نۇر-سۇلتاندا اباي قۇنانباي ۇلىنىڭ 175 جىلدىعىنا جاس سۋرەتشى ايدوس ەسماعامبەتوۆ ەرەكشە ءمۇسىن جاساپ، اقىننىڭ بەينەسىن اينىتپاي كەسكىندەگەن. قازىرگى ۋاقىتتا ءمۇسىن «قازاقستان» ورتالىق كونسەرت زالىندا ورنالاسقان. 

ايدوس ەسماعامبەتوۆ – ەلىمىزدە ءالى دامي قويماعان گيپەررەاليزم دەپ اتالاتىن جاڭا تەحنولوگيانىڭ وكىلى. ونىڭ ەسىمى «قازاقستاننىڭ 100 جاڭا ەسىمى» جوباسىنا ەنگەن. ون ساۋساعىنان بال تامعان تالانت يەسى فوتوسۋرەتكە قاراپ ۇلى تۇلعالاردىڭ مۇسىندەرىن جاسايدى.

«نەگىزى پسيحولوگيادا بار عوي، 5 مينۋت دەگەن. ادام ءوزى ىستەگىسى كەلمەي تۇرعان دۇنيەگە 5 مينۋت ءوز-وزىن ماجبۇرلەپ ىستەسە، ءارى قاراي قول ءوزى كەتىپ قالادى دا، سول الەمگە كىرىپ كەتىپ، جاساپ كەتەسىز دەگەن.  ۇساق-تۇيەك، جاناعىداي بىر-بىرلەپ شاشىن قاداپ جاساۋ ماعان ۇنايدى. جۇمىس قيىن بولعان سايىن ماعان سونشالىقتى ەرەكشە. مەن ودان ءلاززات الامىن. جاساعان ەكسپوناتتارىمدى اناۋى ىستىق، مىناۋى جاقىن دەپ  ءبولىپ-جارىپ ايتا المايمىن. ءوزىمنىڭ قولىمنان جاسالعان بارلىق تۋىندى مەن ءۇشىن ىستىق»، – دەدى ءمۇسىنشى ايدوس ەسماعامبەتوۆ.

ءمۇسىنشىنىڭ العاشقى تۋىندىسى امەريكانىڭ بۇرىنعى كوشباسشىسى باراك وباما. ودان كەيىن، قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ، قازاقستاننىڭ ءبىرىنشى قورعانىس ءمينيسترى ساعادات نۇرماعامبەتوۆتىڭ، ءۇش ءجۇزدىڭ باسىن قوسقان ابىلاي حاننىڭ بەينەلەرىن جاساعان.  سوڭعى تۋىندىسى قازاقتىڭ ۇلى اقىنى اباي قۇنانباي ۇلىنىڭ 175 جىلدىق مەرەيتويىنا ارنالعان ءمۇسىن. ونى حاكىم ابايدىڭ تۇپنۇسقا فوتوسۋرەتىنە قاراپ وتىرىپ كەسكىندەگەن. ايتا كەتۋ كەرەك، فوتوسۋرەت ارنايى سەمەي قالاسىنداعى ۇلى اقىننىڭ اتىنداعى مۇراجاي سورەسىنەن الىنىپتى.

ادامنىڭ ءمۇسىنىن جاساعاندا ءار مۇشەسى، دەتالى ەرەكشە نازاردى تالاپ ەتەدى. اسىرەسە، كوزىن سالۋ قيىن، دەيدى سۋرەتشى ايدوس ەسماعامبەتوۆ. بىردە فورماسى دۇرىس بولماي قالسا، ەندى بىرىندە جاساعان كوز كوبىكتەنىپ كەتەتىن كورىنەدى. ءتىپتى، كوزدىڭ قان تامىرلارى مەن داقتارىن سالۋ  ءۇشىن اسقان توزىمدىلىك پەن سابىرلىق قاجەت. ماسەلەن،  ءبىر ءمۇسىننىڭ كوزدەرىن جاساپ شىعارۋ ءۇشىن 2 كۇن ۋاقىت كەتەدى ەكەن.  

ءمۇسىنشى فوتوسۋرەتتەن ادامنىڭ اناتوميالىق ەرەكشەلىكتەرىن مۇقيات زەرتتەۋدى مەڭگەرگەن. ەڭ ءبىرىنشى، ەرمەكسازدان نەگىز جاساپ، سودان كەيىن گيپستى، ارتىنان سيليكون قولدانادى. سۋرەتشىنىڭ ايتۋىنشا كوبىسى بالاۋىزبەن جاسايدى دەپ شاتاستىرادى دەيدى. ونىڭ ءوزىن ارنايى تاپسىرىسپەن اقش-تان الدىراتىن كورىنەدى.

«الەۋمەتتىك جەلىلەرگە جازىپ جاتادى. كورگەن ادام، تانىستار دا ايتىپ جاتادى، ءسىز وسى ءبىر ورتالىق اشساڭىز جاقسى بولۋشى ەدى. بالالارىمىزدى بەرىپ، سۋرەت ونەرىنە باۋلىتار ەدىك دەپ. مەن ءبارى ۋاقىتى كەلگەندە بولادى دەپ ايتامىن. بۇيىرسا اشامىز. ول اشىلۋى كەرەك. مىندەتتى تۇردە شاكىرتتەرىم كوبەيۋ كەرەك. سۋرەت الەمىن سەزىنۋ كەرەك. قازىردەن باستاپ، اكۆارەل، گۋاشتارمەن سۋرەت سالا بەرۋ كەرەك»، – دەدى ءمۇسىنشى ايدوس ەسماعامبەتوۆ.

بولاشاقتا ايدوس ەسماعامبەتوۆ گيپەررەاليزمنىڭ جاس بۋىنىن وقىتۋ ءۇشىن مەكتەپ اشۋدى جانە ونەردىڭ وسى ءتۇرىن ەلىمىزدە جاڭا دەڭگەيگە شىعارۋدى ارماندايدى. ونىڭ جوسپارىندا قازاقستاندا مۇسىندەر مۇراجايىن اشۋ دا بار.