كەلەسى جىلدىڭ سوڭىنا دەيىن 400 جاڭا مەكتەپ سالىنادى. بۇل تۋرالى «Nur Otan» پارتياسىنىڭ ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەسىنىڭ العاشقى ۇيىمداستىرۋ وتىرىسىندا بەلگىلى بولدى. جاڭادان قۇرىلعان كەڭەستىڭ وتىرىسىندا ونىڭ قۇرام بەكىتىلىپ، الداعى جىلعا ارنالعان جۇمىس جوسپارى انىقتالدى.

پارتيانىڭ باسپا ءسوز قىزمەتىنىڭ حابارلاۋىنشا، كەڭەستىڭ ءبىرىنشى كەزەكتەگى مىندەتى – سايلاۋالدى مىندەتتەمەلەردىڭ، سونىڭ ىشىندە ءۇش اۋىسىمدى جانە اپاتتى مەكتەپتەر پروبلەماسىن شەشۋ جونىندەگى ۋادەلەردىڭ ىسكە اسىرىلۋىن باقىلاۋ. ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا 2025 جىلعا دەيىنگى ءتيىستى جول كارتاسى ازىرلەندى.

«Nur Otan» پارتياسىنىڭ حاتشىسى الىبەك الدەنەيدىڭ ايتۋىنشا، بيىلدىڭ وزىندە 200 مەكتەپ سالۋ، بۇدان بولەك تاعى 1000 ءبىلىم بەرۋ نىسانىن جاڭعىرتۋ جوسپارلانعان.

ءبىلىم جانە عىلىم ۆيسە-مينيسترى بيبىگۇل اسىلوۆا اتاپ وتكەندەي، بيلەۋشى پارتيانىڭ سايلاۋالدى باعدارلاماسىن جۇزەگە اسىرۋ اياسىندا 800 مەكتەپتى پايدالانۋعا بەرۋ جوسپارى جاسالدى. ولاردىڭ جارتىسى 2022 جىلدىڭ سوڭىنا دەيىن سالىنادى.

وتىرىس بارىسىندا كەڭەس ءتوراعاسى، ءماجىلىس دەپۋتاتى جۇلدىز سۇلەيمەنوۆا بيۋدجەت قاراجاتىنىڭ ءتيىمدى جۇمسالۋىنا ەرەكشە نازار اۋدارۋدى ءتيىستى ۆەدومستۆو وكىلدەرىنىڭ قاپەرىنە سالدى.

– مەكتەپ قۇرىلىسىنا بولىنگەن قاراجاتتىڭ جۇمسالۋىن تالداۋ بارىسىندا 18،6 ملرد. تەڭگە يگەرىلمەگەنى انىقتالدى. قولدانىستاعى زاڭناما بۇعان تىيىم سالمايتىنىنا قاراماستان، بىردە-بىر ايماق ءبىلىم جانە عىلىم مينيسترلىگىمەن قاراجاتتى قايتا ءبولۋ تۋرالى كەلىسىمگە كەلمەگەن. باقىلاۋ مەحانيزمدەرىن كۇشەيتۋ قاجەت، – دەدى جۇلدىز سۇلەيمەنوۆا.

مينيسترلىكتىڭ مالىمەتىنشە، قازىرگى ۋاقىتتا مەكتەپتەردەگى تاپشىلىق 265 مىڭ وقۋشى ورنىن قۇرايدى. ەلىمىز بويىنشا 137 مەكتەپ ءۇش اۋىسىمدا وقىسا، تاعى 34ء-ى اپاتتى دەپ تانىلعان.

وتىرىس قورىتىندىسى بويىنشا ءبىرقاتار ۇسىنىمدار ازىرلەندى. اتاپ ايتقاندا، 800 جاڭا مەكتەپ قۇرىلىسىن ءتيىمدى ىسكە اسىرۋدى جانە بيۋدجەت قاراجاتىن جۇمساۋدىڭ تۇراقتى مونيتورينگىن قامتاماسىز ەتۋ ءۇشىن «Nur Otan» پارتياسىنىڭ ورتالىق اپپاراتىنا اي سايىنعى ەسەپ بەرىپ وتىرۋ، قوعامدىق باقىلاۋدى كۇشەيتۋ، جەرگىلىكتى اتقارۋشى ورگانداردىڭ جاۋاپكەرشىلىگىن ارتتىرۋ، سونداي-اق وڭىرلىك جانە اۋماقتىق كەڭەس مۇشەلەرىنە ءاربىر مەكتەپكە جەتەكشىلىك ەتۋدى بەكىتۋ.

ەسكە سالا كەتەيىك، بۇعان دەيىن «Nur Otan» ءتوراعاسىنىڭ ءبىرىنشى ورىنباسارى باۋىرجان بايبەك بيلەۋشى پارتيانىڭ سايلاۋالدى ۋادەلەرىن ىسكە اسىرۋدى قالاي قامتاماسىز ەتۋگە نيەتتى ەكەنىن ايتقان بولاتىن.

ونىڭ ايتۋىنشا، ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا، سونداي-اق ەل پرەزيدەنتى قاسىم-جومارت توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا پارتيانىڭ قوعامدىق كەڭەستەرىنىڭ جۇمىسى جۇيەلى تۇردە قايتا قۇرىلىمدالادى.

ساياسي كەڭەس بيۋروسىنىڭ شەشىمىمەن تاراتىلعان پارتيالىق كۋراتورلار ينستيتۋتىنىڭ ورىنا «Nur Otan»-نىڭ سايلاۋالدى باعدارلاماسىنىڭ ناقتى باعىتتارىنىڭ ىسكە اسىرىلۋىن باقىلاۋ بويىنشا 14 رەسپۋبليكالىق قوعامدىق كەڭەس قۇرىلدى. وسىنداي كەڭەستەر وڭىرلىك دەڭگەيدە دە قۇرىلعان.