قوبىزشى، سازگەر سماتاي ۇمبەتبايەۆ قايتىس بولدى. بۇل تۋرالى ءانشى، ونەرتانۋشى ەرلان تولەۋتاي facebook پاراقشاسىندا جازىپ، مارقۇمنىڭ جاقىندارىنا كوڭىل ايتتى.
– قوبىز سوڭعى قونعان كوشەلى ونەرپاز سماتاي ەدى. ءبىراق سماتايدىڭ ءقادىرىن قازاق بىلگەن جوق. ءتاڭىردىڭ ءتىلى تۇگىلى ءوز ءتىلىن ۇمىتىپ بارا جاتقان بايعۇس قازاق قايدان ءبىلسىن!.. سماتاي ومىردەن جىلاپ كەتتى... ءوز زامانىندا تۋماعان باقسىز تالانت، باپسىز دارىن ەر سماتاي-اي، ونەرىڭنىڭ قۇنىن كىمنەن داۋلايمىن، ەسەڭدى كىمنەن الامىن! ەلەۋسىز وتكەن ەسىل ەرىم-اي!
باقۇل بول، سماتاي سەرى! قوش بول، قوبىز ءداۋىرىنىڭ اقىرعى پەرزەنتى، قورقىتتىڭ سوڭعى تۇياعى!
نادان مولدانىڭ ۋلى ۋاعىزىمەن ۋلانعان الاش بالاسى سماتاي ءولدى دەپ جوقتاي قويماس، تىم قۇرىماسا سەن جىلا تاما جۇرتى، قارا قوبىزدىڭ اۋەلگى يەسى سەندەر ەدىڭدەر عوي....، – دەپ جازدى ەرلان تولەۋتاي.
سماتاي ۇمبەتبايەۆ 1947 جىلى جاڭاارقا اۋدانى تۇگىسكەن اۋىلىندا تۋعان. قوبىزشى، سازگەر، ەل ىشىنەن شىققان ەرەكشە دارىن. قوبىز تارتۋدى ءوز بەتىمەن ۇيرەنگەن. 1968 جىلى جاڭاارقا اۋدانىنداعى شوپاندار تويىندا، 1972 جىلى جامبىلدىڭ 125-جىلدىق تويىندا كوزگە ءتۇسىپ، الماتى مەملەكەتتىك كونسەرۆاتورياسىنا قابىلداندى. قوبىزشى داۋلەت مىقتىبايەۆتان 4 جىلداي ءدارىس الادى. قازاقكونسەرتتە، جامبىل اتىنداعى فيلارمونيادا (1979 جىلدان) قوبىزشى بولىپ ىستەيدى. پورتۋگاليا، جاپونيا ت.ب. ەلدەردە ونەر كورسەتەدى. سونىمەن قاتار، س.ۇمبەتبايەۆ قوبىز، دومبىرا جاسايتىن شەبەر. "جايناعان ولكە"، "ءبىر قالقا" ت.ب. كۇيلەردىڭ اۆتورى.
