1 جەلتوقسانىنان باستاپ الماتى جانە نۇر-سۇلتان قالالارىنان تۇركىستان قالاسىنا اۋە رەيستەرى ۇشۋدى باستايدى، دەپ حابارلايدى Qamshy.kz اقپارات اگەنتتىگى تۇركىستان اكىمىنىڭ باسپا ءسوز قىزمەتىنە سىلتەمە جاساپ.

العاشقى رەيس نۇر-سۇلتان – تۇركىستان – نۇر-سۇلتان باعىتى بويىنشا ورىندالادى. ازاماتتىق اۆياسيا كوميتەتى تۇركىستان قالاسىنىڭ اۋەجايىنا تۇراقتى رەيستەر اشۋ بويىنشا جۇمىس جۇرگىزۋدە.

باستاپقى كەزەڭدە نۇر-سۇلتان جانە الماتى قالالارىنان تۇركىستانعا كۇن سايىن رەيستەر ورىنداۋ جوسپارلانىپ وتىر. رەيستەردى "Fly Arystan"، "SCAT" جانە "Qazaq Air" سەكىلدى 3 قازاقستاندىق اۋە كومپانياسى ورىندايدى. "Fly Arystan" كومپانياسى بۇل باعىتتار بويىنشا بيلەتتەردى ساتۋدى باستادى. بيلەتتەردىڭ باعاسى نۇر-سۇلتان جانە تۇركىستان قالالارى اراسىندا 6999 تەڭگەدەن جانە الماتى مەن تۇركىستان قالالارى اراسىندا 5999 تەڭگەدەن باستالادى.

"تۇركىستان قالاسىنان 20 شاقىرىم جەردە ورنالاسقان حالىقارالىق اۋەجاي زاماناۋي تەحنولوگيالاردى قولدانا وتىرىپ، حالىقارالىق ستاندارتتارعا سايكەس سالىنعان. اۋەجايدىڭ جالپى اۋدانى – 905 گەكتار بولسا، ۇشۋ-قونۋ جولاعى – 3 300ح45 مەتر. جولاۋشىلار تەرمينالىنىڭ اۋدانى – 10،5 مىڭ شارشى مەتر.

تاۋەلسىز قازاقستانداعى العاشقى جاڭا اۋەجاي قۇرىلىسىنىڭ جوباسى قازىرگى تۇركىستاننىڭ اۋقىمدى قۇرىلىسىنىڭ ءىرى جانە ماڭىزدى نىساندارىنىڭ بىرىنە اينالدى. شەتەلدىك ينۆەستورلار قۇرىلىستى رەكوردتىق مەرزىمدە اياقتادى.

الداعى ۋاقىتتا قازاقستاننىڭ باسقا دا وبلىس ورتالىعىمەن بايلانىس ورناتىلادى. سونداي-اق مەككە مەن ستامبۋلعا رەيستەر اشۋ جوسپارلانعان. اۋەجاي شەتەلدىك اۆياكومپانيالاردىڭ ۇشۋى ءۇشىن "اشىق اسپان" رەجيمىنە قوسىلادى. بۇل اۋەجايدان ۇشۋ گەوگرافياسىن كەڭەيتىپ، شەتەلدىك تۋريستەر اعىنىن تارتۋعا ىقپال ەتەدى" دەلىنگەن اقپاراتتىق حابارلامادا.