بيىلدان باستاپ ەلىمىزدەگى 1 ميلليونعا جۋىق ادام زەينەتاقى قورىنداعى جيناقتارىن پايدالانا الادى، دەپ حابارلادى «حابار 24».
بۇل رەتتە «وتباسى بانك» ءبىرىڭعاي وپەراتور قىزمەتىن اتقارادى. قاراجاتتى پايدالانۋ ءۇشىن زەينەتاقى قورىنىڭ سالىمشىلارى ەڭ الدىمەن ءوز جيناعى تۋرالى مالىمەتتى بىلۋىگە ءتيىس. ونى ەلەكتروندىق ۇكىمەت پورتالى نەمەسە موبيلدىك قوسىمشالار ارقىلى انىقتاۋعا بولادى. وسى باستاما اياسىندا ءبىرىڭعاي جيناقتاۋشى زەينەتاقى قورى 2،4 ترلن تەڭگەنى تۇرعىن ءۇي الۋ، ەمدەلۋ جانە كاپيتالدى باسقارۋ كومپانيالارىنا بەرۋدى جوسپارلاپ وتىر.
ايتا كەتەرلىگى، سيرەك كەزدەسەتىن اۋرۋلاردان ەمدەلۋ، دياگنوستيكادان ءوتۋ، ستوماتولوگيالىق ەمگە دە قارجىڭىزدى الا الاسىز. ونكولوگيالىق اۋرۋدان ەمدەلۋ كەرەك بولسا، وندا دا ارنايى تەراپيالارعا قارجى بولىنەدى. سونىمەن قاتار زەينەتكە شىققان ادامدار دا شەكتى سومادان اسقان قارجىعا قول جەتكىزە الادى. مۇنداي ازاماتتار سانى ەل بويىنشا 170 مىڭعا جۋىقتايدى. ەڭ باستىسى، زەينەتاقى قورىنداعى ەسەپشوتتا شەكتى سوما قالۋى شارت. شەكتى سوما ءار جاستاعى ادام ءۇشىن ءارتۇرلى. سونداي-اق جيناقتىڭ ءبىر بولىگىن العاندا بيۋدجەتكە تابىس سالىعى تولەنۋگە ءتيىس.
ءلاززات يبراگيموۆا «قازاقستاننىڭ تۇرعىن ءۇي قۇرىلىس جيناق بانكى «وتباسى بانك» اق باسقارما ءتوراعاسى:
- پاتەر العاندا ەكىنشى نارىقتان الۋعا بولادى. زاسترويششيكتەن دە. ەكىنشى سۇراققا كەلگەندە تۋىستارىنا ءوتىنىش جازىپ، ولاردىڭ جيناقتارىن الۋعا رۇقسات بولادى. سوسىن قۇجاتتاردى جىبەرۋ كەرەك. ءبىز ونى تەكسەرەمىز.
ءوتىنىشتى ارنايى ونلاين پلاتفورمادا ەلەكتروندى نەگىزدە قالدىرۋعا بولادى. ول ءۇشىن ەلەكتروندى سيفرلىق قولتاڭبا قاجەت. «وتباسى بانكىندە» ارنايى جاڭا ەسەپشوت اشىلادى. رەسمي رەسۋرستا قارجىنى قولدانۋ ماقساتى تاڭدالىپ، ءتيىستى قۇجاتتار جۇكتەلەدى. 45 كۇننىڭ ىشىندە سالىمشىعا جاۋاپ كەلەدى.
پىكىر قالدىرۋ