گەرمانيالىق dw.com سايتى قازاقستاندا 10 قاڭتار كۇنى بولاتىن پارلامەنت ءماجىلىسى سايلاۋىنا ۇمىتكەر رەتىندە ۇسىنىلعان سەناتتىڭ ەكس-توراعاسى داريعا نازاربايەۆا تۋرالى، ونىڭ ساياساتقا كەلۋى قازاقستان جۇيەسىنە قالاي اسەر ەتۋى مۇمكىن ەكەنى جايلى جازدى.

باتىس باسىلىمى ءوزىن وپپوزيسيا رەتىندە كورسەتەتىن جسدپ پارتياسى سايلاۋعا بايكوت جاريالاعاننان كەيىن ساياسي وقيعا تارتىمدىلىعىن جوعالتقانىن، الايدا داريعا نازاربايەۆانىڭ كانديداتتار تىزىمىنە ەنۋى قىزىقتى ساياسي سيۋجەتكە جول اشقانىن جازدى.

"نوۆايا گازەتا كازاحستان" گازەتىنىڭ باس رەداكتورى الەكساندر كراسنەر بۇدان پرەزيدەنت توقايەۆ پەن ەكس-پرەزيدەنتتىڭ قىزى داريعا نازاربايەۆا اراسىنداعى قايشىلىقتى كورگەن.

– ەگەر ول (داريعا نازاربايەۆا - رەد.) پارلامەنتكە كەلسە، پرەزيدەنت ەكىنشى رەت ونى ول جاقتان شىعارا المايدى، – دەپ سانايدى الەكساندر كراسنەر.

ونىڭ ايتۋىنشا، ق.توقايەۆ پەن د.نازاربايەۆا اراسىنداعى كونفليكت كەزدەيسوق جاعداي ەمەس، بۇل – ەكىنشى پرەزيدەنت پەن بيلىكتى ۋىسىنان شىعارىپ العىسى كەلمەيتىن "نازاربايەۆ اۋلەتىنىڭ" وكىلى اراسىنداعى ساياسي تەكەتىرەستى بىلدىرەدى.

جۋرناليست نازاربايەۆانىڭ پارلامەنتكە ورالۋى ونىڭ جەكە ەسەپ ايرىسۋىنان بولەك، اۋلەتتىڭ بيلىكتى تولىقتاي ءوز قولدارىنا قايتارۋىن بىلدىرەتىنىن اتاپ ءوتتى.

سونداي-اق الەكساندر كراسنەر نازاربايەۆا ماجىلىستە قاتارداعى دەپۋتات بولۋدى مىسە تۇتپاي، ۆيسە-سپيكەر ياعني ەلدەگى ءۇشىنشى ادام بولۋعا ىنتالانۋى مۇمكىن ەكەنىن ايتتى.

ساراپشى نۇرسۇلتان نازاربايەۆ پارلامەنتتىك رەسپۋبليكا قۇرۋعا ىنتالى ەكەنىن، پرەزيدەنتتىڭ كەيبىر وكىلەتتىگىن پارلامەنتكە بەرۋ تۋرالى ەرەجەلەر ازىرلەنگەنىن، 2019 جىلى 3 قالادا پارلامەنتتىك رەسپۋبليكانى جاقتاۋشىلار 1995 جىلعا دەيىنگىدەي پرەزيدەنت پارلامەنتكە ەسەپ بەرۋدى تالاپ ەتىپ رۇحسات ەتىلمەگەن ميتينگ وتكىزىپ، ولاردى ەشكىم قۋماعانىنا نازار اۋداردى.

– ءقازىر سول (پارلامەنتتىك رەسپۋبليكا) جۇزەگە اساتىن ءسات كەلە جاتىر ءارى بۇل داريعا نازاربايەۆانىڭ جوسپارىمەن ۇيلەسەدى. ەگەر ول پارلامەنتتە جوعارى لاۋازىمعا قول جەتكىزسە، پرەزيدەنت ارى دا، بەرى دە جۇگىرەتىن بولادى. بۇل ونىڭ ريەۆانشى جانە "اۋلەت" پوزيسياسىن قايتارۋ بولماق، – دەدى جۋرناليست.

الايدا باسىلىمدا پىكىرى جاريالانعان ساياساتكەر ءامىرجان قوسانوۆ داريعا نازاربايەۆا قارجىلىق، مەديالىق جانە باسقا دا رەسۋرستارىنىڭ بارىنا قاراماستان، جوعارى بيلىككە تالاسقا تۇسە المايدى دەپ  سانايدى.

– بيلىك باسىنداعى ورتالار مەن ۇلكەن بيزنەستە نازاربايەۆ قىزىنىڭ ساياسي امبيسيالارىن قولداي كەتەتىندەر كوپ دەۋگە كەلمەيدى. ونىڭ (نازاربايەۆا - رەد.) ساياسي جانە ىسكەرلىك ەليتا اراسىندا جاۋى كوپ، –  دەدى قوسانوۆ.