اۋىل شارۋاشىلىعى مينيسترلىگى جانىنداعى الماتى قالاسى بويىنشا كارانتيندى، وسىمدىكتەردى قورعاۋ جانە فيتوسانيتاريالىق باقىلاۋ بەكەتتەرىن مەملەكەتتىك قاداعالاۋ ءبولىمىنىڭ ك. ەسىمدى ەكس-باسشىسى سوتتالدى. بۇل تۋرالى الماتى قالاسى مەدەۋ اۋدانى №2 اۋداندىق سوتىنىڭ باسپا ءسوز قىزمەتى حابارلادى.
"2021 جىلدىڭ اقپان ايىندا قۇقىقتىق ستاتيستيكا جانە ارنايى ەسەپكە الۋ سالاسىنداعى ۋاكىلەتتى ورگاندا تىركەۋسىز ساۋدا نارىقتارىندا باقىلاۋ مەن قاداعالاۋدى جۇزەگە اسىرۋعا ۋاكىلەتتىك بەرىلگەن ك.، الدىن الا ازىرلەنگەن قىلمىستىق جوسپارعا سايكەس، جەكە، ءوزىنىڭ قىزمەتتىك جاعدايىن پايدالانا وتىرىپ، ساتۋشىلاردى ساتىپ جاتقان كارانتينگە جاتقىزىلعان ونىمدەرگە فيتوسانيتاريالىق سەرتيفيكاتتار مەن باسقا دا قاجەتتى قۇجاتتار جوقتىعىنا بايلانىستى قازاقستان رەسپۋبليكاسىنىڭ اقبتك-نىڭ 400-بابى بويىنشا اكىمشىلىك جاۋاپكەرشىلىككە تارتىلادى، ايىپپۇل سالىنادى دەپ قورقىتقان. سودان كەيىن ساتۋشىلار وعان تاۋەلدى بولىپ، تىعىرىققا تىرەلگەندىكتەن اكىمشىلىك جاۋاپكەرشىلىكتەن بوساتۋ ءۇشىن وعان ەرىكتى تۇردە پارا رەتىندە اقشالاي قاراجات، ونىمدەر جانە ونىمدەرگە جەڭىلدىك بەرگەن. وسىلايشا، ك. جالپى سوماسى 157 580 تەڭگە پارا العان" دەلىنگەن سوت تاراتقان اقپاراتتىق حابارلامادا.
سوتتالۋشى سوت ماجىلىسىندە ءوز كىناسىن مويىنداماعان. الايدا ونىڭ كىناسى سوتتا زەرتتەلگەن دالەلدەمەلەردىڭ جيىنتىعىمەن راستالىپ، سوت ايىپتالۋشىنى 7 جىلعا باس بوستاندىعىن ايىرۋ تۋرالى ۇكىم شىعاردى. ايىپتالۋشى جازاسىن قىلمىستىق-اتقارۋ جۇيەسىنىڭ ورتاشا ءقاۋىپسىز مەكەمەسىندە وتەمەك. سونداي-اق ول مەملەكەتتىك لاۋازىمدى اتقارۋ قۇقىعىنان ءومىر بويىنا ايىرىلدى.
سوت ۇكىمى ازىرگە زاڭدى كۇشىنە ەنگەن جوق.
پىكىر قالدىرۋ