تاليبان ۇيىمى اۋعانستاندا ۇستەمدىگىن ورناتىپ ۇلگەرمەگەن جالعىز ايماق – پەندجشير پروۆينسياسى. پەندجشير قالاسىنىڭ قاۋىپسىزدىگىن ءوز قولىنا العان جەتەكشىلەردىڭ ءبىرى فەحيم دەشتي تالىپتەرمەن اراداعى ماسەلەلەردى كەلىسسوز ارقىلى شەشۋدى ماقسات ەتكەنىمەن، سوعىسقا دا دايىن ەكەنىن ايتتى. 

ونىڭ ايتۋىنشا، پاندجشيردەگى جاعداي تۇراقتى.

– حالىق كۇندەلىكتى جۇمىستارىنا بارىپ-كەلىپ ءجۇر. مەملەكەتتىك قىزمەتكەلەر مەن ساۋداگەرلەر دە تىرشىلىكتەرىن جالعاستىرۋدا. الايدا تاليباننىڭ كەز كەلگەن ۋاقىتتا جاسايتىن شابۋىلىنا دايىن بولۋىمىز قاجەت. سوندىقتان ءبىز دە ءجاي وتىرعان جوقپىز، – دەدى ول.

فەحيم دەشتي تالىپتەر مەن ولارعا قارسى توپتار اراسىنداعى كەلىسسوز جالعاسىپ جاتقانىن، اۋعانستان حالقىنىڭ بولاشاعى، الەۋمەتتىك ادىلەتتىلىكتى قامتاماسىز ەتۋ ءۇشىن كەلىسسوزدەردى قولدايتىنىن جەتكىزدى. سونداي-اق اۋعانستانداعى بارلىق تاراپتار مەن پارتيالاردى قابىلدايتىنىن ايتا كەلە، الەممەن جاقسى قارىم-قاتىناستا بولاتىنىن مالىمدەدى.

– ءبىز ماسەلەنى  كەلىسسوز ارقىلى شەشۋگە بولاتىنىنا تولىق سەنەمىز. ءبىزدىڭ ماقسات – پەندجشيردى قورعاۋ عانا ەمەس، سونىمەن بىرگە اۋعانستاننىڭ بۇكىل گەوگرافياسىن جانە ەلىمىزدىڭ قۇندىلىقتارىن قورعاۋ. سوندىقتان تالىپتەر سوعىس پەن زورلىق-زومبىلىقتى جالعاستىرا بەرسە، ءبىز ءوزىمىزدى قورعاۋعا دايىنبىز، – دەدى ول.

15 تامىزدا تالىپتەر اۋعانستان استاناسى كابۋلدى باسىپ العانان كەيىن، پرەزيدەنت اشراف عاني ەلدەن كەتكەن. "تاليبان" ۇيىمى پەندجشير پروۆينسياسىنان باسقا كابۋلدىڭ سولتۇستىگىندەگى بارلىق ايماقتاردى باقىلاۋعا الدى. پەندجشيردى تاۋلى جانە رەلەفتى (جەر بەتىندەگى تاۋلار مەن ويپاتتار جيىنتىعى - رەد) جاعدايلارعا بايلانىستى الۋ قيىن ەكەنى ايتىلعان.

احمەد مەسۋد ءوزىن پانكشير پروۆينسياسىندا قۇرىلعان جەرگىلىكتى قارسىلاسۋ توپتارىنىڭ باسشىسى ەكەنىن جاريالاپ، حالىقتى "تاليبانمەن كۇرەسۋگە" شاقىردى.