ىشكى ىستەر مينيسترلىگىنىڭ الماتى قالالىق اكادەمياسىندا وزىنە قول جۇمساعان 19 جاستاعى سالامات وتەگەنوۆتىڭ اناسى بەكزات يمانعالييەۆا ۇلىنىڭ ءولىمى تۋرالى باسپا ءسوز بەتىندە ايتقاننان كەيىن وزىنە باسقا اكادەميادا وقيتىن كۋرسانتتارىڭ اتا-انالارى حابارلاسا باستاعانىن جەتكىزدى. قارا جامىلعان ايەلدىڭ ايتۋىنشا، حات الماسىپ جاتقان اتا-انالار وقۋ ورنىنداعى قىسىم تۋرالى ءسوز قوزعاعان، دەپ حابارلادى

"ۋرالسكايا نەدەليا"  باسىلىمى.

– مەنىڭ ۇلىم تۋرالى ماقالا جاريالانعاننان كەيىن ماعان ءىىم اكادەمياسىنداعى كۋرسانتتاردىڭ تاعى ەكى اتا-اناسى what'sApp-قا جازدى. ولار بالالارىنىڭ قاي اكادەميادا وقيتىنىن ايتپادى، ءبىراق جازعانداردىڭ ءبىرى بالاسىنىڭ قىسىم سالدارىنان ءىىم اكادەمياسىنان شىعىپ كەتكەنىن جەتكىزدى. ەكىنشىدەن، ونىڭ بالاسى وقىپ جاتقان اكادەميادا دا كۋرسانتتاردان قاراجات جيناۋ فاكتىلەرى بولعانىن ايتتى، – دەدى ول.

بەكزات يمانعالييەۆاعا جازعان اتا-انالار ءاتى-جونىن اتاماۋدى سۇراپ، جۋرناليستەرمەن سويلەسۋگە كەلىسىم بەرمەگەن.

ەستەرىڭىزگە سالا كەتەيىك، 13 جەلتوقساندا ءىىم الماتى اكادەمياسىنىڭ كۋرسانتى 19 جاستاعى سالامات وتەگەنوۆ اسحانانىڭ قوسالقى بولمەسىندە اسىلىپ قالعان. مارقۇمنىڭ تۋىستارى جىگىتتىڭ ءىىم الماتى اكادەمياسىندا وقۋىنىڭ تولىق تاريحىن ايتىپ، مەكەمە قابىرعاسىندا ۇنەمى اقشا جيناۋ دەرەكتەرى بولعانىن مالىمدەدى. سالامات قايتىس بولعانعا دەيىن ۇلكەن اعاسىنان اقشا سۇراعان. 

ماقالا جاريالانعاننان كەيىن كەلەسى كۇنى ءىىم الماتى اكادەمياسىنىڭ باستىعى ءومىرباي سمايىلوۆ قىزمەتىنەن بوساتىلدى. ونىمەن بىرگە اتقارىپ وتىرعان قىزمەتتەرىنەن تاعى 6 قىزمەتكەر بوساتىلدى، ال وقۋ ورنىنا تەكسەرۋمەن مينيسترلىكتىڭ ىشكى اۋديت، كادر ساياساتى جانە وزىندىك قاۋىپسىزدىك دەپارتامەنتتەرىنىڭ قىزمەتكەرلەرى جىبەرىلدى. كەلەسى جىلدىڭ باسىنان باستاپ ءىىم-نىڭ بارلىق وقۋ ورىندارىندا وسىنداي تەكسەرۋ جۇرگىزىلمەك.