پرەزيدەنت قاسىم-جومارت توقايەۆ باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك ءجۇمانعاريندى قابىلدادى، دەپ حابارلادى اقوردا سايتى.
مەملەكەت باسشىسىنا اگەنتتىك قۇرىلعاننان بەرى اتقارىلعان جۇمىستار جايىندا باياندالدى. سەرىك جۇمانعارين ۆەدومستۆونىڭ اشىقتىق ساياساتىن جۇزەگە اسىرىپ جاتقانىن ايتتى. ول پروبلەمالاردى قوعام جانە بيزنەس وكىلدەرىمەن بىرلەسىپ تالقىلاۋعا مۇمكىندىك بەرەتىن كراۋدسورسينگتىك الاڭ مەن كەدەرگى جونىندەگى كەڭەستەردىڭ قۇرىلعانىن ايتتى.
"قاسىم-جومارت توقايەۆقا پتر سىناماسىنىڭ، جەكە قورعانىس زاتتارىنىڭ، سونداي-اق، قازاقستان اۋەجايلارىنداعى تۇتىنۋ تاۋارلارىنىڭ باعاسىن تومەندەتۋ جونىندە بەرگەن تاپسىرمالارىنىڭ ورىندالۋى جايىندا مالىمەت بەرىلدى.
بۇدان بولەك مەملەكەت باسشىسىنا ۆەدومستۆو ساۋدا بيرجالارىنىڭ قىزمەتىنە، سۇيىتىلعان گاز باعاسىن ارزانداتۋعا، نارىقتاعى دارى-دارمەكتىڭ باعاسىن تۇراقتاندىرۋعا قاتىستى جاسالعان جۇمىستار تۋرالى ايتىلدى.
توقايەۆ پتر سىناماسىنىڭ، جەكە قورعانىس زاتتارىنىڭ جانە دارى-دارمەك باعاسىن ايرىقشا باقىلاۋدا ۇستاۋدى تاپسىردى.
پرەزيدەنت اگەنتتىك باسشىسىنا ەكونوميكانىڭ تيىمدىلىگىن ارتتىرۋعا، تاۋار بيرجاسى مەن باسەكەلەستىكتى ودان ءارى دامىتۋعا قاتىستى ءبىرقاتار مىندەتتەمەلەر جۇكتەدى" دەلىنگەن سايت حابارلاماسىندا.
پىكىر قالدىرۋ