ارمەنيانىڭ تاۋلى قاراباحقا بايلانىستى كاپيتۋلياسياسىنان كەيىن ەل استاناسى ەريەۆاننىڭ ورتالىعىندا جاپپاي نارازىلىق شەرۋى باستالدى. ميتينگشىلەر كەلىسىمشارتقا نارازىلىقتارىن ءبىلدىرىپ جاتىر. ۇكىمەت عيماراتىنىڭ الدىنداعى الاڭعا بىرنەشە مىڭ ادام جينالعان. ولار قورشاۋدى بۇزىپ، كەشەنگە كىردى.
شەرۋشىلەر تاۋلى قاراباحتا بولعانىن جانە سوعىس قيمىلدارىنا قاتىسقاندارىن اتاپ ءوتىپ، ۇرىس الاڭىنا قايتا بارۋعا دايىن ەكەنىن ايتىپ، تالاپتارىن جەتكىزدى.
شەرۋشىلەر "موي شاگ" دەپۋتاتتارىن وپپوزيسيالىق كۇشتەرگە قوسىلۋدى جانە ارمەنيا پرەمەر-مينيسترى، رەسەي جانە ازەربايجان پرەزيدەنتتەرى قول قويعان قاراباح تۋرالى ءۇشجاقتى مالىمدەمەنىڭ كۇشىن جويۋ پروسەسىن باستاۋدى تالاپ ەتتى.
– ولار كەلىسىمنىڭ كۇشىن جويىپ، بىزگە كوماندير بەرسىن، ءبىز ءبارىمىز بىرىگىپ مايدانعا بارامىز. ءبىز وتانىمىزدى قورعاۋعا باردىق، ءبىراق ءبىزدى جەرىمىزدى بەرىپ جىبەرۋ ءۇشىن قايتارىپ جىبەردى، – دەدى نارازىلىق بىلدىرۋشىلەردىڭ ءبىرى.
تاعى ءبىر شەرۋشى ونىڭ بارلىق دوستارى مايدانعا بارىپ، قارۋ الۋعا دايىن ەكەنىن ايتتى. ولار بارلىق ساياسي كەلىسپەۋشىلىكتەردى ۇمىتىپ، بىرىگىپ، سوعىستى جالعاستىرۋدى تالاپ ەتەدى.
پىكىر قالدىرۋ