋدەنتتەر ونلاين وقىعاندىقتان، ءىستى بولعان بالالار «كتك»-عا قاتىسا المادى. ەسەسىنە بيىل بالالار كولونياسىنا الماتى قالاسىنىڭ «جايدارمان» كومانداسىنىڭ جەتەكشىسى ەردوس ورالبەكوۆ باستاعان ازىلكەشتەردىڭ وزدەرى كەلىپ، ونەر كورسەتتى.

– بالالار كولونياسىنان كەلگەن ۇسىنىستى ءبىز قۋانا قابىل الدىق. ويتكەنى «جەردە ءبىر بالا قۋانسا، كوكتە جەتى پەرىشتە قۋانادى» دەگەن ءسوزدىڭ ماڭىزىن جاقسى تۇسىنەمىز، – دەيدى «جايدارماننىڭ» جەتەكشىسى.

كولونياداعى بالالار «جايدارماننىڭ» قۇرامىنداعى «قازاتك» جانە «ەنەرگو» جاستارىنىڭ ونەرىن قىزىعا تاماشالادى. «ەنەرگو» كومانداسى بىلتىر الماتى قالاسى بويىنشا «سۋپەر ليگا چەمپيونى» بولسا، «قازاتك» كومانداسى «ستۋدەنت لايف چەمپيونى» اتاندى.

ويىن بارىسىندا ستۋدەنتتىك ءومىردىڭ ءتۇرلى قىزىقتارىن كورسەتكەن ازىلكەشتەردىڭ ونەرىنە بالالار ءدان ريزاشىلىعىن ءبىلدىردى. ازىلگە سپورت، اسكەر تاقىرىپتارى دا ارقاۋ بولدى.

كۇلكى كەشىنىڭ سوڭىندا لا-155/6 تۇزەۋ مەكەمەسى باستىعىنىڭ ورىنباسارى، ادىلەت مايورى ماقسات ءالىمجانوۆ «جايدارمان» كوماندالارىنا  العىس ايتىپ، ءازىل الەمىندە جەتىستىككە جەتە بەرۋلەرىنە تىلەكتەستىك ءبىلدىردى.

الماتى قالاسى قاج دەپارتامەنتى