دەنساۋلىق ساقتاۋ ءمينيسترى الەكسەي سوي گەرمانيا، اقش، جۇڭگو بيوتەحنولوگيالىق كومپانيالارىنىڭ بىرلەسكەن ءونىمى سانالاتىن Pfizer ۆاكسيناسىنىڭ العاشقى پارتياسىن 12-18 جاس ارالىعىنداعى بالالارعا سالۋ جوسپارلانىپ وتىرعانىن ءمالىم ەتتى. بۇل تۋرالى ول "ۆرەميا" گازەتىنە بەرگەن سۇحبات بارىسىندا ايتتى.

ونىڭ سوزىنشە، Pfizer 12-18 جاس ارالىعىنداعى توپقا سالۋ ۇسىنىلعان جالعىز ۆاكسينا. ستاتيستيكاعا ساي، قازاقستاندا وسى جاس مولشەرىنە سايكەس كەلەتىن ەكى ميلليوننان استام بالا بار.

سوي بالالارعا ۆاكسينا سالۋ اتا-انالاردىڭ كەلىسىمىمەن جۇزەگە اساتىنىن، ۆاكسينا ارتىلىپ جاتسا، ۇلكەندەرگە دە سالىناتىنىن ايتتى.

سونداي-اق ول قازىرگى تاڭدا ەلدە قولجەتىمدى ۆاكسينالار ساپاسى جونىنەن Pfizer-دەن ارتىق بولماسا، كەم ەمەس ەكەنىن جەتكىزدى.

– Pfizer كۇتىپ جۇرگەندەر ءۇشىن باستى كريتەريي ۆاكسينا پاسپورتىنىڭ مويىندالۋى بولىپ وتىر. الايدا ءبىزدىڭ وندىرۋشىلەر بۇل ماسەلەمەن بەلسەندى جۇمىس ىستەپ جاتىر. بۇل ۆاكسينالار دۇنيەجۇزىلىك دەنساۋلىق ساقتاۋ ۇيىمىنا تىركەلگەن كەزدە كوپتەگەن ماسەلەلەر كۇن تارتىبىنەن تۇسەدى. كوروناۆيرۋس بىزگە ۋاقىت قالدىرمايتىنىن ءتۇسىنۋىمىز كەرەك. ءقازىر كوۆيدپەن اۋىرعانداردىڭ 98 پايىزى ۆاكسينا سالدىرماعاندار ەكەنىن كورىپ وتىرمىز. سوندىقتان كۇتۋدىڭ ءمانى بار ما؟ ەش ءمانى جوق. سىزدەر وزدەرىڭىزدى قورعاۋ مۇمكىندىگىن جىبەرىپ الاسىزدار. ادامداردىڭ ۆاكسينا شىنايى قورعانىس ەكەنىن تۇسىنگەنى ءبىز ءۇشىن اسا ماڭىزدى. ارينە، نارىقتا بۇدان دا كوبىرەك ۆاكسينا بولعانىن قالايمىز، ءبىراق بۇل جەردە برەند ەمەس، تيىمدىلىك ماڭىزدى، –  دەيدى ول.