پاندەميا باستالعالى عالىمدار كوروناۆيرۋس كەيبىر ادامدارعا نەگە جەڭىل تۇردە، ال كەيبىر ادامعا اۋرۋحاناعا جاتۋعا، رەانيماسيا تۇسۋگە دەيىن اسەر ەتەتىنىن انىقتاۋعا تىرىسىپ كەلەدى، دەپ جازادى COVID-19-دى تاراتپاۋ جونىندەگى ۆەدومستۆوارالىق كوميسسيا باسپا ءسوز قىزمەتى.

بريتانيا عالىمدارى اۋرۋحانالاردىڭ 200-گە جۋىق رەانيماسيا بولىمشەلەرىندە جاتقان 2 مىڭنان استام پاسيەنتكە  زەرتتەۋ جۇرگىزگەن. ناتيجەسىندە ناۋقاستاردا COVID-19 بەلگىلەرىن اسقىندىراتىن "نەاندەرتال" گەنىنىڭ بار ەكەنىن انىقتالعان.

سىرقات ادامداردىڭ گەنومدارىن ساۋ ادامداردىڭ گەنومدارىمەن سالىستىرا كەلە بىرنەشە ايىرماشىلىقتار بايقالعان.

ماسەلەن، يممۋندىق جاسۋشالاردى اگرەسسيۆتى ەتەتىن TYK2 گەندەرىندە، قابىنۋ كەزىندە ماڭىزدى ءرول اتقاراتىن DPP9-دا، ۆيرۋستىڭ رەپليكاسياسىنا كەدەرگى كەلتىرەتىن OAS جانە ينتەرفەروننىڭ وندىرىلۋىنە بايلانىستى IFNAR2 – كۇشتى ۆيرۋسقا قارسى مولەكۋلالارىندا وزگەشەلىكتەر بىلىنگەن.
⠀
گەنەتيكا سالاسىنداعى بۇل اشىلىم COVID-19-دىڭ بيولوگيالىق مەحانيزمدەرىن ەگجەي-تەگجەيلى زەرتتەۋگە مۇمكىندىك بەرەدى. وسىلايشا، عالىمدارعا ەندى ەمدەۋدىڭ جاڭا ادىستەرىن ۇسىنۋ وڭايىراق بولماق.