شىمكەنت قالاسىنىڭ سولتۇستىك باتىس بولىگىندە ورنالاسقان ەلدىمەكەندەردى اۋىز سۋمەن قامتۋ ماقساتىندا ءۇش ماگيسترالدى سۋ قۇبىرىنىڭ قۇرىلىسى جۇرگىزىلىپ جاتىر. وسى جۇمىستاردىڭ ساپالى جۇرگىزىلۋىن باقىلاۋ. 

جالپى ۇزىندىعى 11،37 شاقىرىمدى قۇرايتىن «كومەشبۇلاق» نىسانىنىڭ قۇرىلىسى 2020 جىلى باستالعان بولاتىن. قازىرگى ۋاقىتتا 8،3 شاقىرىم قۇبىر ورناتىلىپ، قۇرىلىس جۇمىستارىنىڭ 75 پايىزى اياقتالدى. نىسان قۇرىلىسىن وسى جىلدىڭ سوڭىنا دەيىن اياقتاۋ جوسپارلانىپ وتىر.

سونىمەن قاتار، ۇزىندىعى 13،6 جانە 11،76 شاقىرىمدى قۇرايتىن اۋىز سۋ قۇبىرلارىنىڭ قۇرىلىسى دا بيىل اياقتالىپ، جىل سوڭىندا پايدالانۋعا بەرىلەدى دەپ كۇتىلۋدە.

اتالعان ماگيسترالدى سۋ قۇبىرىنىڭ قۇرىلىسى اياقتالسا اسار-2، دوستىق، سولتۇستىك ساياجاي، ىنتىماق، ىنتىماق-2، باتىس، قىزىلجار، يگىلىك، جاڭاتالاپ، تاۋەلسىزدىككە 20 جىل، كوكبۇلاق تۇرعىن الاپتارى تولىققاندى ساپالى اۋىز سۋمەن قامتاماسىز ەتىلەتىن بولادى. 

قازىرگى ۋاقىتتى قالا تۇرعىندارىن ساپالى اۋىز سۋمەن قامتۋ ماقساتىندا 14 نىساننىڭ، ياعني 3 ماگيسترالدى سۋاققى مەن 11 ىشكى ورامدىق جۇيەلەر قۇرىلىسى جۇرگىزىلىپ جاتىر.

ال بۇل جىلى بارلىعى 9 ەلدىمەكەندە قۇرىلىس جۇمىسى اياقتالىپ، تۇران، سولتۇستىك ساياجاي، ىنتىماق-2، باتىس، جاڭاتۇرلان، اسار-2، اقتاس، جاڭاتالاپ جانە ساۋلە شاعىن اۋداندارى ساپالى اۋىز سۋمەن قامتىلادى.