تاۋلى قاراباقتا سوڭعى 30 جىلدا ءبىرىنشى رەت مينالاردى اۋقىمدى تۇردە تازارتۋ جۇمىستارى جۇرگىزىلىپ جاتىر. رەسەي اسكەري ينجەنەرلەرى قاراباقتاعى العاشقى قاقتىعىس كەزىنەن ساقتالعان، ءبىراق ءولتىرۋ قابىلەتىن جوعالتپاعان سناريادتاردى تاپقان. بۇل تۋرالى ازەربايجان قورعانىس مينيسترلىگىنە سىلتەمە جاساي وتىرىپ،  ntv.ru سايتى حابارلادى.

"ورتالىق ماماندارى شۋشا-ليسوگورسكيي جولىنىڭ شامامەن ءۇش شاقىرىمدىق بولىگىندە ينجەنەرلىك بارلاۋ جانە جارىلعىش زاتتاردى تازارتۋ جۇمىستارىن جۇرگىزدى. تاۋلىگىنە 200-دەن استام جارىلعىش زاتتىڭ كۇشىن جويىپ جاتىر. تاۋلى قاراباقتا مينالاردى تازارتۋ كەزىندە اسكەريلەر بارلىعى 24 گەكتاردان استام اۋماقتى، سەگىز شاقىرىمنان استام جولدى تازارتىپ، 750 جارىلعىش زاتتى تاۋىپ، كۇشىن جويدى" دەلىنگەن مينيسترلىكتىڭ حابارلاماسىندا.

قورعانىس مينيسترلىگى جارىلعىش زاتتاردى IMP-S2 مينا دەتەكتورلارى جانە INVU-3M سياقتى زاماناۋي قۇرالدارىمەن تاباتىنىن باسا ايتتى. تاۋلى اۋىلداردا، جولداردىڭ بويىندا، بەتكەيلەردە، زيراتتاردان بۇرىننان جوعالعان مينالار، سناريادتار، كارتالار تابىلعان.

بۇعان دەيىن قاراباق قاقتىعىسىنىڭ اياقتالعانى تۋرالى حابارلانعان. ارمەنيا پرەمەر-مينيسترى نيكول پاشينيان ازەربايجان پرەزيدەنتى يلحام الييەۆ جانە رەسەي پرەزيدەنتى ۆلاديمير پۋتين تاۋلى قاراباقتا اسكەري ارەكەتتەردى توقتاتۋ تۋرالى كەلىسىمگە قول قويدى. كەلىسىمگە سايكەس، رەسەيدىڭ بىتىمگەرلىك كۇشتەرى تاۋلى قاراباققا كىرگىزىلگەن.  وسىلايشا ءۇش ەلدىڭ اراسىندا بولعان كەلىسىم بويىنشا 3 اۋدان (لاچين، اگدام، كەلبادجار) ازەربايجانعا قايتارىلىپ، باسقىنشى اسكەر ايماقتان شىعارىلادى. بۇل كەلىسىمنەن كەيىن ارمەنيا استاناسى ەريەۆاندا پرەمەر-مينيسترگە قارسى ميتينگتەر ءوتىپ، سودان بەرى حالىق پاشينياننىڭ وتستاۆكاعا كەتۋىن تالاپ ەتىپ كەلەدى.

ازەربايجان پرەزيدەنتى يلحام الييەۆ بۇل قۇجاتتىڭ ازەربايجانعا ءتيىمدى ەكەنىن ايتقان. ونىڭ ايتۋىنشا، ءقازىر اسكەري كەزەڭ اياقتالدى جانە ساياسي ماسەلەلەرگە كوشۋگە بولادى.