جۇڭگو لاگەرىندە وتىرعانداردى جۇمىسقا جەككەن سينسزياندا شۋ شىقتى (ۆيدەو)

/image/2020/11/13/crop-140_39_315x420_49852494_303.jpg

سينسزيان ادام قۇقىعىن اياققا تاپتاعان ايماق رەتىندە بەلگىلى. وسىعان قاراماستان Volkswagen (VW) سينسزياندا جۇمىسىن جالعاستىرماقشى، دەپ جازادى Qamshy.kz اقپارات اگەنتتىگى BBC-گە سىلتەمە جاساپ.

جۇڭگو مويىنداماسا دا مىڭداعان ۇيعىر مەن باسقا دا جۇڭگو لاگەرىندە وتىرعان از ۇلت وكىلدەرى ءوز ەركىنەن تىس اۋىر جۇمىس ىستەۋگە ءماجبۇر بولعانى تۋرالى دالەلدەر بار.

Volkswagenء-دى سىناۋشىلار كومپانيانىڭ تاريحىن العا تارتىپ، ونىڭ مورالدىق تۇرعىدا مۇنداي قادامعا بارماۋ كەرەكتىگىن ايتادى. گەرمانيانىڭ ناسيستەر پارتياسى Volkswagen كومپانياسىن 1937 جىلى قۇرعان جانە ەكىنشى دۇنيەجۇزىلىك سوعىس كەزىندە تۇرمەدە وتىرعاندار مەن لاگەرگە قامالعانداردى اۋىر جۇمىس ىستەۋگە ءماجبۇر ەتكەن.

اتالمىش كومپانيانىڭ قىتايداعى باسشىسى ستەفان ۆاللەنشتەين (Stephan Wollenstein) BBCء-دىڭ قىتايداعى بولىمىنە بەرگەن سۇحباتىندا، سينسزيان استاناسى ۇرىمجىدە Volkswagen كومپانياسىنىڭ جۇمىس ىستەيتىنىن قولدايتىنىن ايتتى. وندا 600 جۇمىسكەر ەڭبەك ەتەدى، جىلىنا 20 000 كولىك جاسايدى.  

"نازي ۋاقىتىندا ادامداردى فابريكادا جۇمىس ىستەۋگە ماجبۇرلەدى. ءقازىر ءبىز ەشكىمدى ءوز ەركىنەن تىس قارا جۇمىسقا سالمايمىز. ادامدى قاناۋعا جول بەرمەۋىن ارنايى تەكسەرەمىز" دەيدى ستەفان ۆاللەنشتەين. الايدا جۋرناليست ودان "كومپانيا جۇمىسكەرلەرىنىڭ 25%-ى ۇيعىرلار لاگەرىنەن كەلمەگەنىن نىق سەنىممەن ايتا الاسىز با؟” دەپ سۇراعانىندا، ديرەكتور "جوق" دەپ جاۋاپ بەردى.

"ءبىز كومپانيانىڭ جۇمىس پروسەسسىن ءجىتى باقىلايمىز. ونىڭ ىشىندە جۇمىسقا الىنعان ادامدارعا دۇرىس قارىم-قاتىناس ورناتۋىن قاداعالايمىز. بۇل ءبىزدىڭ جۇمىس ستاندارتىنا جات ارەكەتتى بولدىرماۋعا كومەكتەسەدى. دەسەك تە ەشقاشان 100% سەنىمدى بولا المايمىز" دەدى ول.

ەۋروپا پارلامەنتىنىڭ جانە Volkswagenء-نىڭ شتاب پاتەرى ورنالاسقان تومەنگى ساكسون شتاتىنداعى گەرمانيا پارلامەنتىنىڭ مۇشەسى ۆيولا فون كرامون-تاۋبادەل (Viola von Cramon-Taubadel) اتالمىش كومپانيانىڭ قىتايداعى باسشىسىنىڭ بەرگەن جاۋابىنا قاناعاتتانبادى. ول ەڭبەك كۇشىن پايدالاناتىن لاگەر مەن كومپانيانىڭ اراسىندا بايلانىس بولۋ مۇمكىندىگىن مۇلدە قاراستىرمايتىنداي تولىق سەنىمدى بولۋى كەرەكتىگىن ايتادى.  

VW ءوزىن اقتاۋعا تىرىسقانىمەن ونى سىناۋشىلاردىڭ لەگى تولاستار ەمەس. ول ورىندى دا. سەبەبى سينسزياندا زاۋىت اشسا، جۇڭگو بيلىگىنىڭ كەلىسىمىن الىپ، ولارمەن بىرلەسىپ شەشىم قابىلداۋعا تۋرا كەلەدى. سونىمەن قاتار اتالمىش ايماقتا زاۋىت اشۋ ارقىلى قىتايدىڭ جۇرگىزىپ وتىرعان ساياساتىن ءۇنسىز قولدايتىنىن بىلدىرەدى.

سپۋتنيك دەرەكتەرى مەن كۋاگەرلەر لاگەر سالىنىپ جاتقانىن جانە فابريكادا ادامداردى جۇمىسقا ماجبۇرلەپ وتىرعانان دالەلدەيدى.

قاتىستى تەگتەر :

پىكىر قالدىرۋ

قاتىستى ماقالالار