ەرىكتىلەر – ءبىزدىڭ زامانىمىزدىڭ ناعىز باتىرلارى. ولار وزدەرىن قوعامعا جانى اشيتىن ازاماتتار، جاڭاشىلدار جانە مەملەكەتتىڭ سەنىمدى سەرىكتەستەرى رەتىندە كورسەتىپ، حالىقتىڭ وسال توپتارىمەن جۇمىس جاساۋدا. «جەسىرىن قاڭعىتپاعان، جەتىمىن جىلاتپاعان» دارحان ەلدىڭ قانىنا قايىرىمدىق جاساۋ ءىسى بىتە قايناسقان. قازاق قاشاندا سۇرىنگەنگە دەمەۋ، سۇيەنگەنگە تىرەۋ بولعان. بۇل ءاسىلى حالىقتىڭ تەكتىلىگىمەن تىكەلەي بايلانىستى بولسا كەرەك. اتامزاماننان باۋىرىن جۇرتتا قالدىرىپ، جۇتقا تاستاماعان بابالار ۇستانىمى بۇگىنگە دەيىن جالعاسىپ كەلەدى. زامانا وزگەرسەدە ادامزات كىسىلىك كەلبەتىن جوعالتا قويمادى. ونىسى ەلىم دەگەن ەرلەردىڭ «ءار قازاق - مەنىڭ جالعىزىم» دەگەن ۇستانىمدى ۇستانىپ، قىسىل-تاياڭ ساتتە قول ۇشىن سوزعاندىعىنان كورىنىس تاپسا كەرەكتى.
ءتىپتى ەل پرەزيدەنتى قاسىم-جومارت توقايەۆتا بىر-بىرىمىزگە دەگەن باۋىرمالدىق سەزىمىنىڭ وتىن وشىرمەيىك دەپ، ۆولونتەرلىك قوزعالىستى دامىتۋ ماقساتىندا «2020 جىل – ۆولونتەرلار جىلى» دەپ جاريالادى.
اتالعان باستامانى قولداعاندار سانى ەسەپسىز بولدى. وعان دالەل، ءوڭىردىڭ ءار تۇكپىرىنەن وزگەنىڭ مۇڭ-مۇقتاجىنا بەي-جاي قارامايتىن ازاماتتاردىڭ باس كوتەرۋى. جاسى مەن جاسامىسى كۇش بىرىكتىرىپ، ارنايى قايىرىمدىلىق قورىن قۇرىپ، كەيبىرى جەكەلەي قول ۇشىن سوزىپ، كومەكتەسىپ جاتتى. سان قيلى تاعدىرلارعا كوز جۇمىپ قاراۋ مۇمكىن ەمەستىگىن تۇسىنگەن ەرەك جاندار جانىن سالدى، بارىن ايامادى. وسىلايشا ولار تەڭىزدىڭ تامشىسىنداي بولسادا ءوز ۇلەستەرىن قوستى.
"عۇلاما اباي "ادامزاتتىڭ بارلىعىن ءسۇي باۋىرىم "دەپ بارشامىزعا وسيەت قالدىردى. ۆولونتەر بولۋ - جۇرەكتىڭ ءىسى، ياعني شىنايى نيەتتىڭ كورىنىسى. سەندەر قولعا العان جۇمىستاردىڭ بارلىعى ەرىكتىلىكتىڭ جارقىن ۇلگىسى بولارىنا كۇمانىم جوق. مەن ۆولونتەر جىلى اياسىندا ەڭ الدىمەن ەلىمىزدىڭ جاستارىنا زور سەنىم ارتامىن. ءاردايىم ابىرويلى، ءارى تابىستى بولىڭىزدار"، - دەگەن ەدى قاسىم-جومارت كەمەل ۇلى.
الماتى وبلىسىندا دا نەبىر ۆولونتەرلىك قوزعالىستار بولىپ،شىن مۇقتاجادارعا ماتەريالدىق جانە مورالدىق تۇرعىدان قولداۋ كورسەتىلدى.
جۇدىرىقتاي جۇرەكتەرىنە بار الاشتى سىيعىزعان ءمارت ازاماتتار بۇل ءىستى اتاق، داڭق ءۇشىن جاسامادى. ولار تەك، ارحارداي اۋىپ جۇرگەن ادام بالاسىنىڭ ارقا سۇيۋىنە مۇمكىندىك بەردى. دەگەنمەن، وبلىس باسشىلىعى مۇنداي كەڭ جۇرەكتىڭ يەلەرىن ەسكەرۋسىز قالدىرماۋدى ءجون كورىپ، اتقارعان ىستەرىنە قاراي لايىقتى قۇرمەتىن كورسەتتى.
وسىعان وراي، جەتىسۋ وڭىرىندە ەلباسى ن.ءا. نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىنىڭ پراگماتيزم مەن باسەكەگە قابىلەتتىلىك باعىتتارىن جانە مەملەكەت باسشىسىنىڭ جارلىعىن ىسكە اسىرۋ، ەرىكتى قىزمەتكە ازاماتتاردى، اسىرەسە، جاستاردى تارتا وتىرىپ، بەلسەندى ومىرلىك ۇستانىمىن قالىپتاستىرۋدى نىساناعا الا وتىرىپ، ەرىكتىلەر اراسىندا وبلىس اكىمىنىڭ «ASYL JÚREK» سىيلىعى سالتاناتتى تۇردە تابىس ەتىلدى. شارادا 8 اتالىم بويىنشا ادال جاندار ارداقتالدى.
«ASYL JÚREK» پرەمياسىندا «مۇراگەر» ەتنو ۆولونتەرلىك نوميناسياسى الەكساندر سون لايىق دەپ تانىلدى. ال، الەۋمەتتىك ەرىكتى رەتىندە «جان جىلۋى» اتالىمىنان امانگەلدى تولاميسوۆ ماراپاتقا يە بولدى. ادامزاتتان بولەك، تابيعات اناعادا قۇرمەتپەن قاراۋ ۇلكۋەن جاۋاپكەرشىلىك پەن اسا مەيىرىمدىلىكتىڭ ارقاسىندا ورىن الادى. بۇل رەتتە ەكو ۆولونتەرلىك جەڭىمپازى بولىپ سەرگەي تاندەيەۆ تاڭدالدى.
جانۋارلارعا قامقورلىق كورسەتكەندەردە تۇعىرلى تۇعىردان كورىندى. –ۆەرونيكا گۋزەنكو «حايۋاناتتار قورعاۋشىسى» زوو ۆولونتەرلىك اتالىمىن جەڭىپ الدى. ەرىكتىلەردىڭ ىشىندە «كوزسىز ەرلىك» نوميناسياسىن – وكسانا ورالباي قىزى قانجىعاسىنا بايلادى. « بىلگەنىمەن بولىسكەن» ونلاين ۆولونتەرلىك جەڭىمپازى اليشەر ەرمەك ۇلى بولسا، «شيپاگەر» مەديسينا ەرىكتىلىگى جۇلدەسى المابەك باتكالبەكوۆكە بۇيىردى. « حالىق جاناشىرى» دەپ حۋمار حالىس ۇلى تانىلدى. ايتا كەتەيىك بۇل دوداعا 100 گە جۋىق ءوتىنىپ كەلىپ تۇسكەن. ارنايى سىيلىققا يە بولعاندار، جۇزدەن جۇيرىك، مىڭنان تۇلپار شىققاندار.
شارا تەك، جەڭىمپازداردى ماراپاتتاۋمەن شەكتەلمەدى. قايىرىمدى جاندار ادەتتەرىنەن جاڭىلماي تاعى ءبىر وتباسىنى قۋانىشقا كەنەلتتى. ولار 5 بالانىڭ اناسى، اقمارال ناۋرىزبەكوۆا باسپانا كىلتىن تابىس ەتتى. ءۇيدىڭ كىلتىن "ونەر قىراندارى" ءازىل-سىقاق تەاترىنىڭ اكتەرى ماديار سەرىكبايەۆ بەردى.
جالعىزباستى انانىڭ قونىس تويىن تويلاۋى "1000 تەڭگەگە باسپانا" جوباسىنىڭ اياسىندا جۇزەگە اسىپ وتىر. بۇل بيىلعى جىلى "حارەكەت" قورى تاپسىرعان 366 -شى ءۇي.
"5 قىز تاربيەلەپ وتىرمىن. جولداسىم جول اپاتىنان قايتىس بولعان. 2016 جىلدا بەرى ءۇي كەزەگىندە تۇرمىن. بۇگىن اراعا 4 جىل سالىپ ءۇيلى بولدىم. باسپانانى ءوزىم تۇراتىن كوكسۋ اۋدانى، باقتىباي اۋىلىنان الىپ بەردى. ەرىكتى امانگەلدى عابدىلكارىمۇلىنا، ماديار سەرىكبايەۆقا جانە "حارەكەت" قايىرىمدىلىق قورىنىڭ باسشىسى گۇلميرا مۇقانقىزىنا العىسىم شەكسىز"،- دەدى اقمارال نۇرتازا قىزى.
سونداي-اق، ماراپاتتاۋ بارىسىندا «Asyl Júrek: كوزسىز ەرلىك» نوميناسياسىنىڭ جەڭىمپازى، «Lider.kz» ەرىكتىلەر كلۋبىنىڭ مۇشەسى وكسانا امىرعالييەۆا ءوزىنىڭ اقشالاي سەرتيفيكاتىن كوپ جىلدار بويى مۇقتاج وتباسىلارعا كومەكتەسىپ، ءىز - ءتۇزسىز جوعالعان ادامداردى ىزدەستىرۋگە قاتىسقان ۇشتوبە قالاسىنىڭ ەرىكتىسى – ارىپتەسى ەكاتەرينا سەرەديناعا بەردى. سەبەبى، تەك شەتەلدە عانا جۇزەگە اسىرىلاتىن ەكاتەرينانىڭ ەمدەلۋىنە 5 مىڭ ەۋرو قاجەت.
ەرىكتى بولۋ – ەرلىك. قوعامنىڭ كەتىگىن جاماۋعا جۇدىرىقتاي جۇمىلا قارەكەت ەتكەن اتپالداي ازاماتتاردىڭ ەڭبەگى ەرەن. بەيبىن كۇندە بىر-بىرىمىزگە دەگەن مەيىرىم ساۋلەسى سونبەسىن.
پىكىر قالدىرۋ