بەلورۋستە پرەزيدەنت سايلاۋىندا الەكساندر لۋكاشەنكو جەڭگەننەن كەيىن حالىق الاڭعا شىعىپ ادىلەتتى سايلاۋ ءوتۋىن جانە لۋكاشەنكونىڭ وتستاۆكاعا كەتۋىن تالاپ ەتىپ قارسىلىق اكسياسىنا شىققان. سودان بەرى 100 كۇن ءوتتى. نارازالىق بىلدىرۋشىلەر تولقىنى تولاستار ەمەس.

پوليسيا گۇل مەن شار ۇستاعان ايەلدەردى كۇشتەپ كولىككە سالىپ، زەينەتكەرلەرگە كوز اشىتاتىن گازدى قولدانعانىنا قاراماستان ءار جەكسەنبىدە ەل استاناسى مينسكتە مىڭداعان ادام قارسىلىق اكسياسىنا شىعىپ، ادىلدىكتى تالاپ ەتۋدە.

BBC شەرۋگە قاتىسۋشىلارمەن سۇحباتتاستى. ونىڭ قازاق تىلىندەگى نۇسقاسىن نازارلارىڭىزعا ۇسىنامىز. 

"ەكىنشى دۇنيەجۇزىلىك سوعىستى ەسكە سالدى"

IT سالاسىندا جۇمىس ىستەيتىن 31 جاستاعى ولەسيا ءار جەكسەنبىدە شەرۋگە قاتىسادى. پوليسەيلەر بۇل جولى الاڭعا جينالعانداردى دۋبينكامەن ۇرىپ، ەلەكتروشوكەردى پايدالانعان.

– پوليسەيلەر بىزگە قايتا-قايتا شابۋىلدادى. سۇمدىق بولدى. سوزبەن ايتىپ جەتكىزۋ مۇمكىن ەمەس. ادامداردى اسا قاتىگەزدىكپەن ۇرىپ، قولىن قايىرىپ اكەتىپ جاتتى، – دەيدى ولەسيا.  

ول باسقا ادامدارمەن بىرگى كوپ قاباتتى ۇيگە قاراي قاشتى. پوليسەيلەر كولىگىمەن ولاردى قۋىپ جەتىپ كوبىن ۇستادى. بەيتانىس ادام ولەسيا مەن باسقا دا ادامداردى ۇيىنە كىرگىزىپ، ولار امان قالعان.  

– ەكىنشى دۇنيەجۇزىلىك سوعىستا ەۆرەيلەردى ناسيستەردەن قۇتقارۋ ءۇشىن جاساعانداي ءبىز دە تىعىلۋعا ءماجبۇر بولدىق. ەسەڭگىرەپ قالدىق، – دەيدى ولەسيا.

وسى جەكسەنبىدە وتكەن شەرۋگە ازاماتتار پوليسەيلەر سوققىعا جىعىپ،  اۋرۋحانادا قايتىس بولعان رومان بوندارەنكونىڭ قۇرمەتىنە شىقتى.

داۋىس بەرۋ ناتيجەسى جاريالانعاننان كەيىن 100 000 ادام نارازىلىق اكسياسىنا شىقتى. ولار ادىلەتتى سايلاۋ ءوتۋىن، ساياسي تۇتقىنداردى بوساتۋىن جانە پوليسيانىڭ قاتىگەزدىگىن توقتاتۋدى تالاپ ەتتى.

"پوليسيا پاتەرگە باسا كوكتەپ كىردى"

18 جاستاعى ديانا پچەلنيكوۆا جاقىندا وتكەن نارازىلىق شەرۋدە ومىرىندەگى ەڭ قورقىنىشتى ءساتتى باستان وتكەرگەن. ول وزگە شەرۋشىلەرمەن بىرگە پوليسيادان قورعانۋ ءۇشىن ءۇي دالىزىنە قاشىپ كىردى. بەيتانىس ايەل ولاردى ۇيىنە كىرگىزدى، ءبىراق پوليسيا بايقاپ قويعان.  

– مەن ۇيگە كىرگەن سوڭعى اداممىن. پوليسەيلەر مەنىڭ ارقامنان دۋبينكامەن ۇردى. ءبىز ەسىكتى جابۋعا تىرىستىق، الايدا ولاردىڭ كۇشى باسىم بولدى. وفيسەر پاتەرگە كىرىپ ەر ادامنىڭ ءبارىن جيناپ، قارسىلىق بىلدىرگەندەردى دۋبيكامەن ۇردى. ايەلدەر ايقايلاپ پوليسەيلەردەن ولارعا كۇش كورسەتپەۋىن جالىنىپ سۇرادى. مەن قاتتى قورىقتىم. پوليسەيلەر كوبىن الىپ كەتتى. كەيبىرى پاتەردە تىعىلىپ ۇلگەردى. ءبىرى ديۆاننىڭ ارتىنا، ەندى ءبىرى شكافقا تىعىلدى. ءۇشىنشىسى بالكوندا بولعان، – دەپ ەسكە الدى ديانا.

"پوليسەيلەر ءبىزدى ۇرىپ ءولتىرۋدى ماقسات تۇتقانداي سوققىعا جىقتى"

پوليسەيلەردىڭ ۇرىپ، سوققانىنا قاراماستان شەرۋ باسەڭدەمەدى. كاسىپكەر ۆلاديمير (ەسىمى وزگەرتىلگەن) "نارازىلىق اكسياسىنا ءار بارعان سايىن ۇيگە قايتىپ كەلەمىن بە، جوق پا دەگەن ويمەن بارامىن" دەيدى.

ءۆلاديميردى تامىزدا وركەستينا تۇرمەسىنە جىبەرۋ تۋرالى شەشىم شىققان. تۇرمەدە ونى  اياۋسىز سوققىعا جىققان. "پوليسەيلەر ءبىزدى ۇرىپ ءولتىرۋدى ماقسات تۇتقانداي سوققىعا جىقتى" دەپ قورقىنىشپەن ەسكە السا دا شەرۋگە قاتىسىپ، ادىلدىكتى تالاپ ەتۋگە بەكىنىپ وتىر. كۇش، قايراتى بۇرىننان دا ارتقانىن ايتادى.  

ءۇش جارىم ايعا سوزىلعان نارازىلىق شەرۋى بەلورۋس حالقىن وزگەرتتى. حالىق بولاشاعى جارقىن ەلدە تۇرۋ ءۇشىن ءقازىر ارەكەت ەتۋ كەرەكتىگىن ءتۇسىندى. ونىڭ ءبىرى 29 جاستاعى اندرەي پوگەريلا.

پرەزيدەنت سايلاۋىنا دەيىن اندرەي ساياساتقا قىزىقپايتىن. داۋىس بەرۋ ناتيجەسى جاريالانىپ، حالىق تۇندە الاڭعا شىققاندا ول كافەدە وتىرعان. حالىق نە ءۇشىن جينالعانىن كورۋ ءۇشىن دالاعا شىققاندا كۋا بولعان كورىنىستەن كەيىن ءومىرى تۇبەگەيلى وزگەردى.

– ءبارى بەيبىت ءوتىپ جاتتى. ءبىر مەزەتتە پوليسەيلەر كەلىپ حالىقتى اسقان قاتىگەزدىكپەن ۇرا باستادى. ءوز كوزىممەن ولاردىڭ جاس قىزدى دۋبينكامەن ۇرعانىنا كۋا بولدى. ءبىر جىگىتتى اياۋسىز سوققىعا جىقتىع – دەپ ەسكە الدى اندرەي.

وسىنى كورگەننەن كەيىن ول ويلانباستان شەرۋشىلەر قاتارىنا قوسىلدى.

بەلورۋس پرەزيدەنتى لۋكاشەنكو شەرۋشىلەردى شەتەل قارجىلاندىرعان دەپ ايىپتادى. ماسكۇنەم، ناشاقور دەپ اتادى. باستى وپپوزيسيا كوشباسشىلارى تۇرمەگە قامالدى نەمەسە ەلدەن قاشىپ كەتتى. ولار شەرۋگە قاتىسپادى.

الاڭعا مۇگەدەك تە، ستۋدەنت تە، زەينەتكەر دە جينالدى

بەلگىلى سپورتشىلار اشىق تۇردە پرەزيدەنت سايلاۋى قايتا ءوتۋىن جانە پوليسيا قاتىگەزدىگىن توقتاتۋىن تالاپ ەتتى.

تەاتر اكتەرلەرى سپەكتاكلدىڭ باسىندا وپپوزيسيانىڭ ءانۇرانىن ايتىپ شەرۋشىلەردى قولدايتىنىن ءبىلدىرى.

بەلسەندىلەر ءوز قارسىلىعىن ساۋدا ۇيلەرىندە فلەشموب ارقىلى كورسەتتى.

پوليسەيلەر شەرۋشىلەردىڭ ۇراندارى جازىلعان پلاكاتتاردى جۇلىپ العانىمەن كەلەسى كۇنى ءدال سول جەردە جاڭا پلاكات ءىلىنىپ تۇراتىن.

پوليسەيلەردىڭ قاتىگەزدىگىنە قاراماستان حالىق شەرۋدى بەيبىت تۇردە وتكىزدى. پوليسەيلەر ولارعا قاتىگەزدىك تانىتقانىمەن كەلەسى شەرۋگە گۇلمەن كەلدى.

– پوليسەيلەردىڭ قاتىگەزدىگىن كورگەندە ولار سەكىلدى بولعىڭ كەلمەيتىنىن تۇسىنەسىڭ. مەن تاباندىلىق پەن وزىمە دەگەن سەنىمدىلىك ارقىلى ءوز كۇشىمدى كورسەتەمىن، – دەيدى 32 جاستاعى سۆەتلانا ستانچەنكو. ول شەرۋگە قاتىسقانى ءۇشىن 9 كۇن تۇرمەگە وتىرىپ شىقتى.