13 اقپاندا ءوز ەركىمەن قىزمەتتەن كەتۋ تۋرالى شەشىم قابىلداعانىن حابارلاعان الماتى وبلىسى ەڭبەكشىقازاق اۋدانىنىڭ اكىمى قۋانىشبەك قاشقىمبايەۆ بۇگىن قىزمەتتە ەكەنى حابارلاندى.

اكىم ەڭبەكشىقازاق اۋدانى اكىمىنىڭ instagram پاراقشاسىندا "قۇرمەتتى اۋدان تۇرعىندارى، مەنىڭ وقىرماندارىم! مەن، قۋانىشبەك قالي ۇلى ەڭبەكشىقازاق اۋدانىنىڭ اكىمى قىزمەتىن ءوز ەركىممەن بوساتتىم! وسى قىسقا ۋاقىت ارالىعىندا تاريحى باي ولكەدە ەڭبەك ەتكەنىمە، اۋدان تۇرعىندارىنىڭ تۇيتكىلدى ماسەلەلەرىن كىشكەنە بولسا دا شەشۋگە كومەكتەسكەنىم ءۇشىن قۋانىشتىمىن! الداعى ۋاقىتتادا اۋدان اكىمىنىڭ ورنىنا بىلىكتى باسشى كەلەتىنىنە سەنىمدىمىن. 7 اي ۋاقىت بويى بىرگە جۇمىس اتقارعان ارىپتەستەرىمە، اۋدان تۇرعىندارىنا ۇلكەن العىسىمدى ايتقىم كەلەدى! ەسكەرە كەتۋ كەرەك مەن وسى لاۋازىمدىق قىزمەتتى 2020 جىلدىڭ 2 شىلدەسىنەن باستاپ اتقارعان بولاتىنمىن!" دەپ جازبا جاريالاعان.

قىزمەتتە بولعانىنا ەندى 7 اي تولعاندا كەنەت قىزمەتتەن كەتۋ تۋرالى شەشىمگە قاتىستى اكىمىنىڭ باسپا ءسوز قىزمەتى رەسمي حابارلاماداعى اقپاراتتان وزگە ەشتەڭە ايتپاعان. 

ال بۇگىن ءبىرقاتار اقپارات قۇرالدارىندا اكىم 12 اقپاندا جيىن بارىسىندا قىزمەتتەن كەتەتىنىن ايتقانى حابارلاندى.

بۇل ماسەلە بويىنشا دا اكىمدىك وكىلدەرى پىكىر بىلدىرمەدى.

جالپى الماتى وبلىسىنداعى ەڭ ۇلكەن ءارى حالىق ەڭ تىعىز ورنالاسقان ەڭبەكشىقازاق اۋدانىندا اكىم ءجيى اۋىسادى.