الماتى قالاسىندا جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن تۇرعىن ۇيلەرگە ءوتىنىش قابىلداۋ باستالدى. قۇجاتتار بۇگىننەن باستاپ 9 قاراشاعا دەيىن قابىلدانادى.
وتىنىشتەر www.almaty-jastary.kz سايتى ارقىلى قابىلدانادى. اۆتوريزاسيا سايتتا ەلەكتروندىق سيفرلىك قولتاڭبا (ەسق) ارقىلى جۇرگىزىلەدى. ونى "ازاماتتارعا ارنالعان ۇكىمەت" مەملەكەتتىك كورپوراسياسىنان الۋعا بولادى.
ساتىپ الۋ قۇقىعىنسىز جالعا بەرىلەتىن پاتەرلەر 5 جىل مەرزىمگە بەرىلەدى. قازىرگى ۋاقىتتا ناۋرىزباي اۋدانىنىڭ "Alma City-5" شاعىن اۋدانىنان 350 ءبىر بولمەلى پاتەرلەر ۇلەستىرىلمەك.
باعدارلاماعا تالاپتارى:
– 29 جاسقا تولماعان، مەكتەپ، تەحنيكالىق جانە ورتا ءبىلىمى بار نەمەسە جوعارى وقۋ ورنىن ءتامامداپ جۇمىس ىستەپ جۇرۋگە ءتيىس؛
– سوڭعى 2 جىلدا الماتى قالاسىندا تىركەۋدە تۇرۋى كەرەك؛
– جەكە باسىندا ءۇيى جوق بولۋى مىندەتتى؛
– سوڭعى التى اي ىشىندە كەمىندە 101 مىڭ تەڭگە اي سايىنعى تابىس بولۋى كەرەك؛
– بانكتە جيناق شوتتىڭ بولۋى مىندەتتى.
ءوتىنىش بەرۋشىلەردىڭ ءتىزىمى ۇپاي جۇيەسى بويىنشا جاسالادى. ۇپايلاردىڭ بەرىلۋ كريتەرييلەرى، سونداي-اق، قاجەتتى قۇجاتتار ءتىزىمى جوعارىدا كورسەتىلگەن سايتتا ورنالاستىرىلعان.
