ءۇندىستاننىڭ WION تەلەارناسى ددسۇ شەنەۋنىكتەرىنىڭ "كوروناۆيرۋس تۋرالى اقپاراتتى بولىسپەگەنى ءۇشىن قىتايدى ايىپتاعانى" دەلىنگەن قۇپيا اۋديوجازبا جاريالادى.
قاڭتاردا جازىلعان قۇپيا اۋديو فايلداردا قىتايدىڭ كوروناۆيرۋس تۋرالى ناقتى جانە قوسىمشا اقپارات بەرمەگەنى ايتىلادى.
اۋديودا دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) باسشىلارى دەلىنگەن ادامدار "پاندەميانىڭ العاشقى كۇندەرىندە بەيجىڭ كوروناۆيرۋس تۋرالى اقپاراتتى بولىسە المادى" دەپ قىتايدى جاسىرىن تۇردە سىنعا الدى.
تاسپادا دوكتور مايك راياندىكىنە ۇقساس داۋىس جۇڭگو اقپاراتتى جاسىرىپ، ۆيرۋستىڭ بۇكىل الەمگە تارالۋىنا جول بەرگەنىن ايتىپ، ايىپتايدى جانە پاندەميانى 2003 جىلعى SARS ەپيدەمياسىمەن سالىستىرادى.
جازبادا دوكتور رايان دەلىنگەن ادامنىڭ "بۇل – ءدال وسى سەناريي" دەگەن ءسوزى ەستىلەدى.
ول سونداي-اق بىلاي دەيدى: "قىتايدان جاڭا اقپاراتتار الۋعا تىرىسىپ جاتىرمىز ... سودان كەيىن، شۋ بولادى".
تاسپالاردا دوكتور رايان قىتايلىق دارىگەرلەردى ايىپتايدى، سەبەبى، ول كەزدە جۇڭگو دارىگەرلەرى "كوروناۆيرۋستىڭ ادامنان ادامعا جۇعۋى تۋرالى ناقتى دالەلدەر جوق" دەپ جاريالاعان.
دەگەنمەن، ددسۇ-نىڭ باس ديرەكتورى دوكتور تەدروس ادحانوم گەبرەسيەس بۇعان دەيىن قىتايدىڭ "اشىقتىققا دەگەن ۇمتىلىسىن سوزبەن ايتىپ جەتكىزۋ مۇمكىن ەمەس" دەگەن بولاتىن.
"ەگەر جازبالاردىڭ شىنايى ەكەنى دالەلدەنسە، بۇل – ددسۇ-نىڭ العاشقى كۇندەرى بەيجىڭنىڭ پروپاگانداسىن قولداعانىنا جانە ۆيرۋستىڭ قاۋىپتىلىگىن جاسىرعانىنا دالەل بولا الادى" دەپ جازدى باسىلىم.
بىلتىرعى جىلدىڭ 14 قاڭتارىندا ددسۇ جاريالاعان تۆيتتە ۆيرۋس تۋرالى جۇڭگو تىلىندەگى مالىمدەمەنىڭ ءدال ءوزى سول كۇيىندە قولدانىلعان.
تاعى ءبىر جازبادا ددسۇ-نىڭ كوروناۆيرۋس بويىنشا تەحنيكالىق جەتەكشىسى دوكتور ماريا ۆان كەرحوۆ بەيجىڭ بەرگەن "وتە از اقپاراتقا" شاعىمدانعان.
ول ددسۇ بەيجىڭنەن ناقتى مالىمەت الا الماعانىن ايتقان.
باسىلىم اقپاراتىنا سايكەس، دوكتور گالەا كومانداسى "رەسمي جانە بەيرەسمي تۇردە" ۆيرۋس تۋرالى اقپارات سۇراعانىن، اسىرەسە "سوڭعى جاعداي" تۋرالى، "باستالعان كۇنى" تۋرالى اقپارات الا الماعانىن ايتىپ، شاعىمدانادى.
پىكىر قالدىرۋ