– №90 مەكتەپ-گيمنازياسى قىركۇيەك ايىنىڭ باسىندا اشىلعان. ەربول ىرگەباي مەكتەپتى 5 ايعا جۋىق باسقارىپ، وكىنىشكە قاراي، ومىردەن وزدى. ول ءوزى ابايتانۋشى، الاشتانۋشى ەدى. ماقساتى – ۇلتتىق باعىتتا جۇمىس ىستەۋ بولاتىن. سول ءىسىن سوڭىنا دەيىن جەتكىزەمىز دەپ ويلايمىن. مەكتەپتە ۇيىمداستىرىلعان كوپتەگەن شارالارى اياقسىز قالمايدى، – دەيدى اياتجان احمەتجان ۇلى.

ونىڭ ايتۋىنشا، مەكتەپ-گيمنازيادا ەربول ىرگەباي اتىنداعى كابينەت اشىلادى دەپ جوسپارلانىپ وتىر.

– مەكتەپ باستاپقىدا "ۇلتتىق گيمنازيا" دەپ اشىلعان. "ۇلتتىق گيمنازيا" دەگەن اتاۋدىڭ ءوزى ۇلكەن مىندەت. ءقازىر ءبىلىم ورداسىنىڭ باعىت-باعدارىمەن تانىسۋ جۇمىستارىن جۇرگىزىپ جاتىرمىن. ەندى مەكتەپتىڭ ابىرويىن جەتىلدىرۋ ءۇشىن جۇيەلى جوسپار قۇرامىز، – دەيدى ۇستاز.

احمەتجان ۇلى ۇلتتىق مەكتەپتىڭ ماقساتى – الاشتىڭ زاماناۋي مەكتەبىن قالىپتاستىرۋ ەكەنىن اتاپ ءوتتى.

– ۇلتتىق مەكتەپتىڭ ماقساتى – الاش ارىستارى نەگىزىن سالىپ كەتكەن ۇلتتىق پەداگوگيكانى قالىپتاستىرۋ. كەشەگى احمەتتىڭ، ماعجاننىڭ يدەيالارىن بۇگىنگى ۇرپاقتىڭ ساناسىنا، تاربيەسىنە، بىلىمىنە پايدالانۋ. سول باعىتتا الاشتىڭ بۇگىنگى زاماناۋي مەكتەبىن قالىپتاستىرۋ.

ۇلتتىق مەكتەپتىڭ جالپى باعدارلاماسى – بىرەۋ، مەملەكەتتىك ستاندارت – بىرەۋ. ءبىراق ۇلتتىق مەكتەپتە ءار دۇنيەگە ۇلتتىق رەڭك بەرۋگە بولادى. قوسىمشا ۇلتتىق ويىندار، ۇلتتىق تالىم-تاربيەگە نەگىزدەلگەن ساباقتار وتكىزۋ، مەكتەپتەگى ءاربىر ءىس-شاراعا ۇلتتىق كوزقاراسپەن قاراۋ ماسەلەسى قاراستىرىلادى.

الەمدە فين مەكتەبى، جاپون مەكتەبى، اعىلشىن مەكتەبى دەگەن ۇعىمدار بار. ال نەگە قازاق وقۋ-اعارتۋىنان وسىنداي ۇلتتىق مەكتەپ جاساۋعا بولمايدى؟! ارينە، بولادى. ول ءبىر ەرەكشە ءپاندى كىرگىزۋمەن ەمەس، مەكتەپتەگى ءار ماسەلەگە ۇلتتىق كوزقاراسپەن قاراۋمەن شەشىلەدى.

نۇر-سۇلتان قالاسىنداعى №51 مەكتەپتى 5 ايدان اسا باسقاردىم. وعان مۇستافا شوقايدىڭ اتىن بەرۋ ءۇشىن جۇمىس ىستەدىم. ەندى جاڭا بارعان ديرەكتور سول ءىستى اياعىنا دەيىن اپارادى دەپ سەنەمىن، – دەيدى ول.

ول جاڭا مەكتەپتە دە ءوز باعىتىنان، ۇستانىمىنان اينىماي، ۇلتتىق ءبىلىم بەرۋ نەگىزىندە جۇمىس ىستەيتىنىن جەتكىزدى.

– ماقساتىم – قازاقى ءيسى اڭقىعان تازا ۇلتتىق باعىتتاعى مەكتەپ قالىپتاستىرۋ. سول باعىتتان ەشقاشان اينىمايمىن. ءبىلىمى، تاربيەسى قازاقى، ءارى زاماناۋي مەكتەپ جاساپ شىعارامىز، – دەپ ءسوزىن اياقتادى ۇستاز.

اياتجان احمەتجان 1986 جىلى 18 شىلدەدە جۇڭگو حالىق رەسپۋبليكاسى، شىڭجاي-ۇيعىر اۆتونوميالىق اۋدانى، مۇڭعۇلكۇرە اۋدانىندا دۇنيەگە كەلگەن.

2006 جىلى قازاقستانعا ورالدى.

2007-2011 جىلدارى ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى جاراتىلىستانۋ عىلىمدارى فاكۋلتەتىندە حيميا ماماندىعى بويىنشا وقىدى.

2013-2015 جىلدارى حيميا عىلىمدارىنىڭ ماگيسترى دارەجەسىن الدى.

حيميا عىلىمدارى بويىنشا PhD دوكتورانت.