قازاقستاننىڭ تۇڭعىش پرەزيدەنتى نۇرسۇلتان نازاربايەۆ 18 مامىردا 86 جاسىندا قايتىس بولعان كورنەكتى عالىم، ۇلتتىق عىلىم اكادەمياسىنىڭ اكادەميگى امانجول قوشانوۆتىڭ ومىردەن وتۋىنە بايلانىستى مارقۇمنىڭ جاقىندارىنا كوڭىل ايتتى. بۇل تۋرالى elbasy.kz سايتى حابارلادى.

"امانجول قوشان ۇلى سانالى عۇمىرىن عىلىم جولىنا ارناپ، وتاندىق ەكونوميكا تەورياسى سالاسىن دامىتۋعا قوماقتى ۇلەس قوسقان تۇعىرلى تۇلعا بولاتىن. ول ەلىمىزدىڭ ەكونوميكالىق مۇددەلەرى جۇيەسىن جاساۋ، ۇلتتىق ەكونوميكالىق قاۋىپسىزدىكتى قامتاماسىز ەتۋ سياقتى كوپتەگەن ماڭىزدى ماسەلەلەر بويىنشا ىرگەلى زەرتتەۋلەر جۇرگىزىپ، مەملەكەتتىك عىلىمي باعدارلامالار جاساۋعا اتسالىستى. ەكونوميكالىق تەوريا بويىنشا وزىندىك مەكتەبىن قالىپتاستىردى" دەلىنگەن جەدەلحاتتا.

ەلباسى امانجول قوشانوۆتىڭ عيبراتتى عۇمىرى مەن جارقىن بەينەسى جۇرتشىلىق جادىندا ءاردايىم ساقتالاتىنىنا سەنىم ءبىلدىردى.

امانجول قوشان ۇلى قوشانوۆ 1934 جىلى سولتۇستىك قازاقستان وبلىسى، شال اقىن اۋدانى، القااعاش اۋىلىندا دۇنيەگە كەلگەن. ورتا مەكتەپتى التىن مەدالمەن بىتىرگەن ول م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ەكونوميكا فاكۋلتەتىنىڭ ستۋدەنتى بولىپ قابىلدانعان.

1959 جىلدان باستاپ ۇلتتىق عىلىم اكادەمياسىنىڭ ەكونوميكا ينستيتۋتىندا قىزمەت ىستەگەن ول ەلدىڭ ەكونوميكالىق عىلىمى مەن حالىق شارۋاشىلىعىنىڭ دامۋىنا ەلەۋلى ۇلەس قوسقان ءىرى ەكونوميست-عالىم بولعان.

اكادەميك 600-دەن اسا عىلىمي ەڭبەكتىڭ، سونىڭ ىشىندە، 53 مونوگرافيانىڭ اۆتورى بولعان. ونىڭ عىلىمي جەتەكشىلىگىمەن 16 ەكونوميكا عىلىمدارىنىڭ دوكتورى، 60-تان اسا عىلىم كانديداتتارى دايارلانعان.