الاش كوسەمى ءاليحان بوكەيحاننىڭ ەسىمىن الماتىداعى ازىرگە اتى جوق قازاق ۇلتتىق اگرارلىق ۋنيۆەرسيتەتىنە بەرۋ كەرەك. بۇل تۋرالى ءماجىلىستىڭ جالپى وتىرىسىندا دەپۋتات قازىبەك يسا ايتتى.

– "اق جول" فراكسياسى بيىل 3 ناۋرىزدا "الاش قايراتكەرلەرىن ۇمىت قالدىرۋ - ساياسي ادىلەتسىزدىك" اتتى دەپۋتاتتىق ساۋال جولداعانى بەلگىلى. وندا وڭىرلەردەگى الاش قايراتكەرلەرىنىڭ ەسىمدەرى ۇمىت قالىپ وتىرعانى ايتىلعان ەدى. ەندى انىقتالعانداي، ەلەۋسىز قالعاندار تەك الاش قايراتكەرلەرى عانا ەمەس، ءاليحان بوكەيحان، احمەت بايتۇرسىن ۇلى، ءمىرجاقىپ دۋلات ۇلى سەكىلدى الاش كوسەمدەرىنىڭ وزدەرى دە لايىقتى ۇلىقتالماي جاتقانىنا كوز جەتكىزدىك. بيىل ورتا ازياداعى تۇڭعىش ساياسي پارتيا "الاش" پارتياسىن قۇرىپ، الاش وردا ۇكىمەتىن باسقارعان ءاليحان بوكەيحاننىڭ تۋعانىنا 155 جىل تولۋىنا ارنالعان ءىس-شارالار قازاقستان پرەزيدەنتى قاسىم-جومارت توقايەۆتىڭ ۇسىنۋىمەن تاۋەلسىزدىكتىڭ 30 جىلدىعى باعدارلاماسىنا ەنگىزىلدى. تاياۋدا 31 ناۋرىزدا تۇركىستان دەكلاراسياسىن قابىلداعان تۇركى كەڭەسى مەملەكەتتەرىنىڭ باسشىلارى تۇراننىڭ ۇلى تۇلعالارىنىڭ ىشىندە ءاليحان بوكەيحاننىڭ 155 جىلدىق مەرەيتويىن دا بىرلەسە اتاپ وتۋگە شەشىم قابىلدادى. قاراعاندىداعى وكتيابر اۋدانى ەندى ءاليحان اۋدانىنا اينالدى، – دەدى ول.

دەپۋتاتتىڭ ايتۋىنشا، قالالارداعى بويىندا بىردە-بىر وقۋ-مادەني ورىندارى جوق بۇل كوشەلەردىڭ بارلىعىن ءاليحاننىڭ كوشەسى دەپ ەلگە كورسەتۋدىڭ ءوزى ۇيات.

– دەگەنمەن، ەلىمىزدە الاش كوسەمىنىڭ اتىنا لايىق ەشقانداي كوشە جوق ەكەنىن انىقتادىق. استانامىزدان باستاساق، بوكەيحانوۆ كوشەسى ورتالىقتا ەمەس، ەلەۋسىز ول كوشەنى كوبىنەسە "ماڭگىلىك ەل" كوشەسىندەگى كەپتەلىستەن قاشقان جۇرگىزۋشىلەر جاقسى بىلەدى. الماتىداعى بوكەيحانوۆ كوشەسى قالا شەتىندەگى وندىرىستىك اۋدانداعى بازار ارتىنداعى قۋىستا ورنالاسقان. شىمكەنتتىڭ شەتىندەگى تاسساي اۋىلىنىڭ تاساسىندا قالعان بوكەيحانوۆ كوشەسىنىڭ ۇزىندىعى 500 مەتردەي عانا، جيىرما شاقتى ءۇي ورنالاسقان، ءتىپتى جارىق تا جوق. الاش ورداسى اتالعان سەمەيدە دە، وبلىس ورتالىعى وسكەمەندە دە ءاليحانعا لايىقتى كوشە جوق، شالعايداعى شاعىن اۋداندارداعى جيىرما شاقتى ۇيدەن تۇراتىن شاعىن كوشەلەر. قالالارداعى بويىندا بىردە-بىر وقۋ-مادەني ورىندارى جوق بۇل كوشەلەردىڭ بارلىعىن ءاليحاننىڭ كوشەسى دەپ ەلگە كورسەتۋدىڭ ءوزى ۇيات. قازاق ەلىندە ءبىرتۋار تۇلعامىزدىڭ اتىنا لايىق كوشە بولماۋى جانە قازاق اۋىلشارۋاشىلىعىنىڭ باسىندا تۇرعان عۇلاما، عالىمعا بىردە-بىر جوعارى وقۋ ورنىنىڭ اتى بەرىلمەۋى – الاش كوسەمىنىڭ ارۋاعىنا جاسالعان قيانات، – دەدى ول.

سونىمەن قاتار قازىبەك يسا "اق جول" پارتياسىنىڭ ۇسىنىسىن جەتكىزدى.

– ءا.بوكەيحاننىڭ نەگىزگى ماماندىعى – ورمانتانۋشى-عالىم، ياعني اگرونوم. ول – قازاقتىڭ جەر-سۋىن، ءداستۇرلى شارۋاشىلىعىن زەرتتەگەن ەكسپەديسيالارعا قاتىسىپ، قوي، ءىرى قارا جانە جىلقى تۇقىمدارىن زەرتتەپ، 3 ىرگەلى عىلىمي مونوگرافيا، ونداعان عىلىمي ماقالا جازعان، قازاق اۋىلشارۋاشىلىعى عىلىمىنىڭ نەگىزىن قالاعان عۇلاما عالىم. سوندىقتان ونىڭ ەسىمىن الماتىداعى ازىرگە اتى جوق قازاق ۇلتتىق اگرارلىق ۋنيۆەرسيتەتىنە بەرۋ ابدەن لايىقتى دەپ سانايمىز.

ەكىنشى، ەلوردامىزداعى تۇران مەن سىعاناق كوشەلەرىنىڭ قيىلىسىنداعى بوس تۇرعان الاڭعا "الاش" اللەياسىن اشىپ، ءاليحان ەسكەرتكىشى مەن الاش قايراتكەرلەرى بيۋستەرىن ورناتۋ قاجەت.

ءۇشىنشى، ەلىمىزدەگى بارلىق قالا ورتالىعىنان ءاليحان بوكەيحان اتىنا لايىقتى كوشە بەرىلىپ، الاش الاڭدارى اشىلۋى ءتيىس، – دەدى دەپۋتات.