ءبىلىم جانە عىلىم ءمينيسترى اسحات ايماعامبەتوۆ ۇلتتىق جانە مەملەكەتتىك جوعارى وقۋ ورىندارى وقىتۋشىلارىنىڭ جالاقىسى 2021 جىلدىڭ قىركۇيەك ايىنان باستاپ ارتاتىنىن حابارلادى.
– ءبىلىم جانە عىلىم مينيسترلىگىنە ۆەدومستۆولىق باعىنىشتى جوعارى وقۋ ورىندارىنىڭ وقىتۋشىلارى ەندى اي سايىن كەمىندە 200 مىڭ تەڭگە الاتىن بولادى. اعا وقىتۋشىنىڭ ەڭبەكاقىسى كەمىندە 230 مىڭ تەڭگەنى قۇراپ، قاۋىمداستىرىلعان پروفەسسور 260 مىڭ تەڭگە، پروفەسسور 350 مىڭ تەڭگە (ۇلتتىق جوعارى وقۋ ورىندارىندا 400 مىڭ تەڭگە) الۋى ءتيىس، – دەدى اسحات ايماعامبەتوۆ.
ءمينيستردىڭ سوزىنشە، جالاقىسى كوتەرىلگەن وقىتۋشىلاردىڭ وقۋ جۇكتەمەسى تومەندەتىلەدى. بۇل مۇعالىمدەردىڭ عىلىمي قىزمەتپەن اينالىسۋلارىنا مۇمكىندىك پەن ۋاقىتتىڭ جەتكىلىكتى بولۋى ءۇشىن جاسالىنىپ جاتىر.
– ءبىز جوسپارلى تۇردە وقىتۋشىلار ءۇشىن جايلى جاعداي جاساپ، ەڭبەكاقىنى جانە پەداگوگتەردىڭ مارتەبەسىن ارتتىرىپ جاتىرمىز. جوعارى وقۋ ورىندارى وقىتۋشىلارىنىڭ جالاقىسى دا جوعارىلايتىن بولادى. ەگەر ءبىز ءبىلىمنىڭ جوعارى دەڭگەيدە بولۋىن قالاساق، مۇعالىمدەرگە لايىقتى جالاقى تولەۋ كەرەك ەكەنىن ءتۇسىنۋىمىز كەرەك. بۇل رەتتە ءبىز جوعارى وقۋ ورىندارى تاراپىنان ساپالى جۇمىستى، ال وقىتۋشىلاردان وقۋ پروسەسىنە اسقان جاۋاپكەرشىلىكپەن قاراۋدى تالاپ ەتەمىز، – دەدى ءبىلىم جانە عىلىم ۆيسە-مينيسترى قۋانىش ەرعالييەۆ.
سونىمەن قاتار ءار ۋنيۆەرسيتەت باسقا دا ىنتالاندىرۋ تولەمدەرىن بەلگىلەپ، وقىتۋشىلاردىڭ بەلگىلى ءبىر جەتىستىكتەرى ءۇشىن قوسىمشا اقى تولەي الادى. جوعارى وقۋ ورىندارىنىڭ ديرەكتورلار كەڭەسى بۇل ماسەلەنى ەرەكشە باقىلاۋدا ۇستاۋى قاجەت.
سونىمەن قاتار، پەداگوگيكالىق ءبىر ستاۆكانىڭ ماكسيمالدى كولەمى ءبىر وقۋ جىلىندا 680 ساعاتتان اسپايتىن بولادى.
پىكىر قالدىرۋ