ءبىلىم جانە عىلىم ءمينيسترى اسحات ايماعامبەتوۆ سەنات دەپۋتاتتارى بىرنەشە ماڭىزدى جاڭا نورمالاردى قامتيتىن زاڭ جوباسىن قاراستىرىپ، ماقۇلداعانىن مالىمدەپ، سالا ماماندارى ءۇشىن اسا ماڭىزدى ەكى ەرەكشە نورما تۋرالى ايتتى.
العاشقى نورما، پەداگوگتەرگە قاتىستى.
– ەندى مەملەكەتتىك ءبىلىم بەرۋ ۇيىمدارىنا پەداگوگتەردى كونكۋرس ارقىلى قابىلداۋ ەنگىزىلەدى. ياعني ءمۇعالىمدى جۇمىسقا قابىلداۋعا قاتىستى شەشىم تەك ديرەكتورلارعا تاۋەلدى بولمايدى. قازىرگى تاڭدا پەداگوگتەردى جۇمىسقا قابىلداۋ بويىنشا قولدانىستاعى جۇيە اشىقتىق قاعيداتتارىنا تولىعىمەن ساي دەپ ايتۋعا كەلمەيدى، سايكەسىنشە سىبايلاس جەمقورلىق كورىنىستەرىنە جول بەرىلۋى مۇمكىن. ماسەلەن، كەيبىر وڭىرلەردە ءبىر ءپان بويىنشا ءبىر ستاۆكانى ءتورت مۇعالىمگە ءبولىپ بەرەدى. بۇل ءوز كەزەگىندە ءبىلىم بەرۋ ساپاسىنا كەرى اسەر ەتەدى. سوندىقتان مۇنداي فاكتىلەردىڭ الدىن الۋ ءۇشىن پەداگوگتەردى جۇمىسقا كونكۋرس ارقىلى ىرىكتەپ، بارلىعىنا تۇسىنىكتى ءارى ورتاق ەرەجە بويىنشا قابىلداۋ كوزدەلدى.
ەرەجەدە كونكۋرستىق ىرىكتەۋدىڭ ناقتى قاعيدالارى بەكىتىلەدى. بۇل جۇمىس سيفرلىق تەحنولوگيالاردىڭ كومەگىمەن اۆتوماتتاندىرىلادى. سايكەسىنشە، پەداگوگتى جۇمىسقا قابىلداۋ تۋرالى شەشىمدى ءبىر عانا ادام ەمەس، كوپشىلىك قابىلدايتىن بولادى. پەداگوگتەردىڭ كاسىبيلىگىنە جانە بارلىق تالاپقا ساي بولۋىنا دەن قويىلادى، – دەدى مينيستر.
ايماعامبەتوۆ ەكىنشى وزگەرىس باسشىلارعا قاتىستى ەكەنىن جەتكىزدى.
– ەندى مەملەكەتتىك ءبىلىم بەرۋ ۇيىمدارىنىڭ باسشىلارىن روتاسيالاۋ ەنگىزىلەدى. روتاسيالاۋ ينستيتۋتى مەملەكەتتىك قىزمەتتە، بيزنەس قۇرىلىمدارىندا جانە باسقا دا باعىتتاردا ەنگىزىلگەن. الايدا ءبىلىم بەرۋ سالاسىندا روتاسيالاۋ ءتارتىبىن قولدانۋ مۇمكىن بولمادى. ءتىپتى مەملەكەتتىك ۇيىمدارداعى باسشىلاردىڭ باسىم دەنىمەن مەرزىمسىز ەڭبەك شارتى جاسالعان، سايكەسىنشە كوبى لاۋازىمدىق قىزمەتتى جىلدار بويى اتقارادى. دەگەنمەن ولاردىڭ اراسىندا ۇيىمداعى جۇمىستى جاقسارتۋ ءۇشىن بار كۇشىن، ىنتا-جىگەرىن سالىپ ەڭبەك ەتىپ جاتقان بىلىكتى باسشىلاردىڭ دا بار ەكەنى جاسىرىن ەمەس. تەك جىلدار بويى ءبىر ورىندا جۇمىس ىستەسە دە تيىمدىلىگىن جوعالتپاعاندار ساناۋلى.
كەيبىر جاعدايلاردا جۇمىسقا دەگەن ىنتانىڭ تومەندەۋى، موتيۆاسيانىڭ جوعالۋى نەمەسە سول ۇيىمداعى باسقا مامانداردىڭ دا قىزمەتتىك وسۋگە دەگەن نيەتى بولۋى – زاڭدى ۇعىم. ياعني باسشىلاردىڭ جىلدار بويى ءبىر لاۋازىمدا وتىرۋىنىڭ ءوز ارتىقشىلىقتارى دا بار، كەمشىلىكتەرى دە كورىنىس تاۋىپ جاتادى.
جالپى باسشىلاردى ورىندارىمەن اۋىستىرۋ ۇزدىك تاجىريبەنى باسقا دا ۇيىمدارعا ەنگىزۋگە ىقپال ەتەدى. ارينە، بۇل تۇرعىدا روتاسيالاۋدىڭ ناقتى ءتارتىبى بەكىتىلەدى. روتاسيانى مينيسترلىك ازىرلەگەن قاعيدالار بويىنشا ءبىلىم باسقارمالارى جۇرگىزەتىن بولادى، – دەپ اتاپ ءوتتى ول ءوزىنىڭ facebook پاراقشاسىندا.
