ءبىلىم جانە عىلىم ءمينيسترى اسحات ايماعامبەتوۆ سىبايلاس جەمقورلىققا قارسى ءىس-قيمىل اگەنتىگىنە بەرگەن سۇحباتىندا ءبىلىم سالاسىنا ەنگىزىلگەن وزگەرىستەر تۋرالى ايتى.

ۆەدومستۆا باسشىسى مۇعالىمدەردى جۇمىسقا بۇدان بىلاي مەكتەپ ديرەكتورلارى قابىلدامايتىنىن، جۇمىسقا تۇرۋ اشىق كونكۋرس ارقىلى وتەتىنىن ايتتى. 

– ءتۇرلى الىپ-قاشپا سوزدەر بار. شىندىقتى ءبارىمىز بىلەمىز. مۇنداي ماسەلەلەردىڭ، مۇنداي تاۋەكەلدەردىڭ بارىن بىلەمىز جانە مويىنداۋىمىز كەرەك. بۇرىن ءار مەكتەپتىڭ باسشىسى ءمۇعالىمدى جۇمىسقا قابىلداعاندا ءوزى جەكە دەربەس شەشىم قابىلدايتىن. ەندى مۇنداي تاۋەكەلدەردىڭ الدىن الۋ ءۇشىن زاڭناماعا وزگەرىستەر ەنگىزدىك. ەندى جۇمىسقا مۇعالىمدەردى ديرەكتورلار قابىلدامايدى، كونكۋرسپەن قابىلدانادى. ەگەر بوس جۇمىس ورنى بولاتىن بولسا ول ورىنعا ءتيىستى جارناما بەرىپ، حابارلايدى. سول حابارلاما بويىنشا ونىڭ ناقتى جالاقىسى قانداي جانە ناقتى اتقاراتىن قىزمەتى، وعان قويىلاتىن تالاپتار دا كورسەتىلەدى. وسىعان وراي ۇمىتكەرلەر قۇجاتتارىن تاپسىرادى. ونىڭ ءبارى كونكۋرستان ءوتىپ، ءتيىستى وزىنە ءتان قاسيەتتەرى، قۇزىرەتتىلىگىنە، بىلىمدىلىگىنە، بىلىكتىلىگىنە سايكەس ءتيىستى كوميسسيا شەشىم قابىلداپ، مەكتەپكە ەڭ مىقتى، ءبىلىمدى دەگەن مۇعالىمدەر كەلۋ كەرەك. وسى مەحانيزمدى ءبىز ءبىلىم تۋرالى زاڭعا ەندى. ەندى وسى نورمانى ىسكە اسىرۋ ءۇشىن ءتيىستى مينيسترلىكتىڭ بۇيرىعىن دايىنداپ جاتىرمىز. 1-2 جۇمانىڭ ىشىندە بۇيرىققا قول قويامىن. قول قويىلعاننان كەيىن بۇل ىسكە اسادى، – دەدى ايماعامبەتوۆ.

ءمينيستردىڭ سوزىنشە، ۋنيۆەرسيتەتتى بىتىرگەن جاس پەدوگوگتار ديپلوم الىسىمەن بىردەن مەكتەپكە جۇمىسقا تۇرا المايدى. ولار ۇلتتىق بىلىكتىلىك تەستىن تاپسىرىپ، ءتيىستى بالل جيناۋى قاجەت. 

– بيىلعى جىلدان باستاپ ۋنيۆەرسيتەتتەردى بىتىرگەن ءبىزدىڭ بولاشاق پەدوگوگتەر مەكتەپكە بارۋ ءۇشىن سەرتيفيكاتتاۋ راسىمىنەن ءوتۋى كەرەك. ولار ۇلتتىق بىلىكتىلىك تەستىن تاپسىرادى.ءتيىستى بالل الاتىن بولسا عانا قاي مەكتەپكە تۇرعىسى كەلسە، سول مەكتەپكە بارادى. سوسىن سول مەكتەپتەگى كوميسسياعا ساباق جۇرگىزەدى. بۇل ەكىنشى ەتاپ. سونىڭ ناتيجەسى بويىنشا وعان پەداگوگ دەگەن كۆاليفيكاسيا بەرىلەدى. سول مەكتەپتە جۇمىس ىستەۋگە مۇمكىندىك الادى، – دەدى مينيستر.