قازان قالاسىندا بولعان وقيعادان كەيىن ءبىلىم جانە عىلىم ءمينيسترى اسحات ايماعامبەتوۆ مەكتەپ باسشىلارىنا تاپسىرما بەردى. بۇل تۋرالى ول ۆەدومستۆونىڭ اپپارات جينالىسىندا ايتتى.

– اتا-انالار بالالارىن بالاباقشاعا الدە مەكتەپكە جىبەرگەندە الاڭداماۋى كەرەك. تەزىرەك قاۋىپسىزدىك شارالارى قابىلدانىپ، وقۋشىلارعا جايلى ورتا قالىپتاستىرۋىمىز قاجەت. ول ءۇشىن ءتيىستى جۇمىستى ۇيىمداستىرۋ كەرەك. قازان قالاسىندا بولعان جانتۇرشىگەرلىك وقيعا ءبارىمىزدىڭ قابىرعامىزدى قايىستىردى. بۇل ءبىز ءۇشىن ۇلكەن ساباق بولۋعا ءتيىس. ءبىز ءبىلىم سالاسىندا كەشەندى، جۇيەلى ءىس-شارالار قابىلداۋىمىز كەرەك. بۇل باعىت بويىنشا پرەزيدەنت تاپسىرما بەردى. سوندىقتان "دابىل" تۇيمەلەرىن، بەينەباقىلاۋ جۇيەلەرىن ورناتۋىمىز كەرەك. ونىڭ ىشىندە ورتالىقتاندىرىلعان پوليسيا بەكەتتەرىن قويىپ ارنايى كۇزەت بولۋعا ءتيىس، – دەدى مينيستر. 

ايماعامبەتوۆ مەكتەپتىڭ ءاربىر قىزمەتكەرى مەن وقۋشىسى توتەنشە جاعداي كەزىندە ءوزىن قالاي ۇستاۋ قاجەتتىگىن بىلۋگە ءتيىس ەكەنىن اتاپ ءوتتى.

– بۇل ءۇشىن وقۋ-جاتتىعۋ وتكىزۋ قاجەت. ءبىز ءقازىر ءتيىستى نۇسقاۋلىقتارعا مىندەتتى نورمالاردى ەنگىزىپ جاتىرمىز. ءبىلىم ۇيىمدارىن اتتەستاتتاۋ كەزىندە وقۋ باعدارلاماسى، ءبىلىم ساپاسىنا عانا ەمەس، مەكتەپتىڭ قانشالىقتى ءقاۋىپسىز ەكەنىنە دە نازار اۋدارامىز. مەكتەپ بىتىرگەن بالا ءوز مەكتەبىنە قارۋمەن بارۋ دەگەن ول، ەڭ الدىمەن، تاربيە جۇمىسىنا قويىلاتىن سۇراق. ەڭ الدىمەن، ءبىلىم مازمۇنىنا، ءبىلىم باعدارلاماسىنا قويىلاتىن سۇراق. سوندىقتان ءبىز كۇزەت، پسيحولوگ، بەينەباقىلاۋ، دابىل تۇيمەلەرى دەپ قانا وتىرماي، تاربيە جۇمىسىن دا جانداندىرۋىمىز كەرەك. ەڭ باستى ماسەلە – قۇندىلىقتارعا نەگىزدەلگەن ءبىلىم بەرۋ، – دەدى ول.

ەسكە سالا كەتەيىك، تاتارستان استاناسى قازان قالاسىنداعى مەكتەپكە 19 جاستاعى ءجاسوسپىرىم قارۋمەن شابۋىل جاساپ، سونىڭ سالدارىنان ەكى ءمۇعالىم، جەتى وقۋشى قازا تاۋىپ، 21 ادام جاراقات العان.

كۇلىكتى كىناسىن تولىعىمەن مويىنداعان. ول "ادام ءولتىرۋ" فاكتىسى بويىنشا ايىپتالۋدا.