يلون ماسك رەسەي پرەزيدەنتى ۆلاديمير ءپۋتيندى Clubhouse-تا سۇحباتتاسۋعا شاقىرعان سوڭ، كرەمل بۇل ۇسىنىسقا قىزىعاتىنىن مالىمدەدى.
ءپۋتيننىڭ وكىلى دميتريي پەسكوۆ يلون ماسكتىڭ رەسەي پرەزيدەنتىمەن Clubhouse قوسىمشاسىندا سويلەسۋ تۋرالى ۇسىنىسىن قاراستىرىپ جاتقانىن مالىمدەدى.
"بۇل، ارينە، وتە قىزىقتى ۇسىنىس" دەدى كرەملدىڭ باسپا ءسوز حاتشىسى دميتريي پەسكوۆ مەملەكەتتىك ينتەرفاكس اگەنتتىگىنە.
پەسكوۆ دۇيسەنبىدە ءپۋتيننىڭ كرەملدىڭ الەۋمەتتىك جەلىلەرىندەگى بىردە-بىر اككاۋنتىنا قاتىسى جوق ەكەنىن ايتتى. سوندىقتان كرەمل ۇسىنىستى قابىلداۋدان بۇرىن سۇحبات تۋرالى ويلانۋ كەرەك ەكەنىن اتاپ ءوتتى.
"ءبىز الدىمەن مۇنى انىقتاعىمىز كەلەدى. سىزدەر پرەزيدەنت پۋتين الەۋمەتتىك جەلىلەردى تىكەلەي قولدانبايتىنىن بىلەسىزدەر" دەدى پەسكوۆ جۋرناليستەرگە.
"ءبىز بۇل نەنى بىلدىرەتىنىن، وندا نە ۇسىنىلاتىنىن ءتۇسىنۋىمىز كەرەك. الدىمەن ءبىز مۇنىڭ بارلىعىن تەكسەرىپ، سودان كەيىن جاۋاپ قايتارامىز" دەدى ول.
ماسكتىڭ شاقىرۋىن ونىڭ كوپتەگەن جازىلۋشالىرى Twitter-دە قۇپتادى، الايدا، سىناۋشىلار دا بولدى.
قازىرگى ۋاقىتتا رەسەيلىكتەر دەموكراتيالىق وپپوزيسيا جەتەكشىسى الەكسەي ناۆالنىيدىڭ ۇستالۋىنا نارازىلىق ءبىلدىرىپ، پۋتينگە اشىق قارسى شىعۋدا.
ال، ماسكتىڭ سەنبىدەگى تۆيتىنە جاۋاپ بەرە وتىرىپ، ناۆالنىيدىڭ سىبايلاس جەمقورلىققا قارسى ناۋقانىنىڭ جەتەكشىسى رۋسلان شاۆەددينوۆ ءوزىنىڭ Twitter پاراقشاسىندا "برات، ونى مارسقا وزىڭمەن بىرگە الىپ كەت" دەپ ماسكتىڭ SpaceX كومپانياسىنىڭ 2026 جىلعا دەيىن مارسقا ادامداردى اپارۋ جوسپارىنا سىلتەمە جاسادى.
جاڭا عانا پايدا بولعان الەۋمەتتىك جەلى پلاتفورماسى Clubhouse سوڭعى اپتالاردا Facebookء-تىڭ باس ديرەكتورى مارك سۋكەربەرگ پەن Microsoft كورپوراسياسىنىڭ بۇرىنعى باس ديرەكتورى ستيۆ بالمەر سياقتى تانىمال بيزنەس جەتەكشىلەرىن تارتا وتىرىپ، تانىمال بولدى.
ماسك پلاتفورمادا بەلسەندى بولىپ، Robinhood كومپانياسىنىڭ باس ديرەكتورى، ميللياردەر ۆلاد تەنيەۆپەن سۇحباتتاستى جانە رەپەر كانە ۋەستپەن الداعى ۋاقىتتا سۇحباتتاساتىنىن مالىمدەدى .
ايتا كەتەيىك، بۇعان دەيىن Tesla كومپانياسىنىڭ باس ديەركتورى يلون ماسك رەسەي پرەزيدەنتىن Clubhouse قوسىمشاسىندا سۇحباتتاسۋعا شاقىرعان.
پىكىر قالدىرۋ