«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Facebook-تەگى پاراقشاسىندا «ءاربىر بالا مەكتەپكە بارۋعا لايىق» اتتى بولاشاقتىقتاردىڭ ينكليۋزيۆتى ءبىلىم بەرۋدى دامىتۋ جوباسى تۋرالى ايتتى.
«قۇرمەتتى دوستار! وزدەرىڭىزگە ءمالىم، ەلىمىزدىڭ تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن تاۋەلسىزدىكتىڭ العاشقى جىلدارىندا «بولاشاق» باعدارلاماسى قۇرىلدى. وسىناۋ تەڭدەسسىز شەشىمنىڭ ارقاسىندا 14 مىڭنان استام قازاقستاندىق الەمنىڭ ۇزدىك وقۋ ورىندارىندا ءبىلىم الدى. وسى باعىتتاعى 11 حالىقارالىق ستيپەنديا اراسىندا ۇزدىكتەردىڭ ءبىرى دەپ تانىلعان «بولاشاق» باعدارلاماسى ەلىمىزدە باسەكەگە قابىلەتتى ادام كاپيتالىن قالىپتاستىرۋعا مۇمكىندىك بەردى.
وسىدان 20 جىل بۇرىن باعدارلامانىڭ العاشقى تۇلەكتەرى «بولاشاق» ستيپەندياتتارىنىڭ قاۋىمداستىعىن قۇرعان بولاتىن. بۇگىندە ول تابىستى ۇكىمەتتىك ەمەس ۇيىمداردىڭ بىرىنە اينالىپ وتىر. بيىل «بولاشاق» كورپوراتيۆتىك قورىنىڭ دا قىزمەت ەتىپ كەلە جاتقانىنا 10 جىل تولادى.
وسى جىلدار ىشىندە قور ءبىلىم بەرۋ گرانتتارى ارقىلى تالانتتى بالالاردى قولداۋعا باعىتتالعان 70-تەن اسا ءارتۇرلى الەۋمەتتىك جانە قايىرىمدىلىق جوبالاردى ىسكە اسىردى. بۇلاردىڭ قاتارىندا جوعارى حالىقارالىق ستاندارت بويىنشا بالالارعا ارنالعان مۋلتيمەديالىق كونتەنت جاساۋ جانە باسقا دا جوبالار بار.
سونىمەن بىرگە، «بولاشاق» قورىنىڭ 6 جىلدان استام ۋاقىتتان بەرگى باسىم باعىتتارىنىڭ ءبىرى – «ءاربىر بالا مەكتەپكە بارۋعا لايىق» اتتى ينكليۋزيۆتىك ءبىلىم بەرۋدى دامىتۋ جوباسى.
بۇگىندە بۇكىل ەل كولەمىندە 59 مامانداندىرىلعان ساۋىقتىرۋ مەكەمەسى مەن كابينەتتەرى اشىلعان. ولار 2 مىڭنان استام ەرەكشە بالالاردى، ونىڭ ىشىندە نۇرسۇلتان نازاربايەۆ قورىنىڭ قارجىلاندىرۋى ەسەبىنەن اشىلعان 16 «قامقورلىق» ينكليۋزيا كابينەتىن قامتيدى. 420 جوعارى بىلىكتى جۇمىس ورنى اشىلىپ، 1300 مامان مەن اتا-انا وقۋدان ءوتتى. مەملەكەت دەڭگەيىندە جۇيەلى تۇردە شەشۋ ءۇشىن قور 78-دەن استام ۇسىنىس پەن زاڭناما اكتىلەرىنە تۇزەتۋلەر ەنگىزدى.
ەرەكشە قاجەتتىلىكتەرى بار بالالارعا قولداۋ كورسەتۋ پارتيا ليدەرى 2014 جىلى باستاماشىلىق ەتكەن «كەدەرگىسىز كەلەشەك» جوباسى مەن مەملەكەت باسشىسى قاسىم-جومارت توقايەۆ تانىستىرعان «Nur Otan»-نىڭ سايلاۋالدى باعدارلاماسىنىڭ دا باسىمدىقتارىنىڭ ءبىرى بولىپ تابىلادى. وسىعان وراي 2025 جىلعا دەيىن بۇكىل كوللەدج بەن جوعارى وقۋ ورىندارىندا، سونداي-اق مەكتەپتەر مەن مەكتەپكە دەيىنگى ۇيىمداردىڭ 70%-نە ينكليۋزيۆتىك ءبىلىم بەرۋدى ەندىرۋدى قامتاماسىز ەتۋ مىندەتى قويىلدى.
بۇۇ باستاماسىمەن جىل سايىن دۇنيەجۇزىلىك اۋتيزم ماسەلەسى تۋرالى اقپاراتتى تاراتۋ كۇنى اتاپ وتىلەدى. قازاقستاندا ەرەكشە ءبىلىم الۋ قاجەتتىلىگى بار بالالاردىڭ سانى 160 مىڭنان اسادى، ونىڭ ىشىندە 35 مىڭ بالا اۋتيزمگە شالدىققان.
سوندىقتان «بولاشاق» قورى 5 جىل بويى ينكليۋزيۆتىك ءبىلىم بەرۋدى ناسيحاتتاۋ بويىنشا ۇزدىك ماتەريال رەسپۋبليكالىق كونكۋرسىن وتكىزىپ كەلەدى. بيىل 40-تان استام بۇقارالىق اقپارات قۇرالىنان 138 جۇمىس ءتۇستى.
ماراپاتتاۋ سالتاناتى بارىسىندا بارشا قاتىسۋشىلارعا «ءاربىر بالا مەكتەپكە بارۋعا لايىق» جوباسىن قولداعانى، سونداي-اق قوعامدا ىنتىماقتاستىقتى ارتتىرۋعا قوسقان ۇلەسى ءۇشىن العىس ايتتىم.
وسىناۋ ىسكە بەيجاي قارامايتىن بارشا مەسەناتتارعا، ماماندار مەن اتا-انالارعا ارنايى راقمەت ايتامىن. قوعامداعى نەمقۇرايدىلىق پەن سامارقاۋلىقتى سەيىلتىپ، ەرەكشە قاجەتتىلىگى بار ءاربىر بالانى الەۋمەتتىك ورتاعا تارتا وتىرىپ، تولەرانتتى قارىم-قاتىناس قالىپتاستىرۋ – ءبىزدىڭ ورتاق مىندەتىمىز»، – دەپ اتاپ ءوتتى باۋىرجان بايبەك.
