وتكەن اپتا سوڭىندا «Nur Otan» پارتياسىنىڭ 2021-2025 جىلدارعا ارنالعان جول كارتاسىنىڭ نەگىزگى باعىتتارىن جۇزەگە اسىرۋ بويىنشا ق ر پارلامەنتى ءماجىلىسىنىڭ دەپۋتاتى ەلنۇر بەيسەنبايەۆ جۇمىس ساپارىمەن باتىس قازاقستان وبلىسىندا بولدى. ول وبلىس ورتالىعى ورال قالاسىنداعى ءبىرقاتار الەۋمەتتىك ءوندىرىس نىساندارىنىڭ جۇمىسىمەن تانىسىپ، جاڭادان قۇرىلعان جاس دەپۋتاتتار كورپۋسىنىڭ مۇشەلەرىمەن كەزدەستى.
ماجىلىسمەننىڭ ساپارى بىلتىر اشىلعان «وتباسى» ورتالىعىنان باستالدى. بۇل جەردە مەكەمەنىڭ ىشكى تىرشىلىك-تىنىسىمەن تەرەڭ تانىسىپ، كوپ بالالى انالارمەن تىلدەستى. ورالداعى بۇل «وتباسى» ورتالىعى ءوز جۇمىسىن باستاعالى قامقورلىققا ءزارۋ مىڭنان استام جانعا كومەك قولىن سوزعان. مۇندا نەگىزىنەن پسيحولوگ، زاڭگەر جانە الەۋمەتتىك سۇراقتار بويىنشا باعىت-باعدار بەرەتىن ماماندار توپتاستىرىلىپتى. سونىمەن بىرگە نازىك جاندارعا ارنالعان شەبەرلىك سىنىپتارى ۇيىمداستىرىلۋدا.
كەلەسى كەزەكتە ءماجىلىس دەپۋتاتى ايالداعان جەر – «شابىت» شىعارماشىلىق ورتالىعى بولدى. ەلىمىزدەگى ەپيداحۋالعا بايلانىستى قالاداعى ءبىراز مەيرامحانا-تويحانالار ءوز قىزمەت باعىتىن وزگەرتىپ، ءزاۋلىم سارايلارىن يگىلىكتى ىسكە پايدالانۋعا بەرگەنى كوپكە ءمالىم. قازىرگى كۇنى جۇزدەگەن ۇل-قىزدىڭ ساباقتان تىس كەزدە سۇيىكتى ىسىمەن اينالىسىپ، ءوز شەبەرلىكتەرىن شىڭداۋىنا جول اشقان بۇل ورتالىق تا كۇنى كەشەگى تويحانا ەدى. اتالعان مەكەمەگە وبلىستىق ءماسليحاتتىڭ جاس دەپۋتاتى شاتتىق وتەبالييەۆا جەتەكشىلىك ەتۋدە. مۇندا ونداعان ۇيىرمە تۇراقتى جۇمىس ىستەيدى.
سودان كەيىن ەلنۇر بەيسەنبايەۆ «Green service company» ج ش س ىسكە قوسقان تۇرمىستىق قاتتى قالدىقتاردى سۇرىپتاۋ جانە قايتا وڭدەۋ زاۋىتىنىڭ جۇمىسىمەن تانىستى.
اتالعان كاسىپورىننىڭ قۇرىلتايشىسى، وبلىستىق ءماسليحاتتىڭ جاس دەپۋتاتى ازامات بيسەنوۆتىڭ ايتۋىنشا، بۇل ورىنعا قالادان تاۋلىگىنە 200 توننا قالدىقتار اكەلىنەدى ەكەن.
– كاسىپورىندا جينالىپ قالعان قاعاز قالدىقتارىن كادەگە جاراتۋ توڭىرەگىندە دە تۇيتكىل كوپ. سۇرىپتالىپ ۇلگەرگەن تۇرمىستىق قالدىقتاردى رەسەيگە شىعارۋعا قويىلعان ماروتوريي الىنعانىمەن، مەملەكەتتىك كىرىس قۇرىلىمدارىنان قۇجات راسىمدەپ، رۇقسات الۋ وڭاي شارۋا ەمەس. ەلىمىزدەگى وڭدەۋ زاۋىتتارىنا جەتكىزۋدىڭ شىعىنى شاش ەتەكتەن. كورشىلەس ورنالاسقان رەسەيدىڭ وبلىستارىنا ەكسپورتتاۋ وتە ىڭعايلى، ءارى كوپ شىعىندى تالاپ ەتپەيدى. وسى ماسەلەنى دە ماجىلىستە كوتەرسەڭىزدەر ەكەن، – دەيدى ازامات عيمران ۇلى.
پارلامەنت ءماجىلىسىنىڭ دەپۋتاتى سونىمەن قاتار «باستاۋ» كوۆوركينگ ورتالىعىندا بولىپ، ءوڭىردىڭ جاس دەپۋتاتتارىمەن كەزدەستى.
كەزدەسۋ بارىسىندا ەلنۇر بەيسەنبايەۆقا ق ر تاۋەلسىزدىگىنىڭ 30 جىلدىعىنا وراي باتىس قازاقستان وبلىسى اۋماعىندا جۇزەگە اسىرىلاتىن جاس دەپۋتاتتاردىڭ «سەرپىلىس» جوباسى تانىستىرىلدى. جوبا اياسىندا ءارتۇرلى دەڭگەيدەگى جەرگىلىكتى ءماسليحات دەپۋتاتتارى ءوز ايماقتارىندا الەۋمەتتىك ماڭىزى بار جوبالاردى جۇزەگە اسىرادى. مىسالى، تۇرعىندارعا ارنالعان ءارتۇرلى وقىتۋ كۋرستارىن ۇيىمداستىرۋ، ايماقتا تازالىق جۇمىستارىن وتكىزۋ، ۆولونتەرلىك قىزمەتتەردى جۇزەگە اسىرۋ جانە تاعى باسقالار. سونىمەن قاتار، مۇقتاج جاندارعا كومەك كورسەتۋ بويىنشا جۇمىستاردى جۇزەگە اسىرادى. جوبا نەگىزىنەن، «بالىق بەرمە، قارماق بەر» دەگەن پرينسىپپەن جۇمىس جاسايدى. ياعني، تۇرعىنداردىڭ ءوز مۇمكىنشىلىكتەرىن پايدالانا وتىرىپ، ولارعا ناقتى قولداۋلار كورسەتۋ.
– ەلىمىزدىڭ تۇڭعىش پرەزيدەنتى، ەلباسى نۇرسۇلتان ءابىش ۇلى نازاربايەۆتىڭ تاپسىرماسىمەن جاس دەپۋتاتتار كورپۋسى قۇرىلدى. ونىڭ قۇرامىنا ماجىلىستەگى جانە جەرگىلىكتى ءماسليحاتتارداعى 600-دەي جاس دەپۋتات ەندى. كۇنى كەشەگى وتكەن سايلاۋداعى «Nur Otan» پارتياسى ۇسىنعان باعدارلامالاردى جۇزەگە اسىرۋ جولىندا بەلسەندىلىك تانىتۋىمىز قاجەت. ايتا كەتۋ كەرەك، جاس دەپۋتاتتار كورپۋسى وڭىرلەر بويىنشا ەڭ العاشقى بولىپ باتىس قازاقستان وبلىسىندا ءوز جۇمىسىن باستادى. بۇل جەرگىلىكتى اتقارۋشى ورگاندار تاراپىنان كورسەتىلگەن ناقتى قولداۋ دەپ بىلەمىز. الدا تۇرعان مىندەتتەردى بىرلىك تانىتىپ، بىرگە اتقارساق عانا ەڭسەرەمىز، – دەدى ە.بەيسەنبايەۆ.
وبلىس اۋماعىنداعى جەرگىلىكتى ءماسليحاتتارداعى جاس دەپۋتاتتاردىڭ سانى 52ء-نى قۇرايدى. رەسپۋبليكا كولەمىندە اشىلعان جاس دەپۋتاتتار كورپۋسىنىڭ باتىس قازاقستان وبلىسى بويىنشا جەتەكشىسى بولىپ قالالىق ءماسليحات دەپۋتاتى، جاس كاسىپكەر مەرجان ءابىلقاس سايلاندى.
حالىق قالاۋلىسىمەن بولعان باسقوسۋدا وبلىستىق، قالالىق جانە اۋداندىق ءماسليحاتتاردىڭ جاس دەپۋتاتتارى ءوز ويلارىمەن ءبولىسىپ، ۇسىنىس-پىكىرلەرىن جەتكىزدى.
پىكىر قالدىرۋ