ءال- فارابي اتىنداعى قازۇۋ عالىمدارى ازىرلەگەن «كۋلونوۆ پلازمالىق كريستالى»  كۇنى كەشە عارىشقا ساپارعا اتتانعان ايدىن ايىمبەتوۆتىڭ ۇشۋ باعدارلاماسىنا ەندى. بۇل تۋرالى «قامشى» پورتالى حابارلايدى.

      «كۋلونوۆ پلازمالىق كريستالىن» ۋنيۆەرسيتەتتىڭ  عارىش سالاسىنداعى العاشقى  عىلىمي تاجىريبەسى دەۋگە بولادى. وسى ەڭبەكتىڭ اۆتورى، پروفەسسور تىلەكقابىل رامازانوۆتىڭ ايتۋىنشا، عارىشتا الىنعان ناتيجەلەر ميكروگراۆيتاسيا جاعدايىندا ۋنيپوليارلىق پلازمادا قۇرىلىم ءتۇزىلۋدىڭ نەگىزگى  ماسەلەلەرىن زەرتتەۋگە جاسالعان ءبىرىنشى قادام بولماق.  سونىمەن قاتار، بۇل عاجاپ تاجىريبە عالامشاردىڭ پايدا بولۋ قۇپياسىنا ۇڭىلۋگە تاماشا مۇمكىندىك سىيلايدى.

      ءال فارابي اتىنداعى قازۇۋ عالىمدارى سوڭعى 15 جىلدان بەرى ەلىمىزدىڭ عارىش سالاسىن دامىتۋعا، اتاپ ايتقاندا، مامان دايارلاۋ، تەحنيكا مەن تەحنولوگيا دايىنداۋ ىسىنە بەلسەندى تۇردە اتسالىسىپ كەلەدى. ۋنيۆەرسيتەتتىڭ وتاندىق  عارىش سالاسىنا مامان دايارلاۋدا جەتەكشى جوعارى وقۋ ورنى بولىپ بەلگىلەنۋى بەكەر ەمەس.

     قازۇۋ-دىڭ جاس عالىمدارى وتاندىق عارىشكەرلەر ساپارى الدىندا ازىرلەنەتىن عارىش تاجىريبەسى باعدارلاماسىنا تارتىلدى. ايتالىق، ولار كومىرتەگى نانوقۇرىلىمدار نەگىزىندە انتيفريكسيالىق ماتەريالدار جاساۋ جوباسىن دايىنداۋدا. «پلازمالىق كريستالل-4» باعدارلاماسى،  سونداي-اق  نانوكومىرتەگى ماتەريالدارى مەن سەزىمتال گرافەندى قۇرالدار بويىنشا زەرتتەۋلەر جۇرگىزۋدە.

      ۋنيۆەرسيتەتتىڭ عارىش سالاسىنداعى تاعى ءبىر ماڭىزدى باعىتى  شاعىن ۇشۋ اپپاراتتارىن جاساۋمەن بايلانىستى. ءمۇنداي زەرتتەۋ  مامان دايارلاۋ جانە اسا ءىرى «عارىش تەحنيكاسى مەن تەحنولوگياسى»  جوباسىن جۇزەگە اسىرۋ شەڭبەرىندە وتكىزىلەدى. وسىعان وراي ۋنيۆەرسيتەتتە نانوسپۋتنيكتەردى شىعارۋ باستالىپ كەتتى. بۇل شارۋا UNIFORM حالىقارالىق كونسورسيۋمى اياسىندا توكيو ۋنيۆەرسيتەتىمەن بىرلەسە جۇرگىزىلۋدە. كونكۋرستىق ىرىكتەۋدەن وتكەن قازۇۋ-دىڭ فيزيكا-تەحنيكا فاكۋلتەتىنىڭ بەس ستۋدەنتى توكيو ۋنيۆەرسيتەتىندە ارنايى وقىپ كەلدى. ۋنيۆەرسيتەتتىڭ جاس عالىمدارى شاعىن عارىش اپپاراتتارى وندىرىسىنەن پايدالانۋعا دەيىنگى بۇكىل كەزەڭگە اتسالىستى. بۇگىندە ولار قازۇۋ تەحنوپاركى بازاسىندا اپپاراتتاردى قۇراستىرۋ جانە سىناقتان وتكىزۋمەن اينالىسۋدا.

     جاس عالىمدار قۇراستىرعان نانوسپۋتنيكتىڭ بىرنەشە ۇلگىسى رەسەيدىڭ «ەنەرگيا» كورپوراسياسى مەن بەرلين تەحنيكالىق ۋنيۆەرسيتەتىندە العاشقى سىناقتان سۇرىنبەي ءوتتى. تۇڭعىش نانوسپۋتنيك تاياۋ ارادا حالىقارالىق عارىش ستانساسىنان ۇشىرىلماق.  2016 جىلى ءۇشمودۋلدى نانوسپۋتنيكتىڭ، ال 2017 جىلى سالماعى 50 كەلى عىلىمي-تەحنولوگيالىق ميكروسپۋتنيكتى ۇشىرۋ كوزدەلىپ وتىر.

     ايتا كەتكەن ءجون، سپۋتنيكتەردى قازۇۋ ستۋدەنتتەرى مەن جاس ماماندارى باسىنان اياعىنا دەيىن وزدەرى قۇراستىرادى. جەر ينفراقۇرىلىمى بار مۇنداي وتاندىق نانوسپۋتنيكتەر شاعىن عارىش اپپاراتىن باسقاراتىن زاماناۋي زەرتحانالىق عىلىمي پراكتيكۋم  رەتىندە، جەر بەتىن سۋرەتكە ءتۇسىرۋ، سونداي-اق اقپاراتتى قابىلداپ جانە وڭدەۋ ءۇشىن پايدالانىلادى.

     شاعىن سپۋتنيكتەر ءوندىرىسىنىڭ جوباسى 2015-2017 جىلدارعا ارنالعان مەملەكەتتىك «عارىش تەحنيكاسى مەن تەحنولوگياسىن دايىنداۋعا ارنالعان ۇلتتىق عىلىمي مەكتەپ قۇرۋ» عىلىمي-تەحنيكالىق باعدارلاماسى شەڭبەرىندە، ۋنيۆەرسيتەت رەكتورى، اكادەميك عالىم مۇتانوۆتىڭ جەتەكشىلىك ەتۋىمەن جۇزەگە اسۋدا. باعدارلامانىڭ باستى ماقساتى – شاعىن عارىش اپپاراتى مەن جەر بەتى ينفراقۇرىلىمىن جاساۋ، سونداي-اق  عارىش تەحنولوگياسى سالاسىندا كاسىبي بىلىكتىلىگى جوعارى مامانداردى دايارلاۋعا ارنالعان عىلىمي مەكتەپ قۇرۋ.

     «قامشى» سىلتەيدى