قاسىم-جومارت توقايەۆ قاراعاندى وبلىسىنا ساپارى بارىسىندا قاراعاندى قالاسىنداعى فەرروقورىتپا زاۋىتىنا بارىپ، ونداعى ءوندىرىس پروسەسى مەن وندىرىستە، قۇرىلىستا، كەمە، اۋە كولىكتەرىن جانە اۆتوموبيل جاساۋدا قولدانىلاتىن دايىن ونىمدەرمەن تانىستى. بۇل تۋرالى akorda.kz سايتى حابارلادى. 

زاۋىتتىڭ اكسيونەرلەرى اتالعان جوبانىڭ جەرگىلىكتى جانە جاھاندىق سۇرانىستى قامتاماسىز ەتەتىنىن ايتتى. اتاپ ايتقاندا، مۇندا وندىرىلگەن فەرروسيليسيا قازاقستاننان بولەك، ەۋروپا، وڭتۇستىك شىعىس ازيا، سولتۇستىك جانە وڭتۇستىك امەريكا ەلدەرىنىڭ نارىعىنا شىعارىلادى.

پاندەميا كەزىندە كومپانيا ءونىمنىڭ ساتىلۋ اۋماعىن 15 ەلگە ارتتىرىپ، قازاقستاننىڭ ەكسپورتتىق الەۋەتىن كوتەرۋگە ۇلەس قوسقان. قازىرگى تاڭدا زاۋىت ءونىمىن الەمنىڭ 37 ەلىنە ەكسپورتتايدى.

پرەزيدەنت ءوندىرىستى باسقارۋ ورتالىعىن ارالاپ كورىپ، "Qaz Qarbon" ءجشس-نىڭ جاڭا جوباسىمەن تانىستى.

– بۇل وتە قاجەتتى جانە جاقسى جوبا. قۇتتى بولسىن. قازاقستاندى يندۋستريالاندىرۋعا قوماقتى ۇلەس قوسقانىن ايتپاعاننىڭ وزىندە، ەل ەكونوميكاسىنىڭ ماڭىزدى اكتيۆى سانالادى. ءوندىرىستى جىلدام كورىپ شىقتىق. ءبىراق بۇعان قاتىستى ۇلكەن جوسپارلارىمىز بار. باقىلاپ، كومەكتەسىپ وتىرامىز، – دەدى مەملەكەت باسشىسى.

كەزدەسۋ سوڭىندا توقايەۆ فەرروقورىتپا زاۋىتىنىڭ ەڭبەك ۇجىمىنا تابىس تىلەدى.

وقي وتىرىڭىز

♦  توقايەۆ قاراعاندىداعى مەكتەپ-گيمنازياعا ابايدىڭ اتىن بەرۋدى قولدادى