نۇرلان نىعماتۋلين ساياسي پارتيا وكىلدەرىنىڭ باسىن قوسىپ، كەڭەس قۇرۋدى ۇسىندى

/image/2021/03/04/crop-12_112_562x999_f40cb2fc-1746-4186-8ba1-03d5ec3cc63b.jpg

بۇگىن ماجىلىستە قازاقستاندا تىركەلگەن پارتيا وكىلدەرىنىڭ كەزدەسۋى ءوتىپ، وتىرىس بارىسىندا پالاتا ءتوراعاسى نۇرلان نىعماتۋلين ءماجىلىس جانىنان پارتياارالىق كەڭەس قۇرۋدى ۇسىندى.

ماجىلىستە وتكەن جيىنعا «Adal»، «اق جول»، «اۋىل» پارتيالارىنىڭ جانە قازاقستان حالىق پارتياسىنىڭ، «Nur Otan» جانە جسدپ وكىلدەرى جينالدى.

قازاقستاندا تىركەلگەن پارتيا وكىلدەرىنىڭ كەزدەسۋى

– ءارقايسىمىزدىڭ العا قويعان جوسپارلارىمىز، مىندەتتەرىمىز، جۇمىس ىستەۋ تاسىلدەرىمىز ءارتۇرلى بولعانىمەن، ماقساتىمىز ءبىر. ول – ەلباسىمىز نۇرسۇلتان ءابىش ۇلى نازاربايەۆتىڭ، مەملەكەت باسشىسى قاسىم-جومارت كەمەل ۇلى توقايەۆتىڭ ەلىمىزدى دامىتۋ باستامالارىن قولداپ، حالقىمىزدىڭ ءومىر ساپاسىن جاقسارتۋعا ىقپال ەتۋ، ۇلەس قوسۋ، – دەدى وتىرىستا نۇرلان نىعماتۋلين.

 

وسى جولدا ءماجىلىس ءارقاشاندا قوعامدىق ۇيىمدارمەن، تاۋەلسىز ساراپشىلارمەن، جۋرناليستەرمەن اشىق، قولجەتىمدى جانە جاريا جۇمىس ىستەپ كەلە جاتقانىن العا تارتقان پالاتا سپيكەرى:

– ءماجىلىس جانىنان پارتياارالىق كەڭەستى ۇيىمداستىرۋدى ۇسىنا وتىرىپ، ءبىز، ەڭ الدىمەن، پارلامەنتتىك جانە پارلامەنتتىك ەمەس پارتيالاردىڭ ديالوگىن كەڭەيتۋ ءۇشىن جاڭا مۇمكىندىكتەر اشقىمىز كەلەدى. وسى جاڭا پىكىرتالاس الاڭىندا ازىرلەنەتىن تالقىلاۋلار، ۇسىنىستار، ۇسىنىمدار زاڭ شىعارۋ پروسەسىن ودان دا ءتيىمدى ەتۋگە مۇمكىندىك بەرەدى دەپ ۇمىتتەنەمىز. جالپى، ءبىزدىڭ پارتياارالىق كەڭەس اياسىنداعى ىنتىماقتاستىعىمىز وزەكتى ماسەلەلەردى شەشۋدىڭ تاعى ءبىر قۇرالى بولا الادى، – دەدى.

ءماجىلىس سپيكەرىنىڭ پىكىرىنشە، پارتياارالىق كەڭەس كونسۋلتاتيۆتىك-كەڭەسشى ورگان بولۋعا ءتيىس. سونىمەن قاتار، نۇرلان نىعماتۋلين دەپۋتاتتىق كورپۋستىڭ پارتيا وكىلدەرىنىڭ قانداي دا ءبىر زاڭ جوبالارى بويىنشا جۇمىس توپتارىنىڭ قۇرامىنا كىرۋىنە مۇددەلىلىگىن ءبىلدىردى.

– ءسىزدىڭ يدەيالارىڭىز، ۇسىنىستارىڭىز ءىس جۇزىندە جۇزەگە اسىرىلۋى كەرەك. ءبىز بىرلەسكەن جۇمىسقا دايىنبىز. مۇنداي ىنتىماقتاستىق پارلامەنتتىك ەمەس پارتيالار ءۇشىن دە پايدالى بولادى دەپ ويلايمىن، – دەدى ءماجىلىس سپيكەرى كەزدەسۋگە قاتىسۋشىلارعا ارناعان سوزىندە.

وتىرىس بارىسىندا «اۋىل» پاتريوتتىق پارتياسى ءتوراعانىڭ ءبىرىنشى ورىنباسارى ت. راحىمبەكوۆ، جالپىۇلتتىق سوسيال-دەموكراتيالىق پارتيانىڭ ءتوراعاسى ا. راحىمجانوۆ جانە «Adal» پارتياسىنىڭ حاتشىسى ە. جۇماعازييەۆ ءماجىلىس ءتوراعاسى ۇسىنعان باستامانى قولداپ، بۇل ءماجىلىس جۇمىسىنداعى جاڭا بەتبۇرىس ەكەنىن ايتتى.

سونىمەن قاتار، نۇرلان نىعماتۋلين ۇلتتىق قوعامدىق سەنىم كەڭەسىنىڭ V وتىرىسىندا ەل پرەزيدەنتى قاسىم-جومارت توقايەۆتىڭ كوتەرگەن تاپسىرمالارىنا، سونىڭ ىشىندە جاڭا زاڭ جوبالارىن ازىرلەۋگە قاتىستى ماسەلەلەرگە نازار اۋداردى.

– ءبىز پارتياارالىق كەڭەستىڭ تۇراقتى جۇمىس ىستەيتىن جۇمىس الاڭىنا اينالۋىن قامتاماسىز ەتۋىمىز كەرەك. وندا ۇسىنىمدار ازىرلەنەدى، سودان كەيىن ولار پارلامەنتتەگى زاڭنامالىق پروسەستىڭ بارلىق ساتىلارىندا پايدالانىلاتىن بولادى، – دەدى ءسوزىن قورىتىندىلاعان ءماجىلىس ءتوراعاسى.

ءماجىلىستىڭ باسپا ءسوز قىزمەتى

قاتىستى تەگتەر :

پىكىر قالدىرۋ

قاتىستى ماقالالار