ەلىمىزدە ۆولونتەرلەرگە ارنالعان «جاستار-وتانعا!» رەسپۋبليكالىق سىيلىعى تاعايىندالدى. اتالعان سىيلىق جىل سايىن ەڭ بەلسەندى ەرىكتىلەر، مەسەناتتار مەن قوعامدىق ۇيىمدارعا بەرىلەتىن بولادى. بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ۆولونتەرلەرمەن وتكىزگەن ونلاين-كەزدەسۋدەن سوڭ جاريالاعان Facebook-تەگى جازباسىندا ايتتى.
قازىرگى كەزدە ۆولونتەرلىك ترەندتىك قۇبىلىس رەتىندە قوعام ومىرىنە نىق ەنىپ وتىرعانىن ايتقان باۋىرجان بايبەك مۇقتاجدارعا وتەۋسىز كومەك كورسەتۋ ءۇشىن بىرىگۋگە ۇمتىلاتىن جاناشىر ازاماتتاردىڭ قاتارى ارتقانىن العا تارتتى.
«وزدەرىڭىز بىلەتىندەي، ەلباسى نۇرسۇلتان نازاربايەۆ 2019 جىلدى – جاستار جىلى دەپ جاريالاي وتىرىپ، ۆولونتەرلىكتى جان-جاقتى دامىتۋ قاجەتتىگىنە ەرەكشە نازار اۋداردى: «بۇكىل الەمدە جاستار – ەرىكتىلىك پەن قايىرىمنىڭ قۋاتتى رەسۋرسى، ال ۆولونتەرلىك – جاستاردىڭ ەڭبەك نارىعىنا جىلدام بەيىمدەلۋى مەن ولاردىڭ ءوز قابىلەتتەرىن ءارى قاراي ىسكە اسىرۋىنا ىقپال ەتەتىن ءتيىمدى تەتىك».
ەل پرەزيدەنتى قاسىم-جومارت كەمەل ۇلى توقايەۆتىڭ 2020 جىلدى ۆولونتەر جىلى دەپ جاريالاۋى ۆولونتەرلىكتىڭ ۇلتتىق اۋقىمدا دامۋىنا جۇيەلى سەرپىن بەردى. مەملەكەت باسشىسى «Birgemiz» رەسپۋبليكالىق ۆولونتەرلار ءفرونت-وفيسىن تىكەلەي ءوزى كەلىپ اشىپ، قازاقستانداعى ۆولونتەرلار قوزعالىسىنىڭ قۇرمەتتى ەلشىسى بولدى.
ءتيىستى ىنتالاندىرۋ تەتىكتەرىن قۇرۋ، زاڭنامالىق بازانى جەتىلدىرۋ، ۆولونتەر ستۋدەنتتەردىڭ ستيپەنديالارىن 30%-كە كوتەرۋ بەلسەندى جاستاردىڭ جەر-جەردە ءار ءتۇرلى ۆولونتەرلىك ۇيىمدارعا بىرىگۋىنە جول اشتى. ەل پرەزيدەنتى ايتقانداي، «جاناشىر ازاماتتارى كوپ مەملەكەتتىڭ بولاشاعى دا جارقىن بولماق. ەرىكتىلەر قىزمەتى بارشا ازاماتتارىمىزعا ۇلگى بولىپ، ۇلتتىڭ جاڭا ساپاسىن قالىپتاستىرۋعا جول اشادى»، - دەدى پارتيا ءتوراعاسىنىڭ ءبىرىنشى ورىنباسارى.
ونىڭ ايتۋىنشا، ەل باسشىلىعىنىڭ باستاماسىن «Jas Otan» العاشقىلاردىڭ ءبىرى بولىپ قولداعان. پارتيانىڭ جاستار قاناتى ارىس پەن ماقتاارالداعى اپاتتاردىڭ سالدارلارىن جويۋعا بەلسەنە اتسالىستى.
«وتكەن جىلعى پاندەميانىڭ ءبىرىنشى تولقىنى كەزىندە 5 مىڭ جاسوتاندىق ەلباسى باستاماشىلىق ەتكەن «ءبىز بىرگەمىز!» جالپىۇلتتىق اكسياسى اياسىندا حالىقتىڭ الەۋمەتتىك وسال توپتارىنا اتاۋلى كومەك كورسەتتى. بۇكىل وڭىرلەر بويىنشا 320 مىڭ وتباسى ازىق-تۇلىك سەبەتتەرى مەن گيگيەنالىق قۇرالدار جيىنتىعىن الدى. بيىلعى ءساۋىر ايىندا جاسوتاندىقتار 3 مىڭ مەديسينا قىزمەتكەرىنە «العىس پاكەتتەرىن» تاراتۋدى ۇيىمداستىردى. سونىمەن قاتار، ريددەر قالاسىندا ورتتەن زارداپ شەككەندەرگە كومەك كورسەتۋگە العاشقىلاردىڭ ءبىرى بولىپ 80-نەن استام ۆولونتەر تىكەلەي قاتىستى»، - دەدى ول.
كەزدەسۋدە ەل كولەمىندە 15 مىڭ ۆولونتەردى بىرىكتىرىپ وتىرعان «Biz Birgemiz!» قوزعالىسىنىڭ قاتىسۋشىلارى وزدەرىنىڭ بيىلعا ارنالعان جوبالارىمەن تانىستىرىپ، وڭىرلەردە ۆولونتەرلىك جەلىنى كەڭەيتۋ تۋرالى جوسپارلارىمەن ءبولىستى. تاۋەلسىزدىكتىڭ 30 جىلدىعىنا وراي ەرىكتىلەر «30 يگى ءىس» رەسپۋبليكالىق اكسياسىنا باستاماشى بولدى.
سونداي-اق، وسى جيىن بارىسىندا «جاستار-وتانعا!» باعدارلاماسىن جۇزەگە اسىرۋ ءۇشىن ارنايى جول كارتاسى بەكىتىلگەنى بەلگىلى بولدى.
«ۆولونتەرلىكتى دامىتۋ – 2025 جىلعا دەيىنگى «جاستار-وتانعا!» باعدارلاماسىنىڭ دا باستى باسىمدىقتارىنىڭ ءبىرى. وسىدان 3 كۇن بۇرىن پارتيانىڭ ساياسي كەڭەسى بيۋروسىنىڭ شەشىمىمەن اتالعان باعدارلامانى ىسكە اسىرۋ بويىنشا جول كارتاسى بەكىتىلدى. تاياۋ كۇندەرى «Nur Otan» پارتياسى فيليالدارىنىڭ بيۋرولارى 216 وڭىرلىك جول كارتاسىن بەكىتەدى. وسىلايشا، پارتيا مەن «Jas Otan» جاستارعا قاتىستى بەرىلگەن سايلاۋالدى ۋادەلەردى ساپالى ورىنداۋعا دەن قويسا، ال ءماجىلىس پەن ءماسليحات مۇشەلەرىنەن قۇرالعان جاس دەپۋتاتتار كورپۋسى باعدارلامالاردىڭ ىسكە اسىرىلۋ بارىسىن ءجىتى قاداعالاماق. اتاپ ايتقاندا، الداعى 5 جىل ىشىندە 35 جاسقا دەيىنگى 4،5 ميلليوننان استام جاس قازاقستاندىقتى قامتيتىن 6،5 مىڭ ءىس-شارانى جۇزەگە اسىرىپ، 3،5 مىڭنان استام ينديكاتورعا قول جەتكىزۋ جوسپارلاندى. بۇل رەتتە، ساپالى ءبىلىم، جۇمىسقا ورنالاستىرۋ، قولجەتىمدى باسپانا، ازاماتتىق بەلسەندىلىكتى ارتتىرۋ، تۇلعالىق دامۋ مەن بوس ۋاقىت ماسەلەلەرى باستى نازاردا. باسىمدىق بەرىلگەن كورسەتكىشتەر قاتارىندا 2025 جىلعا قاراي ۆولونتەرلىككە 100 مىڭنان استام ادامدى تارتۋ مىندەتى تاعى بار»، - دەدى باۋىرجان بايبەك.
«Jas Otan» مەن «Biz Birgemiz!» قوزعالىسىنىڭ الدىندا ەلىمىزدە قىزمەت ەتىپ جاتقان بارشا ۆولونتەرلىك ۇيىمدارمەن ءوزارا سەرىكتەستىك ءىس-قيمىلدى دامىتۋ بويىنشا ماڭىزدى مىندەتتەر تۇرعانى ايتىلدى.
سونىمەن قاتار، پارتيا ءتوراعاسىنىڭ ءبىرىنشى ورىنباسارى «Nur Otan»-نىڭ ەرىكتىلەرگە الداعى ۋاقىتتا دا قولداۋ كورسەتەتىنىن ايتا كەلە، ولارعا جىل سايىن بەرىلەتىن ارنايى سىيلىقتىڭ تاعايىندالاتىنىن جەتكىزدى.
«ماقساتى ايقىن، ناقتى ىستەر پارتياسى رەتىندە «Nur Otan» جاستاردىڭ باستامالارىن قۋاتتاي وتىرىپ، ۆولونتەرلارعا ءارى قاراي دا قولداۋ كورسەتە بەرەدى. بۇل ءۇشىن ءبىز جىل سايىن بەرىلەتىن «جاستار-وتانعا!» رەسپۋبليكالىق سىيلىعىن تاعايىندايمىز. جىل سوڭىندا ەڭ بەلسەندى ەرىكتىلەر، مەسەناتتار مەن قوعامدىق ۇيىمدار 5 نوميناسيا بويىنشا ماراپاتتالاتىن بولادى»، - دەدى ول.
