سوڭعى بەس جىلدا ەلدە بالالارعا قارسى سەكسۋالدىق سيپاتتاعى 3893 قىلمىس تىركەلگەن. بۇل تۋرالى ءماجىلىس دەپۋتاتى باقىتبەك سماعۇل ىشكى ىستەر ءمينيسترى ەرلان تۇرعىمبايەۆ پەن ءبىلىم جانە عىلىم ءمينيسترى اسحات ايماعامبەتوۆكە جولداعان دەپۋتاتتىق ساۋالىندا ءمالىم ەتتى.
دەپۋتات دەرەگىنشە، 2016 جىلدان بەرى 748 زورلاۋ، سەكسۋالدىق سيپاتتاعى 672 زورلىق-زومبىلىق ارەكەتتەرى، ون التى جاسقا تولماعان اداممەن جىنىستىق قاتىناس نەمەسە سەكسۋالدىق سيپاتتاعى 1808 ارەكەت تىركەلگەن. 2020 جىلدىڭ قورىتىندىسى بويىنشا زورلاۋ فاكتىسى 2016 جىلمەن سالىستىرعاندا 45،8 پايىزعا ارتقان.
"بارىنەن بۇرىن، بۇنداي قىلمىس جاساعان ادامداردىڭ بوستاندىققا شىعىپ، قايتا وسىنداي قىلمىس جاساۋى قوعامدا، جالپى ءاربىر ادامدا الاڭداتۋشىلىق تۋدىرادى. بۇقارالىق اقپارات قۇرالدارىندا بيىلعى جىلدىڭ سوڭىنا دەيىن "32 پەدوفيل بوستاندىققا شىعادى" دەگەن اقپارات تارادى. بۇل رەتتە، جازاسىن وتەپ جاتقان قىلمىسكەرلەرمەن قىلمىستىق-اتقارۋ مەكەمەلەرىندە قانشالىقتى ءتيىستى جۇمىستار جۇرگىزىلدى جانە ءبىزدىڭ پروباسيالىق قىزمەت بۇل ساناتتاعى ادامدارمەن جۇمىس ىستەۋگە قانشالىقتى دايىن دەگەن سۇراقتار تۋىندايدى.
وزدەرىڭىزگە ءمالىم، قىلمىستىق-اتقارۋ ينسپەكسيالارىنىڭ ورنىنا پروباسيا قىزمەتتەرى قۇرىلدى، ولاردىڭ نەگىزگى فۋنكسيالارىنىڭ ءبىرى سوتتالعانداردى تۇزەپ-تاربيەلەۋگە ىقپال ەتۋ. وكىنىشكە وراي، ولار ءالى كۇنگە دەيىن ەسكى تاسىلدەرمەن جۇمىس ىستەيدى، بۇل قىزمەتتە فورماليزم كوپ.
وسىعان بايلانىستى، قۇرمەتتى ەرلان زامانبەك ۇلى، جوعارىدا باياندالعان ماسەلەنى قاتاڭ باقىلاۋعا الۋىڭىزدى جانە كەلەسى سۇراقتارعا جاۋاپ بەرۋىڭىزدى سۇرايمىن:
- قىلمىستىق-اتقارۋ جۇيەسىنىڭ مەكەمەلەرىندە وسى قىلمىس بويىنشا جازاسىن وتەۋشىلەرمەن وڭالتۋ جۇمىستارىن جۇرگىزۋ بويىنشا ارنايى باعدارلامالار قابىلداندى ما، ءتيىستى ماماندار بار ما؟
- سوتتالعاندار اراسىندا تاربيە جانە يدەولوگيالىق جۇمىستا قانداي تاسىلدەردى پايدالاناسىزدار؟
- تۇزەۋ مەكەمەلەرىندەگى پسيحولوگيالىق قىزمەت جۇيەسىنىڭ دەڭگەيىن ارتتىرۋ بويىنشا قانداي شارالار قابىلداندى، وعان جىلىنا قانشا قاراجات بولىنەدى؟
- سوتتالعانداردى ەڭبەكپەن قامتۋدا قانداي جاڭا تاسىلدەر ەنگىزىلدى؟
قۇرمەتتى اسحات قانات ۇلى، ءبىلىم جانە عىلىم مينيسترلىگى:
- اۋىلدى جەرلەردەگى دالادا ورنالاسقان مەكتەپ دارەتحانالارىن عيماراتقا ەنگىزۋ بويىنشا قانداي شارالار قابىلدادى، بۇگىنگى تاڭدا بۇل باعىتتاعى جۇمىس قالاي جۇرگىزىلىپ جاتىر، جالپى دالاداعى مەكتەپ دارەتحانالارى جويىلدى ما؟
- قاۋىپسىزدىكتى قامتاماسىز ەتۋ ماقساتىندا ءبىلىم بەرۋ ۇيىمدارىندا مەكتەپ ينسپەكتورلارى جەتكىلىكتى مە جانە ولارعا جەكە كابينەت ءبولىنىپ بەينەباقىلاۋ كامەرالارىمەن تولىق جابدىقتالدى ما؟
- ءبىلىم بەرۋ ۇيىمدارىندا پسيحولوگيالىق قىزمەتتىڭ جۇمىسى قانداي دەڭگەيدە؟" دەگەن دەپۋتات مينيسترلەرگە ساۋالدى قاراۋ ناتيجەسى بويىنشا زاڭمەن بەلگىلەنگەن مەرزىمدە جازباشا جاۋاپ بەرۋىن سۇرادى.
پىكىر قالدىرۋ