نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترىندا ف. دوستويەۆسكييدىڭ "ۇلدار" دراماسىنىڭ پرەمەراسى ءوتتى. بۇل تۋرالى تەاتردىڭ باسپا ءسوز قىزمەتى حابارلادى. 

دراما جازۋشىنىڭ 200 جىلدىعىنا ورايلاستىرىلىپ، "اعايىندى كارامازوۆتار" رومانىنىڭ جەلىسىمەن ساحنالاندى. قويۋشى رەجيسسەرى – ەرنازار جاڭاتىلەك.

"ۇلدار" – 1878-1880 جىلدارى جازىلعان "اعايىندى كارامازوۆتار" رومانىنداعى IV ءبولىمنىڭ ونىنشى كىتابى. بۇل تۋىندىدا ادام ءومىرىنىڭ نەگىزگى ماسەلەلەرى العا قويىلعان. ءار ادامنىڭ ءومىرى مەن بۇكىل ادامزات تاريحىنىڭ ءمانى، ادام بولمىسىنىڭ مورالدىق جانە رۋحاني نەگىزدەرى تۋرالى ماسەلەلەر قاراستىرىلادى.

– ءبىزدىڭ مۋزىكالىق جاس كورەرمەن تەاترىنىڭ 2021 جىلداعى العاشقى پرەمەراسى ف.دوستويەۆسكييدىڭ "ۇلدار" سپەكتاكلىمەن شىمىلدىعىن تۇرگەلى تۇر. ەلىمىزدىڭ شىعىس وڭىرىندە ءىزى قالعان، شوقاننىڭ دوسى بولعان قالامگەردىڭ تۋىندىلارى قازاق تەاترىندا بۇرىن-سوڭدى قويىلماعان. دوستويەۆسكيي شىعارمالارى قازاق كورەرمەنىنە العاش رەت جول تارتىپ وتىر. رەجيسسەردىڭ دە بۇل دەبيۋتتىك قويىلىمى. ءبىر اتاپ وتەرلىگى، روماننىڭ ءتورتىنشى ءبولىمىنىڭ 10-كىتابى "ۇلدار" دەپ اتالادى. درامانىڭ نەگىزىنە ءدال وسى تاراۋ الىنعان. ال قازاق تىلىنە اينۇر وماش ءتارجىمالادى، – دەدى تەاتر ديرەكتورى، قازاقستاننىڭ ەڭبەك سىڭىرگەن قايراتكەرى اسحات ماەميروۆ.

اتالمىش قويىلىم جاسوسپىرىمدەر ومىرىنەن كورىنىس بەرەدى. ولاردىڭ ادامعا، قوعامعا، قورشاعان ورتاعا دەگەن كوزقاراستارى، كۇندەلىكتى ومىردەگى بىر-بىرىمەن قارىم-قاتىناستارى باياندالىپ، ونىڭ ىشىندە دوستىق ماسەلەسىنە اسا ءمان بەرىلگەن. بۇل ءار زاماندا وزەكتىلىككە يە تاقىرىپ. ويتكەنى ءقازىر دە، بۇرىن دا جاسوسپىرىمدەر ادال دوستىقتىڭ يەسى نەمەسە، كەرىسىنشە، امال دوستىقتىڭ قۇربانى بولىپ جاتادى. ول بالالىق پسيحولوگيانىڭ شەڭبەرى بولعانىمەن، جاسوسپىرىمدەر عانا ەمەس، ەرەسەك ادامدارعا دا وي سالاتىن كوركەم شەشىمدەرگە قۇرىلعان قويىلىم.

درامادا گيمنازياداعى بىرنەشە كادەت وقۋشىلارىنىڭ ءومىرىن كورسەتە وتىرا، الەكسەي كارامازوۆتىڭ كەلبەتىنە بارىنشا شولۋ جاسالعان. الەكسەي كارامازوۆ – ءدىن قىزمەتكەرى، اعايىندىلاردىڭ ىشىندە ەڭ مەيىرىمدى، ادامگەرشىلىك قاسيەتى مول، اقىلگوي جان رەتىندە سيپاتتالادى. الەكسەي كارامازوۆتىڭ ءرولىن سومداعان تەاترىمىزدىڭ جاس اكتەرى – ابزال اراپوۆ.

قويىلىمداعى نەگىزگى كەيىپكەردىڭ ءبىرى – يليۋشا سنەگيريەۆ. يليۋشا نازىك جاندى مومىن بوزبالا رەتىندە سۋرەتتەلەدى. كوپتەگەن قيىندىقتاردى باسىنان وتكىزەدى. ول زامانداستارىنا ەرىپ بالالىقپەن اۋلاداعى ءيتتىڭ بىرىنە ناننىڭ جۇمساعىنا ينە قاداپ بەرەدى. سول ءيتتىڭ قينالعانىن كورگەن ول ىستەگەن ىسىنە وكىنىپ، قۇسالىقپەن قۇرت اۋرۋىنا شالدىعىپ ومىردەن وتەدى. ايانىشتى تاعدىردى تەاترىمىزدىڭ جاس اكتەرى – ەلامان يمانبايەۆ شىنايى جەتكىزە ءبىلدى.

ال ەكى سىنىپ جوعارى وقيتىن بوزبالا – نيكولاي كراسوتكيننىڭ ءرولىن سومداعان تەاتر اكتەرى، "دارىن" مەملەكەتتىك جاستار سىيلىعىنىڭ لاۋرەاتى اسىلحان تولەپوۆ. دراما سيۋجەتى بويىنشا نيكولاي باسىندا بالالارمەن باستەسىپ، پويىزدىڭ جولىنا جاتىپ، ءوزىنىڭ وجەتتىگىن دالەلدەگىسى كەلەدى. ءبىراق، بۇل ءىسىنىڭ دۇرىس ەمەس ەكەندىگىن كورسەتىپ، ونى ەشكىمگە ايتپاۋىن، وسى جەردە قالۋىن سۇراپ، باستەسكەن بالالاردىڭ سەرتىن الادى. ول جاس بولسا دا ءوزىنىڭ اقىلدىلىعىمەن ءوز قاتارىنان دارالانىپ، وزگەشەلەنەدى.

سونىمەن قاتار سپەكتاكلدەگى ەڭ ايقىن بەينەلەر – كادەت وقۋشىلارى. ءارقايسىسىنىڭ بويىنشا وزىندىك مىنەز قالىپتاسقان. ولار بالالىقتىڭ ىزىنە ەرىپ، يليۋشانى ءبىراز رەنجىتىپ، قاتىگەزدىك تانىتتى. الايدا سيۋجەت سوڭىندا جاسوسپىرىمدەر ءوز قاتەلىكتەرىن ءتۇسىنىپ، يليۋشادان كەشىرىم سۇرايدى. كادەت وقۋشىلارى رولىندە – شالقار مۇرالتاي، ەرنار مۇحامبەت، ازامات بولاتوۆ، جاسۇلان ابدراحمان، يمانعالي ءاقادىل، ماعجان ومار، بيبول بايعارايەۆ بولدى.

"ۇلدار" دراماسىنىڭ پرەمەراسىن وتكىزۋ بارىسىندا كورەرمەن سانى شەكتەلىپ، بەكىتىلگەن بارلىق سانيتارلىق نورمالار ساقتالدى.