The New Yorker جۋرنالى قىتايدا قامالعان قازاقتار تۋرالى دەرەكتى فيلم جاريالادى. 

انيماسيالىق تۇسىندىرمەلەرى بار  دەرەكتى فيلمدە قىتايدىڭ شىڭجاڭ تارباعاتاي ايماعىنداعى قايتا تاربيەلەۋ لاگەرىنە قامالعان ءۇش ەتنيكالىق قازاقتىڭ باستان وتكەن وقيعالارى باياندالادى. 

فيلم قازاق تىلىنە اۋدارىلىپ، اعىلشىن تىلىندەگى نۇسقاسىمەن بىرگە The New Yorker جۋرنالىنىڭ YouTube ارناسىندا جاريالانعان. 

بۇۇ قىتايدىڭ شىڭجاڭىندا 1 ميلليوننان استام ادام "قايتا تاربيەلەۋ ورتالىقتارى" دەپ اتالاتىن لاگەرلەردە قاماۋدا وتىرعانىن ايتادى. 

ال بەيجىڭ العاشقى كەزدەرى ونداي ورتالىقتاردىڭ بار ەكەنىن جوققا شىعارعان بولسا دا، كەيىنىرەك ورتالىقتاردا "كاسىپتىك ءبىلىم بەرىلەتىنىن" ايتۋدان تانباي كەلەدى. 

جاقىندا BBC شىڭجاڭداعى لاگەرلەرگە قاتىستى ءماجبۇرلى ەڭبەك جانە جاپپاي جىنىستىق زورلىق تۋرالى حابارلادى. كوپ وتپەي اقش مەملەكەتتىك دەپارتامەنتى جاعدايعا قاتتى كوڭىل اۋداراتىنىن ايتىپ، بەيجىڭدى ايىپتايتىن مالىمدەمە جاسادى.

مەملەكەتتىك دەپارتامەنت وكىلى  "قاتىگەزدىكتەر ءبىزدى قاتتى الاڭداتتى. بۇل قاتىگەزدىكتەر ار-ۇجدانعا دا اۋىر سوققى. مۇنداي ساياساتى ءۇشىن بەيجىڭگە ۇلكەن سالدارى بار جاۋاپ قايتارۋ كەرەك" دەپ مالىمدەدى.

ال ۇلىبريتانيا پارلامەنتىندە شىڭجاڭ ايماعىنداعى ءماجبۇرلى ەڭبەككە قاتىستى ۇلىبريتانيالىق كومپانيالاردى تەكسەرۋ كەرەكتىگى كوتەرىلدى.