Qumash تەلەگرامم كانالىندا شىمكەنت قالاسىنىڭ تۇرعىنى ءاليا مامۋتوۆانىڭ ق ر پرەزيدەنتى قاسىم-جومارت توقايەۆقا ۆيدەو ءوتىنىشى جاريالاندى. وندا ايەل قىزىنا قاتىستى زورلىق جاساعان ادامداردى جازالاۋدى سۇرايدى.

ءاليا مامۋتوۆا ءۇش بالانى تاربيەلەپ وتىر. ءۇش بالانىڭ ءبىرى 1 توپتاعى مۇگەدەك. تولعاناي ەسىمدى قىزى 1992 جىلى دۇنيەگە كەلگەن. تۋماسىنان مۇگەدەك. ۋاقىت وتە كەلە تالما اۋرۋى قوسىلعان. جالعىز باستى انا وتباسىنىڭ جالعىز اسىراۋشىسى بولعاندىقتان 2011 جىلى قىزى تولعانايدى №2 مۇگەدەكتەر ينتەرناتىنا وتكىزۋگە ءماجبۇر بولعان.

2020 جىلى ول قىزىن كورۋگە بارعاندا قىزى مازاسىزدانىپ تۇرعانىن ايتادى.

 «نەگە مازاڭ جوق دەپ سۇراسام، «ماعان وسى جازدا ءبىر اعاي مەن اپاي دارىگەر ەندى ۋكول سالمايمىز، ءبىر-اق رەت سپيرال سالامىز بولدى» دەپ سۇق ساۋساعىمەن كورسەتتى. كەزەكشىدەن باسشىلاردىڭ ءبىرىن شاقىرۋىن سۇراپ ەدىم جەكسەنبى كۇنى باسشىلاردان ەشكىم بولمايتىنىن ايتىپ گۇلميرا ەسىمدى پسيحولوگتى شاقىردى. پسيحولوگتان  سپيرال تۋرالى سۇراعانىمدا، بارلىعىن راستادى. بۇدان بولەك 43 قىزعا سالىنعانىن دا ايتتى. «ەگەر سپيرال سالماساق بۇلار ەكى قابات بولىپ قالا بەرەدى» دەگەندە  ۇستىمە مۇزداي سۋدى قۇيىپ جىبەرگەندەي بولدى»، - دەپ ەسكە الدى تولعانايدىڭ اناسى.

«ينتەرناتتا جاتقانداردىڭ بارلىعى ءبىرىنشى توپ  ەكىنشى توپ مۇگەدەگى. بۇلار كىمننەن جانە قالاي ەكى قابات بولىپ قالادى؟ نەگە بۇلار جاسىرىن سپيرال سالادى؟ نە ءۇشىن سالادى؟ ءبىز نەگە بىلمەيمىز؟ 43 قىزدىڭ اتا-اناسى دا بىلمەيدى. قىزىم ايتپاعاندا مەن دە بىلمەيتىن ەدىم»، - دەيدى ءاليا مامۋتوۆا.

شىمكەنت قالاسىنىڭ تۇرعىنى شاعىمدانباس بۇرىن بارنە كوز جەتكىزبەك بولعان. 2020 جىلدىڭ 9 قاراشاسىنان 19 قاراشاسىنا دەيىن قىزى تولعانايدى مەديسينالىق ورتالىققا اپارىپ تەكسەرتپەكشى بولعان. №2 ينتەرناتتىڭ ديرەكتور ورىنباسارىنان باستاپ، مەديسينا قىزمەتكەرلەرىنە دەيىن كارانتين ەكنەنىن ايتىپ، قىزىن ينتەرناتتان جىبەرمەگەن.

ءاليا مامۋتوۆا دەپارتامەنتكە بارعانىن ايتادى. وندا 13 ادامنان تۇراتىن كومياسسيا قۇرىلىپ، №2 ينتەرناتتا تەكسەرۋ جۇمىستارى جۇرگىزىلگەن. تەكسەرۋ ناتيجەسىندە 2011 جىلى تولعانايدىڭ كارتاسىندا «قىز» دەپ جازىلعانىن، ال 2012 جىلى «سپيرال سالىنعان» دەپ جازىلعانى انىقتالعان.

تولعانايدىڭ اناسى 19 قاراشادا شاعىم تۇسىرەدى. 2020 جىلدىڭ 21 قاراشاسىندا تەرگەۋ باستالعان. ءاليا مامۋتوۆانىڭ ايتۋىنشا، تەرگەۋ جۇرگىزىلىپ جاتقان جوق. ودان شۋ شىعارماۋىن دا سۇراعان.

«مەن بۇدان ارتىق شىداي المايمىن. وسى وقيعادان كەيىن ادامداردان سۇراستىرا باستادىم. وسىنداي مەكەمەلەردە مۇنداي سۇمدىقتار بولىپ كەلگەن. دالەلدەي الماعان ادامدار كوپ. مەن بۇل سۇمدىقتى، ايۋاندىقتى كورىپ تۇرىپ ۇندەمەي وتىرا المايمىن. كوشەدە ءيتتى تاياقپەن زورلاعان ادام سوتتالىپ جاتقاندا مەن نەگە مۇگەدەك قىزىمنىڭ ارىن قورعاي المايمىن. نەگە مۇگەدەككە وسىنداي ايۋاندىق ىستەيدى»، - دەدى ءاليا مامۋتوۆا.