قازىرگى تاڭدا قازاقستاندا COVID-19 اۋرۋى بويىنشا احۋالدىڭ جاقسارۋ سەرپىنى بايقالادى. بۇل تۋرالى پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا دەنساۋلىق ساقتاۋ ءمينيسترى الەكسەي سوي ءمالىم ەتتى، دەپ جازادى ۇكىمەتتىڭ باسپا ءسوز قىزمەتى.

مينيستر مالىمەتىنشە، بۇگىندە ۆيرۋستىڭ رەپرودۋكتيۆتى يندەكسى 0،98 قۇرايدى. اۋرۋحانا توسەكتەرى 36%، رەانيماسيالىق توسەك ورىندار 28% تولى. 6 ءوڭىر – نۇر-سۇلتان جانە الماتى قالالارى، باتىس قازاقستان، اقمولا، قاراعاندى، اتىراۋ وبلىستارى "قىزىل ايماقتا" تۇر.

– قازىرگى تاڭدا قازاقستاندا ۆاكسينانىڭ ءبىرىنشى كومپونەنتى 1،9 ملن جۋىق ادامعا، ەكىنشى كومپونەنتى شامامەن 800 مىڭ ادامعا سالىندى. قويمالار مەن مەديسينالىق مەكەمەلەردە ۆاكسينالاردىڭ جەتكىلىكتى كولەمى بار. ۆاكسينالاۋ كەستە بويىنشا جۇرگىزىلۋدە، –  دەدى ول.

الەكسەي سوي "Ashyq" قوسىمشاسى ەنگىزىلگەلى 3 256 ادام ۆيرۋس جۇقتىرعانى انىقتالعانىن، كەي ازاماتتار اۋىرسا دا قوعامدىق ورىندارعا بارىپ، وزگە ازاماتتارعا ۆيرۋس جۇقتىرۋ ءقاۋپىن تۋدىرىپ وتىرعانىن اتاپ ءوتتى.

پرەمەر-مينيستر شەكتەۋ شارالارىنىڭ ساقتالۋىن باقىلايتىن مونيتورينگتىك توپتاردىڭ جۇمىسىن جالعاستىرۋ قاجەتتىگىن اتاپ ءوتتى.

– "Ashyq" قوسىمشاسىن پايدالانۋ وڭ ناتيجەسىن بەرىپ وتىر. سونىڭ ارقاسىندا قىزمەتتەر كورسەتۋ سالاسىنداعى بيزنەستىڭ جۇمىس ىستەۋ مۇمكىندىگى جاقساردى، ولارعا كەلۋشى ادامداردىڭ قاۋىپسىزدىگى ارتتى. قوسىمشانى پايدالانۋ سالالارىن ودان ءارى دە كەڭەيتۋ قاجەت، – دەدى ا. مامين.