اۋعانستاندا ايەلدەر سوڭعى 20 جىل بويى ءبىلىم الۋ، جۇمىس ىستەۋ جانە ەركىندىك ءۇشىن كۇرەسىپ كەلدى. ەندى ەل تاليبان قوزعالىسىنىڭ قاراۋىنا وتكەننەن كەيىن ايەلدەردىڭ ءارقايسىسى سول كۇرەسى ءۇشىن جازالانۋى مۇمكىن. "The Guardian" باسىلىمى وسىناۋ شيەلەنىستى جاعدايدا جانايقايىن جەتكىزگەن اۋعان قىزىنىڭ حاتىن جاريالادى. تومەندە حات مازمۇنى قازاقشاعا اۋدارىلىپ، ۇسىنىلىپ وتىر.

جەكسەنبى كۇنى تاڭەرتەڭ مەن ۋنيۆەرسيتەتكە ساباققا بارا جاتتىم. قىزدار جاتاحاناسىنان ءبىر توپ ايەلدىڭ جۇگىرىپ كەلە جاتقانىن كوردىم. مەن نە بولعانىن سۇراعانىمدا "پوليسيا ءبىزدى ەۆاكۋاسيالايىن دەپ جاتىر، ويتكەنى تالىپتەر كابۋلعا كىردى جانە ولار پاراندجاسى جوق ايەلدەردى ۇرىپ سوعادى ەكەن"  دەپ جاۋاپ بەردى. ءبىز ءبارىمىز ۇيگە قايتقىمىز كەلدى، ءبىراق قوعامدىق كولىكتى پايدالانا المادىق. ەشكىم ءبىزدى كولىكتەرىنە وتىرعىزبادى، ويتكەنى ءبىز ءۇشىن جاۋاپكەرشىلىك العىسى كەلمەدى. اسىرەسە پروۆينسيادان كەلگەن قىزدار قاتتى قورىقتى، ولار قايدا بارارىن بىلمەدى. 

 

وسى ۋاقىتتا كوشەدە تۇرعان ەر ادامدار قىزدار مەن ايەلدەردىڭ ۇستىنەن كۇلىپ تۇردى. "بارىڭدار پارانجالارىڭدى كيىڭدەر"، "بۇل سەندەردىڭ سوڭعى رەت كوشەدە جۇرگەندەرىڭ"، "مەن سەندەردىڭ تورتەۋىڭە ءبىر كۇندە ۇيلەنەمىن" دەپ ءبىزدى مازاقتاپ جاتتى.

مەملەكەتتىك مەكەمەلەر جابىلعان كەزدە، مەنىڭ اپكەم ۇيگە بىرنەشە شاقىرىم جاياۋ ءجۇرىپ كەلدى. ول "مەن ءتورت جىل بويى جۇمىس ىستەگەن كومپيۋتەرىمدى ارەڭ ءوشىردىم، ارىپتەستەرىممەن جىلاپ قيماي قوشتاستىم، بۇل مەنىڭ جۇمىسىمنىڭ سوڭعى كۇنى ەكەنىن ءبىلدىم"، دەدى ماعان. 

مەن ءبىر ۋاقىتتا اۋعانستاننىڭ ەڭ جاقسى دەگەن ەكى ۋنيۆەرسيتەتىن اياقتادىم. 2021 جىلدىڭ قاراشا ايىندا كابۋلداعى امەريكالىق جانە اۋعانستاندىق ۋنيۆەرسيتەتتى ءبىتىرۋىم كەرەك ەدى. ءبىراق بۇگىن ۇيگە كەلگەندە،  مەنىڭ ءومىرىم كوز الدىمنان ءوتتى. مەن بۇگىنگە كۇنگە جەتۋ ءۇشىن كوپتەگەن جىل بويى كۇن، ءتۇن دەمەي جۇمىس ىستەدىم.

اپكەم ەكەۋمىز ءبىرىنشى كەزەكتە جەكە كۋالىكتەرىمىزدى، ديپلومدارىمىزدى جاسىردىق. بۇل - قورقىنىشتى بولدى. نەلىكتەن ءبىز ماقتان تۇتاتىن نارسەنى جاسىرۋىمىز كەرەك؟ ويتكەنى ءقازىر اۋعانستاندا بىزگە كىم ەكەنىمىزدى كورسەتۋگە رۇقسات ەتىلمەيدى.

ايەل رەتىندە مەن ءوزىمدى ساياسي سوعىستىڭ قۇربانى سياقتى سەزىنەمىن. مەن ەندى قاتتى كۇلە المايمىن، سۇيىكتى اندەرىمدى تىڭداي المايمىن، سۇيىكتى كافەدە دوستارىممەن كەزدەسە المايمىن، ەندى سۇيىكتى سارى كويلەگىمدى، قىزعىلت دالابپەن ەرنىمدى بوياي المايمىن. ەندى مەن جۇمىسقا بارا المايمىن نەمەسە بىرنەشە جىلدار بويى وقىعان ۋنيۆەرسيتەت دارەجەسىن الا المايمىن.

مەن تىرناقتارىمدى بوياۋدى جاقسى كوردىم. بۇگىن ۇيگە ورالعاندا سۇلۋلىق سالونىنا قارادىم، ول جەرگە مانيكيۋر جاساۋعا باراتىنمىن. قىزداردىڭ ادەمى سۋرەتتەرىمەن بەزەندىرىلگەن دۇكەننىڭ قاسبەتىن تۇندە اق تۇسكە بوياپ قويىپتى.

قازىرگى جاعدايدا مەنىڭ كوزىمە ايەلدەردىڭ قورقىنىشتى، ۇرەيلى تۇرلەرى مەن ايەلدەردى جەك كورەتىن، ولاردى ادام قۇرلى كورمەيتىن، ولاردىڭ بوستاندىقتارى بولماعانىن قالايتىن ەركەكتەردىڭ ۇسقىنسىز تۇرلەرى عانا كورىنەدى. 

ءبىزدىڭ ەلدىڭ جىگىتتەرى ءبىزدى قورعاۋدىڭ ورنىنا، تالىپتەردىڭ جاعىنا شىققان. اۋعان ايەلدەرى وزدەرىنىڭ وسى كۇنگى بوستاندىعى ءۇشىن كوپ نارسەنى قۇربان ەتتى.  مەن جەتىم بولعاندىقتان، ءبىلىم الۋ ءۇشىن كىلەم توقۋعا ءماجبۇر بولىپ، كوپ جۇمىس ىستەدىم. كوپتەگەن قارجىلىق پروبلەمالارعا قاراماستان، بولاشاققا جوسپارلارىم كوپ بولدى.

ەندى ءبارى وسىلاي اياقتالاتىنى مەنىڭ جۇرەگىمدى قاتتى اۋىرتادى. ەندى مەن ءومىرىمنىڭ 24 جىلىندا قول جەتكىزگەن بارلىق نارسەنى ورتەۋىمە تۋرا كەلەدى. ەندى ولار مەنىڭ تاعدىرىمدى اياق استى ەتەدى.