پرايمەريزدىڭ ەكىنشى كەزەڭى ءوتتى. پارتياىشىلىك ىرىكتەۋدىڭ قىسقاشا قورىتىندىسى تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى پاراقشاسىندا ارنايى جازبا جاريالادى.

«قۇرمەتتى دوستار! وسى اپتادا ەلباسى، پارتيا ليدەرى نۇرسۇلتان نازاربايەۆتىڭ باستاماسىمەن قولعا الىنعان پارتياىشىلىك پرايمەريزدىڭ ەكىنشى كەزەڭى ءوتتى. وسى ءىس-شارانىڭ قىسقاشا قورىتىندىسىن شىعارۋدى ءجون كورىپ وتىرمىن.

ءبىرىنشى. ءبىز بارلىق دەڭگەيدەگى ءماسليحاتتارعا ارنالعان پارتيالىق تىزىمدەردى ازىرلەۋدى اياقتادىق. 216 ءماسليحاتقا ۇمىتكەر رەتىندە «Nur Otan»-نىڭ پارتيالىق تىزىمىنە 6253 پارتيالىق ەندى.

وزدەرىڭىز بىلەتىندەي، ءبىرىنشى كەزەڭدە پرايمەريزگە 10 مىڭنان استام كانديدات قاتىستى. ال 1-4 قازان ارالىعىنداعى رەسپۋبليكالىق ونلاين-داۋىس بەرۋگە 662 مىڭ ادام نەمەسە بارشا نۇروتاندىقتاردىڭ 84%ء-ى قاتىستى.

پرايمەريزدىڭ ەكىنشى كەزەڭى اياسىندا اۋداندىق جانە قالالىق كونفەرەنسيالاردا ەلەكتروندى داۋىس بەرۋگە 4،5 مىڭنان استام باستاۋىش پارتيا ۇيىمدارىنىڭ اتىنان 10 مىڭنان اسا دەلەگات-سايلاۋشى قاتىستى.

بارلىق كونفەرەنسيا مەن پىكىرسايىستار الەۋمەتتىك جەلىلەردە ونلاين رەجيمدە كورسەتىلدى. بۇل سايلاۋ بارىسىنىڭ اشىقتىعى مەن ايقىندىعىن قامتاماسىز ەتتى.

ەكىنشى. «Nur Otan»-نىڭ حالىقتىق ءتىزىمى جاسالدى.

تالداۋ كورسەتكەندەي، ايەلدەردىڭ ۇلەس سانى 22-دەن 34%-كە دەيىن، جاستار – 3،5 ەسە، 7-دەن 24%-كە دەيىن ارتتى. قازىرگى قىزمەت ەتىپ وتىرعان ءماسليحاتتاردىڭ قۇرامىمەن سالىستىرعاندا ورتاشا جاسى 7 جاسقا – 51-دەن 44-كە دەيىن جاساردى.

پارتيالىق تىزىمدەردىڭ 24%ء-ىن قىزمەتتەگى دەپۋتاتتار قۇرايدى، ال 76%ء-ى – جاڭا تۇلعالار. بۇل قوعامنىڭ جاڭارۋعا دەگەن سۇرانىسىن قاناعاتتاندىرۋعا مۇمكىندىك بەردى»، – دەپ جازدى ب.بايبەك.

بۇدان سوڭ پارتيا ءتوراعاسىنىڭ ءبىرىنشى ورىنباسارى پارتيا قاتارىنا قوسىلعان جاڭا مۇشەلەر تۋرالى ايتتى. ونىڭ ايتۋىنشا، پارتيا قاتارىنا 42 مىڭنان استام جاڭا مۇشە قوسىلعان. ولاردىڭ 1000-نان استامى پارتياىشىلىك سايلاۋعا قاتىسىپ، ءاربىر 3ء-شىسى «Nur Otan»-نىڭ پارتيالىق تىزىمىنە ەندى.

«ءۇشىنشى. پارتيالىق كونفەرەنسيالاردا اۋداندىق جانە قالالىق سايلاۋالدى باعدارلامالار بەكىتىلدى.

ەل پرەزيدەنتى قاسىم-جومارت توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا باعدارلامانىڭ بارلىق جوبالارى پرايمەريز كەزىندە تۇرعىندارمەن جان-جاقتى تالقىلاندى. ازاماتتاردان تۇسكەن 17 مىڭنان استام ۇسىنىستار مەن ەسكەرتۋلەردىڭ 80%-تەن استامى قابىلدانعان وڭىرلىك باعدارلامالاردا ەسكەرىلدى.

ءتورتىنشى. پارتيانىڭ ماجىلىسكە ارنالعان قورىتىندى ءتىزىمى 25 قاراشادا «Nur Otan»-نىڭ حح سەزىندە بەكىتىلەدى.

پىكىرسايىستار قورىتىندىسى بويىنشا 723 جەڭىمپاز انىقتالدى، ولار 14 وبلىستىڭ پارتيالىق تىزىمدەرىنە ەنەدى. ولاردىڭ ىشىنەن 236 ادام كەلەسى اپتادا «Nur Otan»-نىڭ ماجىلىسكە ارنالعان پارتيالىق تىزىمىنە قوسىلۋ ءۇشىن وبلىستىق پىكىرسايىستارعا قاتىسادى.

قازىرگى كەزدە ەلوردانىڭ، الماتى مەن شىمكەنتتىڭ كانديداتتارى سايلاندى. ەلەكتروندى داۋىس بەرۋ ناتيجەلەرىمەن Primaries.kz سايتىنان تانىسۋعا بولادى.

ساراپشىلار قاۋىمى اتاپ وتكەندەي، پارتيا پرايمەريزى ەڭ باستىسى – باسەكەلى، اشىق تا ايقىن نەگىزدە جۇرت سەنىم ارتقان بەدەلدى تۇلعالاردىڭ اراسىنان ىرىكتەلگەن الەۋەتتى دەپۋتاتتار كورپۋسىن جاساقتاۋعا مۇمكىندىك بەرمەك.

وسىلايشا، «Nur Otan» ەلباسى، پارتيا ليدەرى نۇرسۇلتان نازاربايەۆتىڭ بيلەۋشى پارتيانى «قايتا جانداندىرۋ» اياسىندا جاريالاعان «مىقتى ليدەرلەر – مىقتى پارتيا» قاعيداتىن ناقتى ىسكە اسىردى.

الەمنىڭ جەتەكشى ەلدەرىندە وزىق دەموكراتيالىق قۇرال رەتىندە تانىلعان پرايمەريز قوعامىمىزدا جاڭا ساياسي مادەنيەتتىڭ قالىپتاسۋىنا جول اشا وتىرىپ، پارتيالىق-ساياسي جۇيەنىڭ اجىراماس بولىگىنە اينالاتىنىنا سەنىمدىمىن»، – دەدى ب.بايبەك.