ەكىنشى دۇنيەجۇزلىك سوعىستا قازا تاپقان جاۋىنگەر ساپارعالي ەرباتىر ۇلىنىڭ سۇيەگى تۋعان جەرى اتىراۋعا 80 جىلدان كەيىن جەتكىزىلدى، دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ كوممۋنيكاسيا قىزمەتىنە سىلتەمە جاساپ.
"جەڭىس" ساياباعىندا وتكەن مارقۇمدى اقتىق ساپارعا شىعارىپ سالۋ راسىمىنە اتىراۋ وبلىسىنىڭ اكىمى ماحامبەت دوسمۇحامبەتوۆ قاتىستى.
ەكىنشى دۇنيەجۇزىلىك سوعىستا قازا تاپقان جاۋىنگەردى جينالعاندار ءبىر مينۋت ۇنسىزدىكپەن ەسكە العان سوڭ، ايماق باسشىسى ماحامبەت دوسمۇحامبەتوۆ ءسوز سويلەدى.
– بۇگىن جۇرەكتى ەلجىرەتەر ەرەكشە كۇن. تۋعان توپىراققا تاعى ءبىر ۇلى ورالدى. بۇل ەگەمەندىك پەن ەلدىكتىڭ ەرەك كورىنىسى. ەكىنشى دۇنيەجۇزىلىك سوعىس – ادامزات تاريحىنداعى ەڭ ءبىر قاندى قاساپ بولدى. وعان قازاق دالاسىنان جۇزدەگەن مىڭ جاۋىنگەر قاتىسسا، اتىراۋدان دا مىڭداعان ادام اتتانعان ەدى. سول سويقاندا قانشاما ازاماتتارىمىز قازا تاۋىپ، سۇيەكتەرى جات جەردە قالدى. سوعىس دالاسىنان ورالماعان بوزداقتاردىڭ ءبىرى – باقسايلىق ساپارعالي مۇقاتوۆ اتامىز بولاتىن. ارادا 80 جىلدان استام ۋاقىت وتكەندە مارقۇمنىڭ سۇيەگى تۋعان جەر توپىراعىنا جەتكىزىلدى. ساپارعالي ەرباتىر ۇلىنىڭ رۋحى ەندى تۋعان جەردە تىنىشتىق تابادى. ادامزات سان سوعىستى باستان وتكەرىپ، ادام بالاسى تاريحىندا نەبىر زۇلماتتى كوردى. بەيبىتشىلىكتى باستى ۇستانىمىنا اينالعان قازاقستان الەمگە وزىندىك ۇلگى كورسەتۋدە. سوناۋ قيىردا قالعان باتىردىڭ سۇيەگى ارادا جىلدار وتكەندە تۋعان جەردىڭ قوينىنا تاپسىرىلايىن دەپ وتىر. بۇل – ءتاۋ ەتەر تاۋەلسىزدىكتىڭ ارقاسى. تاۋەلسىزدىگىمىز بەن تىنىشتىعىمىز ماڭگىلىك سالتانات قۇرسىن، – دەدى ءوڭىر باسشىسى.
جاۋىنگەردى اقتىق ساپارعا شىعارىپ سالۋ راسىمىنە ساپارعالي ەرباتىر ۇلىنىڭ ۇرپاقتارىمەن قاتار، باتىرعا قۇرمەت كورسەتۋگە كەلگەن ءبىر توپ اتىراۋلىق قاتىسى.
باتىردىڭ سۇيەگىنىڭ تۋعان جەرگە ورالۋىنا تەك اتىراۋدىڭ عانا ەمەس، رەسەي فەدەراسياسىنىڭ "پەرەپراۆا" ىزدەۋ وتريادىنىڭ كومانديرى ناتاليا ماكسيموۆا، پاۆلوداردىڭ "مايدان جولى" ىزدەۋ وتريادىنىڭ كومانديرى الەكساندر شيتوۆ، اتىراۋ وبلىستىق "جاڭعىرۋ جولى" رەسپۋبليكالىق جاستار قوزعالىسىنىڭ مۇشەسى قۋانىش يۋسۋپوۆ جانە ەلىمىزدىڭ باسقا وڭىرلەرىنەن دە بەلسەندى ازاماتتار اتسالىسقان.
ايدىن كاكيموۆ
