قازاقستاندا "ءتىل" دەگەن ابدەن جاۋىر بولعان تاقىرىپ. ول جەتپەگەندەي ۇلتتى ءبولىپ "شالا قازاق پەن تازا قازاق" دەگەن سوزدەر قالىسپايدى. ءبىر قاۋىمدى ەكىگە اجىراتىپ، بىر-بىرىنە سۇيكىمسىز ەتىپ كورسەتۋ - قازاققا باعىتتالعان تىلدىك شابۋىلداردىڭ ءبىرى.
جارايدى، مەيلى، قازاقشا تۇسىنبەسىن، سويلەي الماسىن، "ماڭگۇرت" دەرسىز اينالىپ كەلگەندە قارا كوزدى، قانى قازاق باۋىرىمىز عوي. وزەككە تەۋىپ، الايىپ قارايتىنداي اتا جاۋىرىمز با ەدى؟! ونىڭ بار ايىبى - بىرەۋدىڭ وتارى بولعان حالىقتىڭ ۇرپاعى بولعاندىعى. "اربانىڭ الدىڭعى دوڭگەلەگى قالاي دوڭگەلەسە، ارتقى دوڭگەلەگى سولاي دوڭگەلەيدى"، الدىڭعى بۋىننىڭ ءتىلى، ءدىلى، ءدىنى قىسپاقتا بولعان سوڭ، ونىڭ بالاسىنا بارىپ قانداي ءمىن تاعىپ، جامانداۋعا كەلەدى، ويلانىپ قاراساڭىز.
ەل بولىپ، ەتەك-جەڭىمىز جينالىپ كەلە جاتقاندا، قايتادان باسقا ارناعا بۇرىپ، كوش-كەرۋەندى اداستىرماق بولىپ جاتقانداردىڭ ءىسى - بۇل. سوندىقتان، ءوز قانداسىمىزدى بوتەنسۋ، كۇندەۋ - ۇلتتىڭ تاعدىرىنا بالتا شابۋ.
"كەڭ قولتىق حالىق" دەگەن اتاق الىپ، وزگەلەردى - اعايىنىم دەپ جاتقاندا، "ءتىلى مۇكىس" دەپ وزىنەن-وزى جەركەنگەنى - قازاقتىڭ قاي ساسقانى؟! بالاسى قانشا ماسكۇنەم بولىپ كەتسە دە، اكەسى "ۇرپاعىمنىڭ جالعاسىن جالعايدى" دەپ ۇلىن قۇشىرلانىپ جاقسى كورمەي مە؟! كەرەمەت اق پەيىل، جىلى جۇرەكتى بولىپ بارا جاتسا سويلەۋ بىلمەي جاتقان قانداسىنا انادان دارىعان ءتىلىن ۇيرەتسىن، قازاقتىڭ قانداي دارحان ەكەنىن كورسەتسىن. سوگىپ، اياققا تاپتاپ، ءوز وكىلىنەن بەزىنسە ۇلتتىق بەرەكەسىنەن نە ساۋ-تامتىق قالماق؟!
ۇلتتىق ەمەس، ادامي كوزقاراسپەن قاراساڭىز ۇناتپايتىن ادامىڭىزبەن جۇزدەسكەن سايىن تايتالاسا بەرسەڭىز، ارادا قايدان ءبىتىم، كەلىسىم بولادى؟ ودان دا جونگە كەلىپ، قيسىنىن تاپساڭىز، ول دا دوعارىلادى ەمەس پە؟! مىناۋ دا ءدال سونداي جاعداي بولىپ تۇر... باستىسى - باق-بەرەكە، بىرلىك بولىپ، قازاقتىڭ مارتەبەسىنىڭ تۇسپەۋى.
ازامات ماۋلەن ۇلى
