انكارا مەن باكۋ بىرلەسكەن تۇرىك ارمياسىن قۇرۋ ماسەلەسىن تالقىلاپ جاتىر، دەپ حابارلادى Sputnik Azerbaijan.
تۇركيا ۇلتتىق ءماجىلىسىنىڭ ءتوراعاسى مۇستافا شەنتوپتىڭ ايتۋىنشا، ەكى ەل ەكونوميكالىق قاتىناستارىن نىعايتۋعا ارنالعان ەركىن ساۋدا كەلىسىمى بويىنشا جۇمىس ىستەۋمەن قاتار اسكەري جاتتىعۋلار وتكىزىپ جاتىر.
– اسكەري ىنتىماقتاستىق سالاسىندا بىرلەسكەن ءىس-شارالار جوسپارلانعان. وسى كەلىسىمدەر بويىنشا جۇمىس جالعاسۋدا. ءبىزدىڭ باستى ۇرانىمىز – ءبىر ۇلت جانە ەكى مەملەكەت. وسىعان بايلانىستى كوپتەگەن كەلىسسوزدەر مەن كەلىسىمدەر جۇرگىزىلدى، – دەدى ول.
سەيسەنبى كۇنى باكۋدە ازەربايجان، تۇركيا جانە پاكىستان پارلامەنتتەرى سپيكەرلەرى ساحيبا گافاروۆا، مۇستافا شەنتوپ جانە اساد كايزەردىڭ العاشقى ءۇشجاقتى كەزدەسۋى ءوتتى. ناتيجەسىندە ولار ىنتىماقتاستىقتى دامىتۋعا جانە جاھاندىق، ايماقتىق ماسەلەلەر بويىنشا بىرلەسكەن جۇمىستارعا باعىتتالعان باكۋ دەكلاراسياسىنا قول قويدى.
پىكىر قالدىرۋ