قازاقستاندىق بوكسشى تۇرسىنباي قۇلاحمەت ءبىرىنشى ورتا سالماقتاعى WBC International بەلبەۋىنىڭ يەگەرى اتاندى. بۇل تۋرالى Sports.kz. حابارلادى.

قازاقستاندىق بوكسشى (1-0، 1 كو) وڭتۇستىك كيركبيدە (ۇلىبريتانيا) MTK Global پروموۋتەرلىك كومپانياسى ۇيىمداستىرعان كاسىپقوي بوكس كەشىندە ءبىرىنشى ورتا سالماقتاعى WBC International بوس تيتۋلى ءۇشىن جەرگىلىكتى بوكسشى ماكلەەم ماكگوۋەنمەن (14-0-1، 3 كو) جەكپە-جەككە شىقتى.  

بۇل جەكپە-جەك ون راۋندقا جالعاسىپ، تورەشىلەردىڭ شەشىممەن تۇرسىنبايدىڭ جەڭىسىمەن اياقتالعان (99-89، 99-89، 99-89). جەتىنشى راۋندتا ت.قۇلاحمەت بريتاندىق قارسىلاسىن نوكداۋنعا جىبەردى. وسىلايشا، ول ءوزىنىڭ مانسابىنداعى العاشقى تيتۋلدى جەڭىپ الدى. 

26 جاستاعى قازاقستاندىق سپورتشى ءۇشىن بۇل ءوزىنىڭ كاسىبي مانسابىنداعى ەكىنشى جەڭىسى. ال ونىڭ قارسىلاسى ماكگوۋەن مانسابىنداعى العاشقى جەڭىلىس.

تۇرسىنباي قۇلاحمەت 2019 جىلعى ازيا چەمپيونى جانە 2019 جىلعى الەم چەمپيوناتىنىڭ قولا جۇلدەگەرى بولعان.